Uganda yongereye imbaraga mu gufasha RNC gupfunda imitwe

Yanditswe na Musangwa Arthur
Kuya 23 Ugushyingo 2020 saa 11:26
Yasuwe :
0 0

Nyuma y’iminsi myinshi y’ibikorwa ubutegetsi bwa Uganda bukomeje gukora bigamije guhungabanya umutekano w’u Rwanda, amakuru yemeje ko Frank Ntwari uri mu bayobozi b’umutwe wa RNC wa Kayumba Nyamwasa, ari muri Uganda mu bikorwa byo kwinjiza ingengabitekerezo yabo mu bambari bashya.

Ntwari usanzwe ari muramu wa Kayumba ni na Komiseri muri RNC ushinzwe urubyiruko, aho mu bikorwa bye muri Uganda arimo gufatanya na Prossy Bonabaana na Sulah Nuwamanya, abantu babiri bamaze igihe bakorera RNC i Kampala, bitwikiriye umuryango witwa ko utari uwa leta, Self-Worth Initiative.

Nyuma y’inama yabereye i Gatuna ku wa 21 Gashyantare 2020 yahuje u Rwanda na Uganda, icyo gihugu cyavuze ko cyambuye ibyangombwa Self Worth Initiative, ariko ibimenyetso byinshi bihamya ko ukomeje gukora.

Ikinyamakuru Virunga Post cyatangaje ko Ntwari yagiye muri Uganda gukurikirana imigendekere y’amasomo arimo guhabwa abambari bashya ba RNC muri Uganda no guhura n’abakomeje kwinjizwa muri ibyo bikorwa bavanywe mu bice bitandukanye bya Uganda.

Mu mezi ashize nibwo icyo kinyamakuru cyatangaje uburyo Urwego rwa Gisirikare Rushinzwe Iperereza, CMI, rukomeje gukora iyo bwabaga mu gufasha RNC gushaka abanyamuryango bashya mu mpande zose za Uganda, ibikorwa bigirwamo uruhare n’ubuyobozi bw’ingabo zidasanzwe, Special Forces Command.

Bonabaana na Nuwamanya bakoze ibishoboka byose mu kubaka uburyo bwo kwinjiza abarwanashyaka bashya mu bice bya Hoima, Fort Portal, Kakumiro, Namutamba, Mubende, Kiboga, inkambi y’impunzi ya Nakivale n’ahandi, hiyongera ku Murwa Mukuru Kampala. Ababa bashakwa cyane ni abavuga Ikinyarwanda, biganjemo impunzi.

Nyuma yo kwinjizwa muri ibyo bikorwa, aba bantu bashya muri RNC bajyanwa mu masomo mu kigo cya RNC kiri mu gace ka Bugolobi i Kampala. Iyi gahunda y’amahugurwa biheruka kujya hanze ko ari uburyo bushya RNC yize, ku nama za Perezida Yoweri Museveni, ko bwazabafasha guhirika Guverinoma y’u Rwanda.

Mbere RNC ibifashijwemo na CMI, bibwiraga ko uburyo buruta ubundi ari ugushinga igisirikare cyatera u Rwanda, ku buryo binjizaga abarwanyi muri uyu mutwe, bakabashakira ibyangombwa by’ibyigananano bakabajyana mu myitozo mu mashyamba ya Repubulika ya Demokarasi ya Congo, baciye muri Tanzania n’u Burundi.

CMI kandi yabafashaga mu bikorwa byo kugura intwaro cyangwa kubasha gukora inama zabo nta nkomyi.

Gusa hagati mu mwaka ushize ikirere cyabahindukiyeho, ubwo abarwanyi ba RNC kimwe n’indi mitwe yitwaje intwaro baraswaga bikomeye n’Ingabo za FARDC, bituma abarwanyi benshi bicwa abandi barafatwa, boherezwa mu Rwanda, ubu bari imbere y’inkiko babazwa ibyo bakoze.

Bivugwa ko Museveni na Nyamwasa byabariye ahantu nyuma yo kubona imigambi yabo ishyizwe hasi, maze ibyo batekerezaga byo guhungabanya umutekano w’u Rwanda bihera mu nzozi.

Nibwo biyunguye ibitekerezo byo guca indi nzira, bashaka uburyo bahuriza hamwe abantu bakabanza kubashyiramo ingengabitekerezo yabo, ari nabyo Bonabaana na Nuwamanya bakomeje guhirimbanamo bashakisha uko babona abanyamuryango bashya baturuka ahantu hanyuranye. Ni nabyo byahagurukije Frank Ntwari muri Afurika y’Epfo, ajya muri Uganda.

Amakuru yemeza ko abatanga amasomo mu buryo bw’ikoranabuhanga kuri abo bambari bashya barimo Umunyamabanga Mukuru wa RNC, Gervais Condo, uba muri Leta Zunze Ubumwe za Amerika na Epimaque Ntamashubora uba muri Bwongereza, akaba na komiseri wa RNC ushinzwe ubukangurambaga.

Mu bandi babaha amasomo harimo Robert Higiro, Epimaque Runanira n’abandi, bo baba bari muri Uganda.

Umwe mu basesenguzi yavuze ko Museveni na Nyamwasa batsinzwe, aho kwemera ko bibayobeye bashaka uko bapfunda imitwe, ariko ngo ikigaragara ni uko ntaho imigambi yabo izagera.

Hari amakuru ko RNC ishaka kuzinjira mu cyiciro cya kabiri cy’umugambi wayo ubwo izaba imaze gucengeza amatwara mu bantu bayo bashya, ku buryo bazoherezwa mu miryango ivuga Ikinyarwanda, nabo bakajya gushaka abandi binjiza muri iyi mitwe, cyane cyane Abanyarwanda cyangwa Abanya-Uganda bafite inkomoko mu Rwanda.

Ni ibikorwa bigamije gushaka abantu benshi cyane cyane urubyiruko, rwo kwifashisha mu guhungabanya umutekano w’u Rwanda.

Gusa abasesenguzi mu by’umutekano bashimangira ko uko byagenda kose, imigambi ya RNC na Museveni izakomeza kubapfubana, nk’uko byakomeje kugenda.

Frank Ntwari yagiye muri Uganda mu bikorwa bya RNC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .