00:00:00 IGIHE NETWORK KN KINYARWANDA EN ENGLISH FR FRANCAIS

Induru ku munwa ubwo Mobutu yabwirwaga ko Habyarimana yapfuye

Yanditswe na Ferdinand Maniraguha
Kuya 13 May 2022 saa 07:38
Yasuwe :

Ubwo Falcon50, indege ya Perezida Juvénal Habyarimana yahanurwaga ku mugoroba wo kuwa 6 Mata 1994, hari hashize iminsi ibiri akubutse mu Mujyi wa Gbadolite, uherereye mu Majyaruguru ya Zaïre.

Urwo rugendo rwari rugamije guhura n’inshuti ye yayoboraga Zaïre, Maréchal Mobutu Sese Seko. Umubano wabo ntabwo ari ubushuti busanzwe umwe w’abakuru b’ibihugu, ahubwo warengaga aho kugeza aho Habyarimana yitaga Mobutu “Grand-frère’ undi akamwita ‘Meilleur ami’.

Habyarimana yari yugarijwe muri iyo minsi. Imbere mu gihugu politiki byari ibicika, ahanganye n’ibyegera bye n’abo mu muryango we bari bari mu cyiswe ‘Akazu’ bashakaga gukomeza kugenzura igihugu uko babyumva, n’amashyaka atavuga rumwe na Leta yashakaga ko ahagarika gucunga igihugu uko abyumva.

Amasezerano ya Arusha yasinywe muri Kanama 1993 yari yabihaye umurongo, yerekana uburyo ubutegetsi bugomba gusaranganywa amahoro agahinda mu gihugu. Ayo masezerano Habyarimana yarinze apfa atarashyirwa mu bikorwa.

Habyarimana yagiye i Gbadolite tariki 4 Mata, hashize umunsi umwe aririye Pasika ya nyuma ku Gisenyi ku nkengero z’ikiyaga cya Kivu.

Icyari cyajyanye Habyarimana i Gbadolite kwari ukugisha inama inshutu ye Mobutu. Ibibazo byari bimukomereye wari umutekano we bwite kuko yari amaze iminsi ahabwa ibimenyetso ko isaha n’isaha ashobora kwicwa.

Honoré Ngbanda yahoze ari Umujyanama wihariye wa Perezida Mobutu Sese Seko mu by’umutekano. Yakurikiraniraga hafi inama shebuja yagiranaga n’abandi bakuru b’ibihugu ndetse ni na we Mobutu yari yahaye ikiraka cyo kuza mu Rwanda gukora isesengura ry’icyo bakorera Habyarimana ngo yizere umutekano we.

Mu bindi byari byamujyanye harimo gusaba Mobutu kuzamuherekeza muri Tanzania mu nama yagombaga kwiga ku bibazo byo mu karere birimo n’amasezerano ya Arusha u Rwanda rwari rumaze iminsi rusinye n’amashyaka ya politiki.

Honoré Ngbanda yanditse igitabo “Les derniers jours du Maréchal Mobutu”, aho agaruka ku minsi ya nyuma ya Mobutu ndetse n’iya nyuma ya Habyarimana ubwo yari i Gbadolite.

Ngbanda wapfuye mu 2021 ni umwe mu banyapolitiki b’abanye-Congo bari bazwiho imvugo zigamije kwatsa umuriro hagati y’umubano wa Repubulika Iharanira Demokarasi ya Congo n’u Rwanda rwa nyuma ya Jenoside yakorewe Abatutsi, ahanini abitewe n’uko u Rwanda rwagize uruhare mu gukuraho shebuja Mobutu Sese Seko mu 1997.

Habyarimana ubwo yajyaga kureba Mobutu Gbadolite, ngo yasaga nk’unaniwe kandi ahangayitse cyane.

Uruzinduko rwa Habyarimana na Mobutu ntabwo rwamaze igihe kinini ariko baganiriye ku bibazo bitandukanye birimo n’icyo cy’umutekano.

Mobutu na Habyarimana bari inshuti z'akadasohoka

Ntabwo Mobutu yigeze yitabira inama ya Dar es Salaam nk’uko yari yabyemereye Habyarimana ngo kuko inzego ze z’ubutasi zari zamuhaye amakuru ko indege ye nayo ishobora guhanurwa.

Tariki 6 Mata 1994 umunsi Habyarimana yapfiriyeho, Mobutu yari ari mu ruzinduko mu gace ka Abuzi gaherereye mu bilometero bisaga 270 uvuye mu mujyi wa Gbadolite.

Mu gitabo cya Ngbanda avuga ko muri ako gace Mobutu yagombaga kuhamara iminsi ibiri, asura abaturage ngo aganire nabo ari nako ahakirira bamwe mu bashyitsi.

Baramwishe!...

Ku mugoroba wa tariki 6 Mata, Mobutu yasangiye na bamwe mu bayobozi muri Leta ye harimo na Ngbanda wari umujyanama we.

Mu gitabo Ngbanda agira ati “Ku mugoroba twasangiye ibiryo by’umugoroba duseka. Perezida Mobutu yakundaga gutera urwenya mu gihe ari ku meza. Marechal yaje kumpa ikimenyetso ambwira ko agiye mu cyumba cye kuryama. Nagumye aho ku ibaraza nisomera Bibiliya.”

Mu gihe Mobutu yari agiye kuryama, indege ya Habyarimana nibwo yari imaze kuraswa igiye kugwa ku kibuga cy’indege i Kanombe.

Iyo ndege yaguyemo Perezida Habyarimana na Cyprien Ntaryamira w’u Burundi n’abandi 11 bose bari bayirimo.

Mobutu wari mu bitotsi, yashigukiye hejuru ubwo yahamagarwaga abirwa ko Habyarimana yishwe.

Ngbanda ati “Hashize iminota mike, umutima wanjye wabaye nk’uhagaze ubwo numvaga Perezida asakuza ahamagara izina ryanye ariko arwana no gusohoka. Nabanje gukeka ko yaba abonye inzoka dore ko twari turi mu gace k’amashyamba y’inzitane hakunze kuboneka inzoka. Inzoka ni imwe mu nyamaswa Marechal yatinyaga cyane ku Isi.”

“Nirutse ngana aho yari aryamye ndetse twari tugonganiye ku rugi. Perezida yasohotse avuza indura avuga muri Lingala ati “Babomi yee! Bato oyo babomi yee! (Baramwishe! Ba bantu baramwishe)”.

Umutima wa Mobutu ntabwo wari utuje, ndetse ngo yagaragazaga ubwoba. Ngbanda bari bari kumwe avuga ko bamaze akanya ntawe uvugisha undi, yahindukira akabona amarira ashoka ku maso ya Mobutu.

Mobutu yagize ati “Baramwishe bariya bagizi ba nabi, ndabizi neza ntabwo yari kuzabacika.”

Mu bigaragara, Habyarimana yari yarahishuriye Mobutu amakuru y’abo akeka bashaka kumuhitana ariko abo bombi nta wundi bari barabibwiye.

Mobutu amaze gucururuka, yavuze ko ibigiye gukurikiraho ari bibi. Ati “Hagiye gukurikiraho ibintu bibi. Ni intangiriro y’amateka mabi gusa! Afurika y’Iburasirazuba iri mu kaga.”

Mobutu yavuze ko azakora ibishoboka byose hagakorwa iperereza mpuzamahanga ku rupfu rwa Habyarimana, nubwo nyuma y’imyaka itatu na we yapfuye atarabikora.

Iryo joro ngo Mobutu yaraye arira, bucya yurira indege imusubiza Gbadolite aho gukomeza uruzinduko yari yemereye abaturage ba Abuza.

Yatumye ku bayobozi kujya kumubwirira abaturage ko atakije kubera impamvu zitunguranye.

Ubwo ingabo za Leta yakoraga Jenoside mu Rwanda zakubitwaga inshuro, umurambo wa Habyarimana wahungishirijwe kwa Mobutu akomeza kuwubika kugeza mu 1997 ubwo yasumbirizwaga n’ingabo za Laurent Desire Kabila, agafata umwanzuro wo gutwikisha uwo murambo nk’uko biri mu gitabo La Traversée cy’umwanditsi w’Umufaransa, Patrick de Saint-Exupéry.

Iperereza ryakozwe n’abacamanza Marc Trévidic na Nathalie Poux ku wahanuye indege ya Habyarimana nyuma yo kugera aho byabereye, ryagaragaje ko ‘abahezanguni babiri’, "ba Colonel [Théoneste] Bagosora wahoze ayobora Ibiro bya Minisitiri w’Ingabo na [Laurent] Serubuga’ ari bo batanze itegeko ryo guhanura indege ya Habyarimana.

Inkiko zo mu Bufaransa zari zifite dosiye yo gukurikirana ukuri ku ihanurwa ry’iyi ndege nazo ziherutse kurisoza burundu, nyuma yo kubura ibimenyetso simusiga biganisha ku waba yarayihanuye.

Mobutu yafashwe n'ikiniga ubwo bamubwiraga ko Habyarimana yapfuye
Ubwo Perezida Juvénal Habyarimana yakirwaga na Mobutu ku Kibuga cy’Indege cya Kinshasa yitabiriye Inama y’Abakuru b’Ibihugu bigize CEEAC muri Gashyantare 1988

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .