U Bushinwa, icyanzu Afurika izahungiramo ubukoroni n’uburiganya bwa gashakabuhake

Yanditswe na Shaba
Kuya 5 Nzeri 2014 saa 04:52
Yasuwe :
0 0

Ibikorwa by’u Bushinwa muri Afurika bikomeje kwisukiranya mu mutuzo n’ubwumvikane hagati yabwo n’ibihugu byinshi by’uyu mugabane, mu gihe wari umenyereye gupfukamiriza imbere y’ibihugu byateye imbere byo mu Burengerazuba bw’Isi, usaba ubufasha ukabuhabwa bugeretseho agasuzuguro, gutegekwa ibintu runaka bagomba guhindura mu mikorere n’andi mategeko adafatika.
Umubano w’Afurika n’ibihugu byateye imbere mu myaka 400 ishize waranzwe n’amateka y’ubucakara, ubukoroni ndetse no kwivanga muri politiki (...)

Ibikorwa by’u Bushinwa muri Afurika bikomeje kwisukiranya mu mutuzo n’ubwumvikane hagati yabwo n’ibihugu byinshi by’uyu mugabane, mu gihe wari umenyereye gupfukamiriza imbere y’ibihugu byateye imbere byo mu Burengerazuba bw’Isi, usaba ubufasha ukabuhabwa bugeretseho agasuzuguro, gutegekwa ibintu runaka bagomba guhindura mu mikorere n’andi mategeko adafatika.

Umubano w’Afurika n’ibihugu byateye imbere mu myaka 400 ishize waranzwe n’amateka y’ubucakara, ubukoroni ndetse no kwivanga muri politiki z’abandi no gutezamo imvururu.

Imfashanyo ibi bihugu biha Afurika ziza zigeretseho amategeko n’ibindi byihishe inyuma bidindiza iterambere ry’umugabane kandi n’abagerageje kuvugira ahagaragara ko bamaganye agasuzuguro k’ibi bihugu birangira bibasiwe.

Mu nama ya Banki Nyafurika Itsura Amajyambere iherutse kubera mu Rwanda, Perezida Paul Kagame yagaragaje impamvu ibihugu byateye imbere byogera uburimiro ku mugabane w’Afurika uko byishakiye.

“Ibihugu bya Afurika bikomeje gushukwa kubera ubukene bw’akarande butahacika, kugeza n’aho ibihugu by’u Burayi biza muri Afurika bikareba abayobozi bishyiriweho n’abaturage ubwabo, bikavuga ko bitabashaka bigashyiraho abo byishakiye, ibi byose biterwa n’ubukene buvamo ibishuko no kubeshywa”.

Ibihugu byo muri EAC byasinyanye n'u Bushinwa kubaka umuhanda wa gari ya moshi

Zimbabwe yashyizwe mu kato bituma igwa mu bukene kuko Perezida Robert Mugabe yirukanye Abongereza bari barigaruriye ubutaka bwacyo. Muri iyi minsi ariko, Mugabe ashyize ingufu mu gushimangira umubano wa Zimbabwe n’ u Bushinwa kandi akemeza ko afite icyizere ko igihugu cye kizongera kubura umutwe.

Amateka y’umubano w’u Bushinwa n’ibihugu bya Afurika

Umubano w’u Bushinwa na Afurika watangiye bigaragara mu ntangiriro z’ikinyejana cya 20 ubwo bwavaga mu ntambara maze bukayoborwa na Mao Zedong. Ibikorwa by’u Bushinwa muri Afurika byari bike cyane kugeza mu mpera z’icyo kinyejana.

Guhera mu myaka y’1990, ubucuruzi hagati y’u Bushinwa n’Afurika bwikubye inshuro zirindwi bituma kuri ubu iki gihugu ari cyo kiyoboye ubucuruzi bukorerwa hagati yacyo n’Afurika.

Abanditsi Mathews, Gordon na Yang Yang bagaragaza ko Abanyafurika barenga ibihumbi 200 baba mu Bushinwa n’Abashinwa barenga miliyoni bakaba batuye muri Afurika.

Umubano urangwa n’ibikorwa byinshi n’amagambo make

Muri Gicurasi, u Bushinwa bwageneye miliyari 12 umugabane w’Afurika ndetse bwemera no gutera inkunga ingana na 90% (ihwanye na miliyari 3.8 z’amadorali) imirimo y’icyiciro cya mbere cyo kubaka umuhanda wa gariyamoshi uzaba uhuje ibihugu byinshi byo muri Afurika y’Iburasirazuba.

Mu nama y’Isi yose ku bucuruzi yabereye muri Nigeria muri Gicurasi, Minisitiri w’Intebe w’u Bushinwa Li Keqiang yavuze ko u Bushinwa butazigera bwivanga na gato muri politiki z’ibihugu butera inkunga.

Abasesengura ibya politiki y’u Bushinwa muri Afurika basanga inama nyinshi zihuza abayobozi babwo n’ab’ibihugu bya Afurika aba ar’iz’ubucuruzi, aho baba bashyira umukono ku masezerano runaka areba ibikorwa remezo n’ibindi.

Mu gihe izibahuza n’ibihugu by’u Burayi ziba ziganjemo kubanenga no kubabwira ibyo bagomba kubahiriza mbere yo kubatera inkunga.

Perezida wa Zimbabwe, Robert Mugabe, yatewe umugongo n'Abanyaburayi yegera u Bushinwa mu kuzamura ubukungu bw'igihugu cye

U Bushinwa bwaba nabwo buruma buhuha

Umwanditsi Howard French mu gitabo yise “China’s Second Continent”, agaragaza neza ko u Bushinwa bushaka kwigarurira Afurika gahoro gahoro, avuga ko Abashinwa barenga za miliyoni bamaze kugura ubutaka muri Afurika kandi badateganya gusubira iwabo.

French asobanura ko Abashinwa bamaze kuzura mu gihugu cyabo (ni nabo benshi ku Isi) bityo ingamba zo kuboneza urubyaro n’izo guhotora abana b’abakobwa bavutse kugira ngo batazaba imburamukoro zikaba zitagikemura ikibazo cy’ubwiyongere bukabije.

Anerekana ko ari yo mpamvu Abashinwa benshi bashyigikirwa na leta yabo bakaza bitwaje kubaka imihanda, ibiraro n’ibindi bikorwa remezo nyamara mu by’ukuri benshi muri bo badateganya kuzasubirayo mu gihe akazi kabo karangiye.

Ibyo ari byose nta wakwirengagiza kuvuga ko mu mwaka ushize, ubucuruzi Leta Zunze Ubumwe za Amerika zagiranye n’ibihugu bya Afurika bwari buhagaze kuri miliyari 85 z’amadorali mu gihe ubwo Afurika yagiranye n’u Bushinwa bwarengaga miliyari 200.

Aha ni ho bamwe bahera bavuga ko ibikorwa by’u Bushinwa mu myaka 15 ishize biruta kure iby’ibihugu byateye imbere byo mu Burengerazuba bw’Isi mu myaka 400 ishize.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza