USA: Sena yemeje Ambasaderi mushya mu Rwanda

Yanditswe na

IGIHE

Kuya 19 Ugushyingo 2014 saa 08:22
Yasuwe :
0 0

Sena y’Amerika yemeje kuri uyu wa Mbere ko Erica J. Barks Ruggles uheruka gushyirwaho na Perezida Obama, aba Ambasaderi mushya wayo mu Rwanda, bisobanuye ko ashobora guhita atangira imirimo ye.
Madamu Ruggles yatorewe kuba Ambasaderi wa USA mu Rwanda muri Nyakanga asimbura Ambasaderi Donald Koran. Kuva mu 2011 yakoraga muri Ambasade y’Amerika muri Afurika y’Epfo.
Inyandiko iri ku rubuga rushyirwaho amakuru y’ibikorwa bya Sena ya Amerika rugaragaza ko Barks Ruggles yemerejwe rimwe n’abandi ba (...)

Sena y’Amerika yemeje kuri uyu wa Mbere ko Erica J. Barks Ruggles uheruka gushyirwaho na Perezida Obama, aba Ambasaderi mushya wayo mu Rwanda, bisobanuye ko ashobora guhita atangira imirimo ye.

Madamu Ruggles yatorewe kuba Ambasaderi wa USA mu Rwanda muri Nyakanga asimbura Ambasaderi Donald Koran. Kuva mu 2011 yakoraga muri Ambasade y’Amerika muri Afurika y’Epfo.

Inyandiko iri ku rubuga rushyirwaho amakuru y’ibikorwa bya Sena ya Amerika rugaragaza ko Barks Ruggles yemerejwe rimwe n’abandi ba Ambasaderi bane nabo bagomba guhagararira Amerika mu bihhugu birimo Repubulika Iharanira Demokarasi ya Timor, Vietnam, na Leta Zunze Ubumwe za Emirates n’u Rwanda.

Bivugwa ko abandi 60 na bo bazahagararira Amerika mu bindi bihugu bakazemezwa mu mezi ari imbere.

Ubwo yamushingaga iyi mirimo, Perezida Obama wa Amerika yagize ati “Impano n’ubunararibonye bw’abangaba bizatuma igihugu cyacu kibona serivisi nziza. Nishimiye ko bose bemeye gukorera igihugu, kandi niteguye gukorana na bo mu minsi iri imbere.”

Sena ya Amerika yemeje Erica J. Barks Ruggles nka Ambasaderi wayo mu Rwanda

Barks Ruggless wavukiye muri Leta ya Minnesota, afite impamyabushobozi yakuye mu ishuri rya Swarthmore College.

Kuva mu 1992 yinjiye muri politike aho yagiye ahabwa imyanya itandukanye muri serivisi za Leta cyane cyane mu bijyanye n’ububanyi n’amahanga.

Barks Ruggles yize muri ishuri rya Swarthmore hanze ya Philadelphia. Yabonye impamyabumenyi ya Kaminuza mu 1989 mu Bumenyamuntu n’ubuvanganzo bw’Icyongereza. Akazi ka mbere yakoze ni ak’ubwunganizi mu by’amategeko mu kigo cy’amategeko cya Washington.

Barks Ruggles, uvuga Igifaransa n’Icyongereza adategwa, yageze bwa mbere muri Afurika mu 1991 ubwo yatemberanaga n’uwagombaga kuzaba umugabo we, Taylor Ruggles, nawe wakora mu bubanyi n’amahanga. Uwo mwaka nibwo yahise yinjira mu gukorera Leta.

Umurimo uhambaye yakoze bwa mbere ni ubwo yari Yungirije uhagarariye inyungu za Amerika muri Chennai (Madras) mu Buhinde. Mu 1994 yasubiye i Washington, ahabwa umwanya mu biro bishinzwe gukurikirana ibikorwa byo muri Afurika. Yaje gusubira mu buyobozi bwa Leta mu 1999 aba Umunyamabanga wa Leta wihariye wungirije ushinzwe politiki.

Mu 2000, Erica J. Barks Ruggles yoherejwe mu kigo cyitwa Brookings nk’umwe mu nzobere mu by’ububanyi n’amahanga. Yateguye ibiganiro ku ngaruka z’ubukungu ziterwa na Virusi itera SIDA muri Afurika.

Nyuma y’umwaka umwe, yoherejwe i Burayi i Oslo muri Norvege aho ahagarariye Amerika mu bijyanye n’ubukungu.

Yasubiye i Washington mu 2004, agirwa umwe mu bagize Guverinoma mu gashami gategura ibirebana n’ibihugu by’Uburasirazuba bwo hagati. Mu 2005 Barks Ruggles yagizw Umuyobozi wungirije Umunyamabanga wa Leta ushinzwe Demokarasi, Uburenganzira bwa Muntu n’Umurimo.

Ari kuri uwo mwanya, yitaga cyane ku birebana na Arabia Saudite, Iran, ibibazo bya Israel na Parestina, Jordan, Egypt, Syria na Lebanon. Mu 2008 abisabwe n’abayobozi bakuru be yakoze raporo ku burenganzira bwa muntu muri Korea y’Amajyaruguru.

Kuva mu 2009 kugeza mu 2011 Barks-Ruggles yungirije Ambasaderi wa USA muri Loni, Susan Rice, mu biro bye i Washington. Mu 2011 nibwo yagiye kuba muri Afurika y’Epfo i Cape Town nk’uhagarariye inyungu za USA. Icyo gihe umugabo we yakoraga nk’ibyo nawe mu mujyi wa Durban muri Afurika y’Epfo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .