Mu gikorwa cyo kwamamaza abakandida depite b’Umuryango FPR Inkotanyi mu karere ka Rulindo, ubuyobozi bw’umuryango butangaza ko hari byinshi abaturage bamaze kugeraho ariko by’umwihariko mu myaka ine, buri muturage wese w’ako karere azaba akoresha amazi meza.
Kangwagye Justus umuyobozi w’Akarere ka Rulindo akaba n’umuyobozi wa FPR inkotanyi muri ako karere, mu kiganiro na IGIHE yadutangarije ko kwamamaza abakandida depite ba FPR Inkotanyi mu karere ayobora byatangiriye mu murenge wa Rusiga n’uwa Mbogo aho abaturage bahurijwe hamwe bakagwezwaho imigabo n’imigambi ya FPR.
Agira ati “Ibyiza Umuryango wa FPR Inkotanyi umaze kutugezaho muri aka karere ni ntagereranywa. Dufite ishuri ntangarugero ridasanzwe, imihanda, mu ntego z’ikinyagihumbi turi heza, ku birebana n’amazi dufite gahunda ya Rulindo Challenge yabaye gahunda mpuzamahanga, ku buryo mu myaka ine abaturage ba Rulindo bazaba baragejejweho amazi 100%.”
Kangwagye akomeza avuga ko mbere ya Jenoside uretse ishuri rimwe ryisumbuye ry’abapadiri ryari muri ako karere ariko kugeza magingo aya buri murenge urifite, ibyo bigatuma abana benshi biga ntihagire urengana kubera kubura ishuri ryo kwigamo.
Agira ati “urebye aho aka karere kavuye na we byagushimisha kuko ubu turi mu turere icumi twa mbere mu gihugu. Twishimira ko ubukire dufite budaturuka hejuru ahubwo buva mu baturage ubwabo, mu bikorwa byabo. Abaturage bageze ku bushobozi bwo kwitekerereza umushinga, ku buryo gukorana n’amabanki babigize intego.”
Akarere ka Rulindo ubu gafite igihingwa gishya cyaje mu Rwanda cyitwa Stevias, kizazanira abanyarwanda inyungu nyinshi kuko agaciro kacyo gahambaye cyane. Kangwagye ati “Kimaze gutanga umusaruro tuzasigara duhanganye n’abafite Diyama.”
Gasamagera Wellars Komiseri ushinzwe ubukangurambaga mu gihugu mu Muryango FPR Inkotanyi, mu kiganiro na IGIHE yadutangarije ko igikorwa cyo kwamamaza abakandida b’Umuryango FPR Inkotanyi n’indi mitwe ya Politiki bifatanyije, cyateguwe hashingiwe ku byo Igihugu cyagezeho kiyobowe na FPR Inkotanyi. Ati “Ibyo umuryango wagejeje ku gihugu ni byinshi. Turabyerekana biragaragara, iterambere ririhuta rishingiye ku cyaro, u Rwanda ni cyo gihugu cyonyine gihagaze neza mu mutekano mu bihugu bigize akarere, igihugu kirazamuka mu by’ubukungu kuko abantu bagera kuri 1,000,000 bamaze kwivana mu bukene muri iyi myaka itanu ishize.”
Akomeza avuga ko hashyizwe imbaraga mu butabera, kongera imibereho myiza y’abaturage binyuze mu budehe, VUP na Gahunda ya Girinka. Ati “Turakomeza muri icyo cyerekezo turusheho kugenda tugera ku bindi bifatika, igihugu kibashe kujya mu ruhando mpuzamahanga mu iterambere.”
Bamwe mu baturage baganiriye na IGIHE badutangarije ko bishimira ibyo Umuryango FPR Inkotanyi umaze kubagezaho kandi gutora FPR ari ukwiteganyiriza iterambere rirambye. Basaba abadepite bazatora kuzabegera kurushaho kugira ngo amategeko bazajya batora azabe yaturutse mu bitekerezo byabo.
TANGA IGITEKEREZO