00:00:00 IGIHE NETWORK KN KINYARWANDA EN ENGLISH FR FRANCAIS

Ni iki Commonwealth itekereza kuri BBC imaze imyaka ihagaritswe mu Rwanda?

Yanditswe na Ntabareshya Jean de Dieu
Kuya 27 June 2022 saa 08:53
Yasuwe :

Mu 2015, Leta y’u Rwanda yafashe icyemezo cyo guhagarika gahunda za BBC mu Rurimi ry’Ikinyarwanda mu gihe kitazwi nyuma ya filime mbarankuru yiswe Rwanda: The Untold Story, yatambutse ku murongo wa televiziyo BBC2, ikanengwa guhakana no gupfobya Jenoside yakorewe Abatutsi mu 1994.

Ihagarikwa ry’ibiganiro bya BBC ni kimwe mu byo abatavuga rumwe n’ubutegetsi bw’u Rwanda bakunze kuririraho bagaragaza ko u Rwanda rudatanga ubwisanzure bw’itangazamakuru n’ubwo gutanga ibitekerezo.

Ku wa Gatatu tariki ya 22 Kamena 2022, mu nama y’Ihuriro ryiga ku iterambere ry’abaturage, People’s Forum, ryari ryitabiriwe n’ababagize imiryango itegamiye kuri Leta n’abayobozi b’inzego zinyuranye bo mu muryango wa Commonwealth, hagaragajwe ko ubwisanzure bwo gutanga ibitekerezo ari uburenganzira bwa muntu.

Iyi nama yari yanitabiriwe n’Umuyobozi wa Commonwealth Foundation ari na yo ishinzwe imiryango yose itari iya Leta yo mu bihugu binyamuryango, Anne Therese Gallagher n’abandi batandukanye.

Uyu muyobozi kimwe n’abandi bagaragaje ko imiryango itari iya Leta ikwiye guhabwa umwanya mu bikorwa bitandukanye mu nyungu z’umuturage ndetse ko no mu bijyanye n’ubwisanzure mu gutanga ibitekerezo hakenewe ko igira uruhare rukomeye mu kugaragaza ibitagenda neza kugira ngo bikosorwe.

Mu kiganiro yagiranye na IGIHE, Anne Therese Gallagher, yagarutse ku ishusho y’ubwisanzure bwo gutanga ibitekerezo mu bihugu bigize Commonwealth.

Yageze ku Rwanda avuga ko nta byinshi yaruvugaho ngo kuko ugereranyije n’imyaka yashize aho itangazamakuru ryagize uruhare mu gusenya igihugu, byanagejeje kuri Jenoside yakorewe Abatutsi, hari intambwe nziza yatewe mu guha urubuga itangazamakuru no kugira ubwisanzure mu gutanga ibitekerezo.

Agaruka ku kuba BBC imaze imyaka irindwi itaremererwa kongera gufungura imiryango mu Rwanda, Anne yavuze ko nka Commonwealth ntacyo babikoraho.

Ati “Twebwe nk’umuryango wa Commonwealth ntabwo twinjira mu mikorere y’igihugu runaka, kuba hari ikibazo hagati y’u Rwanda na BBC ntacyo twabikoraho kuko ibyo ni ibintu bisaba ibiganiro hagati y’impande zombi ubwazo.”

Yakomeje agira ati “Njyewe ubwanjye BBC ndayikunda cyane ko iwacu ari mu Bwongereza. Icyo navuga ni uko hakenewe ibiganiro bigamije kongera guhuza ubuyobozi bwa BBC bukumva icyo busabwa cyangwa bugomba gukosora kuko twebwe nka Commonwealth n’ubundi nta kindi twabikoraho.”

Yagaragaje ko nubwo gutanga ibitekerezo ari uburenganzira bwa muntu ariko bugira aho bugarukira kuko iyo hari ubwisanzure bugamije gusenya, icyo gihe biba ari inshingano z’igihugu kugenzura ibikwiye guhabwa urubuga.

Umuyobozi wa Commonwealth Foundation, Anne Therese Gallagher hamwe n’Umuyobozi Mukuru w’Urwego rw’Igihugu rushinzwe imiyoborere (RGB), Dr Usta Kaitesi

Umuyobozi Mukuru w’Urwego rw’Igihugu rushinzwe Imiyoborere mu Rwanda, RGB, Dr Usta Kaitesi yabwiye IGIHE ko kuba hari abagihuza ifungwa rya BBC no guhonyora uburenganzira bwo gutanga ibitekerezo bihabanye n’ukuri.

Ati “Icyabaye hagati y’u Rwanda na BBC ni Rwanda: The Untold Story. Ntabwo amateka ya Jenoside yakorewe Abatutsi ari inkuru itaravuzwe, ni imiryango yazimye, ni Abanyarwanda babuze ababo, ni impfubyi zitarezwe n’ababyeyi. Ayo mateka ntabwo umuntu yayahindura uko ashatse ngo kubera ko afite uruvugiro. Ibyo ntabwo bikwiriye gufatwa nko kuniga itangazamakuru.”

Dr Kaitesi yavuze ko nk’igihugu giha agaciro itangazamakuru rikora kinyamwuga kidashobora kureberera ufite gahunda yo gusenya ubumwe bw’Abanyarwanda bumaze kugerwaho.

Ati “Icyo barimo guteza ntabwo twakwicara ngo turebere, twese dufite inshingano zo guhagarika icyaha kitaraba. Iyo urubuga rw’itangazamakuru ruhisemo kuba urubuga rwatuma abantu babura ubuzima, bakabura n’umutekano, birumvikana ko rudakwiriye kuba rukora muri icyo gihe kandi si rwo rwonyine, ngira ngo uzi na Radiyo yadukiriye abagore ikabagereranya na satani.”

Yavuze ko u Rwanda rwahisemo kubaka itangazamakuru ryigenzura kandi rishoboye, rikora kinyamwuga bityo ko rudashobora kuniga ubwisanzure bwaryo.

Ati “Dufite amateka y’itangazamakuru ryatumye Jenoside ishoboka kurushaho, turubaka itangazamakuru tutirengagije amateka yacu ariko rishaka kugana aho tugana kuko itangazamakuru rishoboye ni inzira yo guha abaturage uruhare mu miyoborere kandi ni yo miyoborere twahisemo.”

Yavuze ko abitwaza ko hari abanyamakuru bafunze, ibyo bavuga bidahagije ahubwo bakabaye bagaruka no cyatumye bafungwa.

Ati “Umunyamakuru iyo akoze icyaha mu mategeko y’u Rwanda rimwe na rimwe akihisha inyuma y’umwuga ashaka gukoresha uburenganzira bwe mu mwuga, bihanwa n’amategeko y’umwuga. Iyo abikurikiranweho abantu bakumva ko harimo kuniga itangazamakuru, aho hakwiye gusobanuka."

Ku birebana no kuba hari ibiganiro BBC yagiranye n’u Rwanda yifuza kongera kwemererwa gukorera mu Rwanda, Dr Kaitesi yavuze ko ibyo atari we wabimenya ariko yemeza ko mu gihe cyose BBC yabyifuza, yasabwa guhindura imikorere igakora kinyamwuga.

Mu kiganiro IGIHE iheruka kugirana na Ambasaderi w’u Bwongereza mu Rwanda, Omar Daair, na we yagaragaje ko batishimiye kuba ibiganiro bya BBC mu Kinyarwanda byarahagaritswe ariko ko hakenewe kugira icyakorwa kugira ngo yongere kugaruka kuko yatanze umusanzu ukomeye.

Ati “Mbabajwe n’uko bikimeze gutya [BBC igifunzwe], ntekereza ko BBC yagize uruhare rwiza muri Afurika. Nk’ubu umubyeyi wanjye yakoresheje BBC nka bumwe mu buryo bwo kwihugura mu rurimi rw’Icyongereza kandi ntekereza ko n’abandi bantu bayibyaje umusaruro mu kwiga Icyongereza no kumenya amakuru.”

Yongeyeho ati “Sinari mpari muri 2015 ngo nkurikirane iki kibazo ariko ntekereza ko BBC igifite agaciro, nizeye ko dushobora kuzongera [kuyumva mu Kinyarwanda] hano [mu Rwanda]. Ntacyo navuga kuri iyi ngingo aka kanya ariko ndizera ko tuzakomeza kuganira kuri iki kibazo.”

Asubiza ikibazo cy’umunyamakuru wa BBC, mu kiganiro n’abanyamakuru cyakurikiye isozwa ry’inama ya CHOGM, kuri uyu wa 25 Kamena 2022, Perezida Kagame wanahawe inshingano zo kuyobora Commonwealth, yavuze ko uburyo ibigo nka BBC bitangaza amakuru yabyo harimo kurenganya Abanyafurika.

Ati "Mufata igihe mukanyuzaho amakuru kuva mu gitondo kugera nimugoroba, ibi ni ukubangamira abantu. Muri kubangamira Abanyarwanda, muri kubangamira Abanyafurika. Indangagaciro, indangagaciro, indangagaciro, ni izihe ndangagaciro uzi?"

Umukuru w’Igihugu yavuze ko u Rwanda rudakeneye kwigishwa indangagaciro, ati "Ndashaka kukwizeza ko nta muntu n’umwe kuri BBC cyangwa ahandi aho ari ho hose wubahiriza indangagaciro neza kurusha uko tubikora hano mu Rwanda, kereka niba ushaka guhisha amakosa y’abo bantu bifuza kutugenera indangagaciro."

Raporo y’Ikigo cy’igihugu gishinzwe imiyoborere mu Rwanda izwi nka ’Rwanda Media Barometer’ yatangajwe mu Ugushyingo 2021 igaragaza ko ubwisanzure bw’itangazamakuru buri kuri 93%, ubwo gutanga ibitekerezo kuri 86%, ubwigenge ku gutanga amakuru kuri 87%, naho uburenganzira bwo kugera ku makuru buri kuri 94%.

Raporo yo muri Mata 2021 ya World Press Freedom Index ku bwisanzure bw’itangazamakuru mu bihugu 180 yo yashyize u Rwanda ku mwanya wa 156, aho irushyira mu bihugu 130 ivuga ko itangazamakuru rikinigwa.

Umuyobozi wa Commonwealth Foundation (iburyo), Anne Therese Gallagher; Umunyamabanga Mukuru wa Commonwealth, Patricia Scotland n’Umuyobozi Mukuru w’Urwego rw’Igihugu rushinzwe imiyoborere (RGB), Dr Usta Kaitesi
Inama y’huriro ryiga ku iterambere ry’abaturage, People’s Forum, yari yitabiriwe n’abagize imiryango itegamiye kuri Leta, abayobozi b’inzego zinyuranye bo mu muryango wa Commonwealth

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .