00:00:00 IGIHE NETWORK KN KINYARWANDA EN ENGLISH FR FRANCAIS

Incamake ku mateka ya AU Perezida Kagame azayobora mu 2018

Yanditswe na David Eugène Marshall
Kuya 14 Ukuboza 2017 saa 04:55
Yasuwe :
1 0

Umuryango wa Afurika Yunze Ubumwe (AU) wakomotse mu bitekerezo by’abategetsi babayeho mu myaka ya za 1960 ku isonga hari abagabo bazwi cyane nka Kwame Nkrumah wayoboraga Ghana ndetse na Haile Selassie wayoboraga Ethiopia n’abandi.

AU ifite icyicaro i Addis Ababa, umurwa mukuru wa Ethiopia, aho ikorera mu nyubako ikomeye cyane izwi nka “African Union Conference Complex” AUCC, yatashywe kuwa 28 Mutarama 2012 ubwo hateranaga Inteko rusange y’uyu muryango ku nshuro ya 18.

Ni inyubako yubatswe ku nkunga y’u Bushinwa, yuzuye itwaye akayabo ka miliyoni 200 z’amadolari y’Amerika.

Iyi nyubako y’amagorofa 20 kandi ifite icyumba cy’inama gishobora kwakira abantu 2500 bicaye neza, ni imwe mu nyubako zikomeye kandi zirinzwe cyane muri Ethiopia.

Inzego nk’Inteko Ishinga Amategeko ya AU na Komisiyo y’Uburenganzira bwa muntu, ntizikorera i Addis Ababa. Akanama gashinzwe uburenganzira bwa muntu gakorera i Banjul muri Gambia, naho ,mu gihe Inteko igakorera muri Midland-Johannesburg muri Afurika y’Epfo.

AU iyobowe na Perezida Alpha Condé wa Guinea, akaba ari we uzaba ubuyobozi Perezida Paul Kagame w’u Rwanda mu ntangiriro za 2018.

Kugira ngo umuyobozi utahiwe kuyobora AU atinjira mu mirimo ye asa n’udafite amakuru ahagije kuri uwo mwanya, uyu muryango washyizeho uburyo bw’uko ugiye kuyiyobora abanza kuba umwe mu bafatanya n’uwari uriho. Ibi bigatuma atangira inshingano azi ibibazo byose azahura nabyo mu byari bisanzwe kandi bikanamufasha gukomereza aho ucyuye igihe yari agejeje.

Uko igitekerezo cyo gushinga AU cyaje

Ku ikubitiro abakuru b’ibihugu bagize uruhare mu gushyiraho Ihuriro ry’Abakuru b’ibihugu bise « Union Of African Heads Of States ». Nyuma gato kuwa 25 Gicurasi 1963 ryaje kubyara Umuryango w’Ubumwe wa Afurika, OUA.

Igitekerezo cyo gushinga AU gitandukanye na OUA yatangiye ahagana mu 1990, kizamuwe n’uwari Perezida wa Republika ya Jamahiriya ya Libya, Col. Mouammar al-Gaddafi.

Byari mu nama y’abakuru b’ibihugu by’Afurika yaberaga mu mujyi wa Sirte muri Libya. Gaddafi yongeye kuzamura igitekerezo cy’uko harebwa uburyo bushya hashingwa Afurika Yunze Ubumwe.

Kuwa 9 Nzeri 1999, nibwo Inteko y’abakuru b’ibihugu bya Afurika n’abakuru ba za Guverinoma ba OUA yemeje Itangazo ryashyiragaho bidasubwirwaho ishingwa rya AU ryiswe “Sirte Declaration”.

Inteko rusange ya AU iterana kabiri mu mwaka

Mu mwaka wakurikiyeho mu 2000, nibwo i Lomé muri Togo hemerejwe burundu icyiswe iremezo ry’umushinga w’itegeko rishyiraho AU. Uyu mushinga waje kwemezwa burundu i Lusaka muri Zambia mu 2001 .

Hahisehanashyirwagaho umugambi karundura w’ubufatanye mu iterambere rya Afurica (NEPAD) mu magambo ahinnye y’icyongereza, wari ufite mu ntego zawo kwihutisha imigambi y’iterambere ry’umugabane w’Afurika.

Iryo terambere ryagombaga gushingira ku kubaka ibikorwaremezo bihanitse ndetse no kubaka ubufatanye hagati y’ibihugu byose bigize Afurika kugira ngo ibyo byose bigerweho nta nkomyi .

Kuwa 9 Nyakanga 2002, nibwo Thabo Mbeki wayoboraga Afurika y’Epfo wari n’Umuyobozi wa AU yatangije ibikorwa bya mbere by’Inteko Ishinga Amategeko y’umuryango, bibera ku cyicaro cyayo kiri muri Midland ,Johannesburg muri Afrika y’Epfo .

Umwaka wakurikiyeho byabereye i Maputo muri Mozambique ndetse na Addis Ababa muri Ethiopia mu 2004.

Muri imwe mu mishinga yindi yo ku rwego rwo hejuru uyu muryango wari ushyize imbere kwari ugushinga Ikigo cy’Afurika gishinzwe iby’isanzure,The African Space Agency, umushinga wavuzwe guhera mu 2010 ariko utarashyizwe mu bikorwa.

Barack Obama yaba Perezida wa mbere wa Leta Zunze Ubumwe za Amerika wavugiye ijambo mu Nteko ya AU. Mu byo yavugiyeyo harimo no kunegura ibihugu bifite demokarasi icumbagira, ntibyite ku cyahindura ubuzima bw’Abanyafurika.

AU igendera ku ntego 14 zikurikira

1. GUharanira ubumwe hagati y’ibihugu by’Afurika n’Abanyafurika bose muri rusange

2. Kurinda ubusugire n’ukwishyira ukizana kw’ibihugu biwugize hamwe no kubahiriza ubwigenge busesuye bwa buri gihugu kinyamuryango.

3. Guteza imbere ukwishyira hamwe kw’ibihugu mu turere bibarizwamo, no gusangira imico igamije kubaka ubukungu hagati y’abaturage b’Afurika.

4. Guharanira inyungu z’Afurika n’abayituye .

5. Guteza imbere Ububanyi n’amahanga, hubahiriza amasezerano Loni iba yarashyizeho mu rwego rwo kurengera uburenganzira bwa muntu n’andi mategeko

6. Guharanira amahoro n’umutekano n’ituze ku mugabane w’Afurika

7. Kubahiriza amahame ya demokarasi n’ishyirwaho ry’inzego, abaturage babigizemo uruhare

8. Guharanira uburenganzira bwa muntu nk’uko byemejwe na AU n’indi miryango iburengera

9. Gushyiraho uburyo buhoraho AU yajya igira uruhare rufatika mu gufata ibyemezo by’ubukungu bw’Isi ndetse no mu byemezo mpuzamahanga

10. Guteza imbere ibikorwa by’amajyambere arambye ndetse no kurebera hamwe uburyo imiryango y’ubukungu ihuje uturere tw’Afurika yarushaho gutera imbere

11. GUharanira ubufatanye mu guteza imbere abaturage no gukomeza kuzamura ireme ry’imibereho yabo

12. Guhuza no kwihutisha ishyirwa mu bikorwa ry’ingamba zafashwe mu buryo buboneye buri wese mu batuye Afurika

13. Guteza imbere ibikorwa by’ubushakashatsi mu ikoranabuhanga bigamije iterambere ry’umugabane w’Afurika

14. Gukorana bya hafi n’imiryango nterankunga mu by’ubuzima ,mu rwego rwo kurwanya ibyorezo no guhashya indwara hagamijwe kubumbatira ubuzima bwiza mu baturage ba Afurika

Bimwe mu bibazo bihora ku isonga ku muyobozi wese uba agiye kuyobora AU, hakunze kugaragaramo icy’umutekano muke uba uri muri bimwe mu bihugu bigize uyu mugabane, kimwe n’ibindi bibazo byambukiranya umugabane nk’icy’abimukira bahora bashyugumbwa kujya i Burayi, ibibazo by’indwara z’ibyorezo n’ibindi.

Imitegekere ya AU

AU ifite:

* Akanama nshingwabikorwa kagizwe n’Inteko y’abaminisitiri b’ububanyi n’amahanga, bategura imishinga y’ibyemezo biba bizemezwa n’inteko rusange y’abakuru b’ibihugu na za Guverinoma, inama iba kabiri mu mwaka.

* Komite ihoraho y’abahagarariye ibihugu byabo muri AU i Addis Ababa.

* Akanama ngishwanama mu by’ubukungu, gashinzwe imibereho myiza n’umuco, kagizwe n’urwego rwa sosiyete sivile.

Uretse izo nzego, hari na Komisiyo ya AU, ubu iyobowe na Moussa Faki Mahamat wo muri Tchad. Iyi komisiyo iba ishinzwe guhuza ibikorwa by’imirimo ya AU.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .