00:00:00 IGIHE NETWORK KN KINYARWANDA EN ENGLISH FR FRANCAIS

Impamvu iryinyo rya Lumumba aricyo gice cy’umubiri we gisigaye

Yanditswe na IGIHE
Kuya 20 June 2022 saa 10:15
Yasuwe :

Kuri uyu wa Mbere, u Bubiligi bwasubije Repubulika Iharanira Demokarasi ya Congo, iryinyo ry’umwe mu bana bayo bagize uruhare mu kugera ku bwigenge, Patrice Emery Lumumba.

Ni urugendo rw’imyaka isaga 60, abenshi mu Banye-Congo n’Umuryango wa Lumumba bari bamaze batazi irengero ry’umwe mu babaye Minisitiri w’Intebe mu bihe bikomeye, nubwo politiki mpuzamahanga itamuhaye agahenge ko kugaragaza icyo yari ashoboye.

Iryinyo rya Lumumba wishwe afite imyaka 34, ni cyo gisigazwa cy’umubiri we gisigaye kugeza ubu, nyuma y’uko ibindi byose bitwitswe muri acide bikozwe ku kagambane k’u Bubiligi na Leta Zunze Ubumwe za Amerika.

Lumumba yagizwe Minisitiri w’Intebe wa Congo ubwo bari bari mu minsi ya nyuma y’ubukoloni bw’u Bubiligi. Ni umwe mu bavugaga rikijyana icyo gihe kandi utarajyaga imbizi n’imyitwarire y’Ababiligi mu myaka yose bari bamaze muri Congo.

Tariki 30 Kamena 1960, umwami w’u Bubiligi Baudouin, yaje kwifatanya n’Abanye-Congo kwizihiza umunsi wabo wa mbere w’ubwigenge.

Yavuze imbwirwaruhame ndende, ashimagiza uburyo igihugu cye cyazanye urumuri muri Congo y’umwijima, bagasirimura abaturage bafatwaga nk’injiji, none bakaba bageze aho babaha ubwigenge.

Baudouin yashimagije cyane abakurambere barimo Umwami Leopold II watwaye Congo imyaka isaga 30 nk’akarima ke, akica abasaga miliyoni eshanu abandi akabaca amaboko, abaziza ubusa.

Mu gihe Baudouin yavugaga ijambo, Lumumba yari yicaye hafi aho, umujinya wamwishe, akubita agatoki ku kandi. Ibyo yifuzaga kumva ku bayobozi b’u Bubiligi si byo yumvise.

Yifuzaga ko basaba imbabazi z’imyaka y’agahinda n’umubabaro bazanye muri Congo, bagatanga icyerekezo kirimo icyiru ku hazaza h’icyo gihugu kiri rwagati muri Afurika.

Uwo munsi ntabwo Lumumba byari biteganyijwe ko aza kuvuga ijambo, Perezida Joseph Kasavubu ni we wari kuri gahunda.

Mu gihe ibirori byasaga n’ibigiye kurangira, Lumumba yarahagurutse yiha ijambo, atangira imbwiraruhame yari yanditse ku mpapuro zisanzwe.

Byatunguye Ababiligi bari aho, Kasavubu na we agwa mu kantu, bose basigara biteze ijambo riryana mu matwi y’Ababiligi, kuko buri wese mu bari aho, yari azi neza Lumumba ku kutarya iminwa.

Yavuze byinshi acyurira ababiligi n’umwami wabo wari aho, asoza avuga ko ari agahinda kuba baticuza ubucakara bashyize ku banye-Congo ku gahato.

Mu gihe abaturage bamuhaga amashyi y’urufaya, isura y’Umwami Baudouin n’ababiligi bari aho yari yatukuye, umujinya ari wose ariko barihangana barataha.

Lumumba yabwiye Ababiligi ko atazakorana nabo mu gihe cyose batemera akaga bakururiye Congo

Ludo De Witte wanditse igitabo ku rupfu rwa Lumumba, yavuze ko bwari ubwa mbere Abanyaburayi babonye umwirabura utinyuka kububahuka mu ruhame, by’umwihariko bigakorwa na Lumumba bafataga nk’umujura w’ikigoryi, nkuko itangazamakuru ry’u Bubiligi ryakundaga kumwita.

Iri jambo kandi rifatwa nk’igihano cyo gupfa Lumumba yari amaze kwikatira, no guha Ababiligi impamvu ntakuka yo kumuhigira hasi kubura hejuru.

U Bubiligi bwashakaga gukomeza kugira akaboko muri Congo kandi ntibyashobokaga bakorana n’umuntu batumvikana.

Abanyamerika nabo bagize uruhare mu urupfu rwa Lumumba kuko yari ashyigikiye abasoviyeti, mu gihe muri iyo ntambara y’ubutita, gukorana n’abasoviyeti wabaga usinye kuba umwanzi w’Abanyamerika.

Urugendo rwo guhitana Lumumba rwamaze amezi arindwi uhereye umunsi avuga ijambo ryariye umwami w’u Bubiligi. Bakomeje kugenza ubuzima bwe, aba Minisitiri w’Intebe uriho atariho.

Igihugu kikibona ubwigenge, cyatangiye kwadukamo intambara za hato na hato z’abashakaga kwiyomora. Aho byari bikaze cyane ni mu ntara ya Katanga iri mu Majyepfo ashyira Uburengerazuba, izwiho kuba ikize ku mabuye y’agaciro.

Muri iyi ntara hari hatangiye inyeshyamba zisaba ko yigenga, ntikomeze kwitwa igice cya Congo.

Ingabo z’u Bubiligi zoherejwe muri Katanga zifite inshingano zo kurinda Ababiligi bari bahari ariko zagize uruhare rukomeye mu gufasha Abanya-Katanga, kuko abashakaga ubwigenge bwaho, bumvaga neza u Bubiligi kurusha Guverinoma ya Lumumba.

Byakomeje kuzurungutana kugeza aho Lumumba yirukanywe ku mwanya wa Minisitiri w’Intebe. Col Joseph Mobutu wari umugaba w’ingabo ikarita ze yazikiniraga imbere, ariko ari mu barwanya Lumumba mu buryo bufatika.

Lumumba yaje gufungirwa iwe mu rugo, ashaka gutoroka aza gufatwa mu mpera z’Ukuboza 1960, arafungwa.

Kubera gukundwa n’abaturage, Ababiligi baje gusanga igihugu batazagishobora Lumumba akiri hafi y’ubutegetsi i Kinshasa, bamujyana muri Katanga kure kumufungirayo.

Mu ndege yamujyanye Katanga kuwa 16 Mutarama 1961, Lumumba yarasagariwe cyane ndetse agezeyo arakubitwa mu gihe Abanya-Katanga bari bagitekereza icyo bamumaza.

Ntabwo byatinze, bukeye bwaho kuwa 17 Mutarama hafashwe umwanzuro wo kwica Lumumba bamurashe urufaya rw’amasasu we n’abandi bantu babiri bari inshuti ze. Ni icyemezo cyahawe umugisha n’u Bubiligi ndetse na Amerika.

Lumumba ubwo yafatwaga n'ingabo za Congo zimushinja gutoroka, ari nabwo hatangiraga gutegurwa urupfu rwe

Uwari Komiseri wa Polisi muri Katanga, Soete unakomoka mu Bubiligi, yaje kubona ko umurambo wa Lumumba kuwushyingura cyangwa kuwushyira ahandi hantu, byazamenyekana, bikaba byateza akavuyo. Umwanzuro warafashwe, ko umurambo ushwanyaguzwa rimwe na rizima.

Soete yafashe acide sulfurique, ashaka abasore b’inkorokoro bamufasha kurohamo umubiri wa Lumumba, urashwanyagurika burundu.

Imyaka yabaye myinshi ntawe uzi irengero rya Lumumba, gusa bizwi ko yapfuye ariko aho yashyinguwe ntawe uhazi.

Mu mwaka wa 1999, mbere y’umwaka umwe ngo apfe, Soete yemeye ku mugaragaro ko yagize uruhare mu rupfu rw’umwe mu ntwari za Congo.

Umukobwa wa Soete, Godelieve, mu mwaka wa 2016 yavugiye mu binyamakuru byo mu Bubiligi, ko afite iryinyo rya Lumumba se yasigaranye ubwo bamwicaga.

Godelieve yavuze ko aterwa ipfunwe n’ibyo papa we yakoze, ndetse asaba ko ubuyobozi bw’u Bubiligi busaba imbabazi umuryango wa Lumumba.

Bimaze kumenyekana ko iryinyo rya Lumumba rihari, Polisi y’u Bubiligi yararifashe ndetse mu rubanza rwamaze imyaka ine, hemezwa ko risubizwa umuryango wa Lumumba.

Kuri uyu wa Mbere nibwo iryo ryinyo ryasubijwe Congo, mu cyubahiro gikwiriye intwari z’igihugu mu gihe hibukwa imyaka 61 ishize Congo ibonye ubwigenge.

Mbere yo gushyingura iryinyo rya Lumumba, rizabanza kugezwa mu bice bitandukanye by’igihugu, ahabwe icyubahiro akwiriye .

Mu Bubiligi naho ubushinjacyaha buri kwiga kuri dosiye y’abo bikekwa ko baba baragize uruhare mu rupfu rwa Lumumba, icyakora BBC yatangaje ko icumi muri 12 bakekwa bamaze gupfa.

Nyuma y'imyaka 60, u Bubiligi bwemeye gusubiza iryinyo rya Lumumba
Lumumba na Kasavubu bari inshuti ariko baje gushwana bamaze kugera ku butegetsi
Lumumba ni umwe mu banyapolitiki bari bakunzwe n'abaturage mu gihe cye
Aha abagore bo muri Ghana bari bari kwigaragambya bamagana iyicwa rya Lumumba
Lumumba yabaye Minisitiri w'Intebe wa Congo igihe gito
Lumumba yari yaranze gukorana n'Ababiligi mu gihe batagaragazaga kwicuza no gusaba imbabazi
Muri Kamena 1960 ubwo mu Nteko ya Congo hatorwaga abagize Guverinoma na Leta y'inzibacyuho
Aha Lumumba na Kasavu bari bagiye ku cyicaro cya Loni muri Amerika
Lumumba abazungu bamwangiraga kutabubaha no gukorana n'abasoviyeti

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .