Ikigo mpuzamahanga kigamije kwimakaza imiyoborere myiza na demokarasi mu bihugu by’ibiyaga bigari (ICGLR), cyaje mu Rwanda mu rwego rwo gushaka uburyo ibipimo by’imiyoborere myiza bisanzwe bikoreshwa n’ikigo cy’igihugu gishinzwe imiyoborere mu Rwanda (RGB) byakwifashishwa mu bihugu bigize iki kigo mu kwimakaza amahame ya demokarasi mu Karere, imiyoborere myiza byo nkingi z’amahoro arambye mu Karere.

Muri iki kiganiro cyatangiye ku wa gatanu tariki ya 7 Kamena 2013, Dr Usengumukiza Felicien, umuyobozi wungirije muri RGB yatangaje ko iki kigo cyasabye ko cyafashwa, ibipimo u Rwanda rwifashisha mu miyoborere bikagezwa mu bindi bihugu 11 bigize Akarere k’ibiyaga bigari ngo bifashe kugera ku miyoborere myiza yo soko y’amahoro arambye.

Ibipimo by’imiyoborere mu Rwanda bikubiye mu ngingo umunani bigafatira ku bitekerezo by’abaturage no ku magenzura akorerwa mu bigo bitandukanye na RGB. Muri byo harimo kureba uko amategeko yubahirizwa, uko umutekano wifashe imitangire ya serivisi, uko ruswa irwanywa n’ibindi.

Umuyobozi mukuru w’Ikigo cyitiriwe Levy Mwanawasa kibarizwa muri ICGLR, Dr Frank Okuthe wishimiye iki gikorwa yagize ati “Dufite icyizere ko ubu bufatanye na RGB buzatuma tugera ku miyoborere nyayo mu Karere. Twarebye uburyo RGB ifasha kugera ku miyoborere myiza ihereye kuri ibyo bipimo. Turashaka ko byakoreshwa mu Karere , twabiganiriyeho na RGB nyuma yaho tuzashaka uburyo twabiganiraho n’ibihugu bitandukanye mu Karere turebe uburyo twatangira kubyifashisha.”

Usengimana yagize ati “Ibyo bipimo twabaganirije uko tubikoresha mu Rwanda, biramutse byifashishijwe muri ibi bihugu byaba ari ishema ry’u Rwanda. Byanafasha mu guhosha amakimbirane ajya agaragara mu Karere, byadufasha mu ngamba zo kugera ku iterambere rirambye ndetse byanadufasha ibihugu bitandukanye kureba uko imiyoborere yifashe mu bihugu byabo aho itifashe neza hakongerwamo imbaraga, bikanadufasha gusangira ibyo buri gihugu kirusha ikindi.”

Ibihugu bibarizwa muri aka karere ni u Rwanda,Burundi , Sudani zombi, Congo zombi, Uganda, Kenya, Tanzaniya, Angola, Zambia na Centrafrique.

Dr Frank Okuthe umuyobozi mukuru wa ICGLR,