00:00:00 IGIHE NETWORK KN KINYARWANDA EN ENGLISH FR FRANCAIS

Abaminisitiri b’Intebe begura umusubirizo: U Bwongereza buzira iki?

Yanditswe na Bukuru JC
Kuya 25 Ukwakira 2022 saa 06:58
Yasuwe :

Mu myaka itandatu gusa, umwanya wa Minisitiri w’Intebe mu Bwongereza umaze kwicaraho abantu batanu barimo bane bamaze kwegura, umwe ni mushya ari we Rishi Sunak uherutse gutorwa.

Ibintu byabaye bibi ejobundi ubwo Liz Truss wari umaze iminsi 45 kuri uwo mwanya, yatangaga imihoho umugani w’Abarundi.

Si umwanya woroshye kuri iyi Isi kuko uwuriho aba afite ububasha buyingayinga ubwa Perezida wa Leta Zunze Ubumwe za Amerika. Yemerewe kwirukana no gushyiraho abaminisitiri n’abandi bayobozi muri Leta, yemerewe kohereza ingabo ku rugamba, gutegura imishinga y’amategeko utibagiwe ibahasha ya buri mwaka y’amapawundi ibihumbi 164 nk’umushahara (ni ukuvuga miliyoni zisaga 165 Frw).

Icyakora muri iyi minsi ibyiza by’uwo mwanya birangana n’ibibi byabo. Hari inkuru z’uko Boris Johnson ubwo yahabwaga uwo mwanya mu 2019, ngo yagiye kuganira n’Umwamikazi Elisabeth II [Imana imwakire], amumenyesha ko ari we watorewe kuba Minisitiri w’Intebe mushya.

Ngo Umwamikazi yaramurebye azunguza umutwe, aramubwira ati “Sinzi uburyo umuntu muzima yakwifuza umwanya nk’uyu”. Ntawe uzi ibyo Boris yamusubije kuko n’utwo duke twamenyekanye tuvuye mu byegera bya Boris.

Kugeza ubu hatangiye kwibazwa ku miyoborere y’u Bwongereza bwafatagwa nk’icyitegererezo muri demokarasi. Muri make, impinduka zimaze kuba ku mwanya wa Minisitiri w’Intebe w’u Bwongereza mu myaka itandatu, zirenze coup d’etats zo mu bihugu nka Mali na Burkina Faso mu Burengerazuba bwa Afurika.

Benshi baribaza uko byagendekeye iki gihugu cyahoze mu bivuga rikijyana ku Isi, kugeza ubwo nta muyobozi umara kabiri kandi cyiza ku isonga mu kugira amashuri meza yigisha imiyoborere.

Imihengeri ku ntebe ya Minisitiri w’Intebe w’u Bwongereza yatangiye mu 2016, ubwo David Cameron wari uyicayeho yemeraga amatora ya kamarampaka yo kwivana mu Muryango w’Ubumwe bw’u Burayi.

Ni amatora Cameron yumvaga azatsinda byanze bikunze kuko atumvaga ko igice kinini cy’abaturage bari bamaze igihe muri EU, bashobora kwivana muri uwo munyenga bagatora ku bwinshi kuwuvamo.

David Cameron kandi yashakaga gusubiza hamwe ishyaka rye ry’aba-Conservateurs, aho abadepite bari bamaze gucikamo ibice, hari abatakibona agaciro ko kuba mu muryango w’ubumwe bw’u Burayi.

Kamarampaka yabereye umuravumba David Cameron, arota nabi burinda bucya, birangira 51 % by’abongereza batoye basezerera umuryango w’Ubumwe bw’u Burayi.

Cameron nta yandi mahitamo yari afite. Umugabo ni uguma ku ijambo, na we bwacyeye yegura kuko yari yarabisezeranyije abaturage, ko adashobora kuyobora u Bwongereza butakibarizwa muri EU.

Agasusuruko ku ntebe y’Ukuriye Guverinoma mu Bwongereza gaheruka ubwo, abandi bose baje ntibahamaze kabiri, uwarenzaga imyaka ibiri yabaga ari umurame.

Theresa May, Boris Johnson, Liz Truss bose baragerageje birananirana, barayamanika. Habuze n’umwe ubasha gutuza imitima y’Abongereza, bugarijwe n’uruhuri rw’ibibazo birimo n’ibyakomotse ku kwiyomora ku muryango w’ubumwe bw’u Burayi.

Hari abasesenguzi bavuga ko u Bwongereza bwabaye nka wa mwana ushegera icyo adafite, ariko adafite gahunda y’icyo azakimaza namara kukibona. Bivanye muri EU ariko badafite icyo bazakora ngo igihugu cyabo kigumane ijambo cyahoranye. Boris wari ubishyushyemo yaragerageje biranga.

Kugeza ubu u Bwongereza busa n’ubwananiwe gushyiraho gahunda ihamye y’uburyo buzakomeza umubano n’ubuhahirane hagati yabwo na EU. Amategeko yose yoroherezaga abongereza binjiye cyangwa bakorera mu bindi bihugu by’I Burayi, ayoroherezaga ibicuruzwa by’u Bwongereza bigiye ku yandi masoko y’u Burayi cyangwa andi yo mu mahanga afitanye umubano na EU, byose byarahagaze.

U Bwongereza bwisanze mu izamuka rikabije ry’ibiciro ku masoko, ubwiyongere bw’amadeni ya Leta, ubushomeri n’ibindi byarushijeho gukara mu gihe cya Covid-19 n’intambara y’u Burusiya na Ukraine.

Inzobere zivuga ko David Cameron yakoze ikosa rikomeye ryo gusaba kamarampaka yo kwivana muri EU kuko yatumye igihugu kibura umurongo kandi kuzagishakira indi nzira bikazagorana. Muri make, abaminisitiri babanjirije Cameron boroherwaga n’uko hari imirongo yari yarashyizweho.

Umwarimu muri Kaminuza ya Queen Mary i Londres, Tim Bale, yavuze ko abaminisitiri b’Intebe bari kujyaho kuri ubu mu Bwongereza, bicwa no gutanga amasezerano y’ibyo bazakora bidashoboka.

Aganira na NPR yagize ati “Ni imigani igusha neza imitima y’Abongereza bashingiye ku mateka meza igihugu cyanyuzemo mu myaka yatambutse, bakibwira ko ari nako bigomba kugenda ukurikije ubuzima turimo ubu.”

Uyu mugabo uri kwandika igitabo The Conservative Party After Brexit, yavuze ko uburyo u Bwongereza bukoresha amafaranga menshi bukagira n’imisoro ihanitse, bigoye ngo bubashe guhaza ibyifuzo by’abaturage bakeneye ubuzima bwiza muri byose.

Ati “Ntabwo warota kugira ubuzima nk’ubw’ibihugu byo muri Scandinavie ufite imisoro nk’iyo muri Leta Zunze Ubumwe za Amerika.”

Patrick Dunleavy wigishije muri London School of Economics, avuga ko uburyo Ishyaka ry’aba-Conservateurs ritoranyamo abariyobora ari nabo batorerwa kuba Minisitiri w’Intebe, nabyo ari ikibazo gikomeye.

Yavuze ko iyo Minisitiri w’Intebe amaze gutoranywa n’Inteko, ari we wishyiriraho Guverinoma agashyiramo abantu ashaka, hatabayeho kubanza kubigaho nkuko muri Amerika bikorwa.

Ngo ibyo bituma hari abashyirwa mu myanya nta bunararibonye bafite muri politiki cyangwa kuri iyo myanya, nkuko byagendekeye Kwasi Kwarteng wari Minisitiri w’Imari ku ngoma ya Liz Truss. Imyanzuro bafata nayo igira uruhare mu kuzambya ibintu aho kubyoroshya.

Dunleavy yavuze ko ikindi giteye inkeke ari uko hari imyanzuro ku miyoborere y’aba-Conservateurs ifatwa n’abantu bashaje bafite uko bumva ibintu, bitandukanye n’uko benshi mu Bongereza bameze.

Umwanya wa Minisitiri w'Intebe mu Bwongereza umaze igihe ntawe uwumaramo kabiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .