Ishyaka riharanira Demokarasi no kurengera ibidukikije mu Rwanda (DGPR: Democratic Green Party of Rwanda) ryemerewe intebe muri Forumu y’amashyaka mu Rwanda.
Kuri uyu wa kane tariki ya 3 Mata 2014, Inama rusange y’Ihuriro ry’imitwe ya Politiki yemewe mu Rwanda, hemejwe ko ishyaka Green Party ryemewe nk’umuryango wa Forumu y’amashyaka.
Umuvigizi w’ihuriro, Sheikh Musa Fazil Harerimana, yishimira ko amashyaka yose ari mu Rwanda abarizwa mu Ihuriro.
Agira ati “Ubusanzwe amashyaka yose yari mu Ihuriro, keretse Green Party, ariko none na yo iraje. Twungutse abanyamuryango kandi abaziga amasomo ajyanye na Politiki na bo bariyongereye.”
Ku bijyanye n’uburyo bwo gufata ibyemezo, mu gihe iri shyaka rizaba ritabyemeye kuko umurongo waryo n’ubundi ritavuga rumwe na Guverinoma, Sheikh Musa Fazil Harerimana atangaza ko ibyemezo biba mu bwumvikane busesuye, iyo binaniranye hakabaho amatora.
Dr Frank Habineza, Umuyobozi wa Green Party atangaza ko ari umwanya wo gutanga ibitekerezo bakabiganiraho nk’imitwe ya Politiki, ariko kandi ngo umurongo we wa Politiki udahindutse.
Agira ati “Ni umwanya wo kuganira n’abandi banyapolitiki ku bitekerezo byacu, kuko ubundi ntaho mwahurira. Tuzajya dutanga ibitekerezo, tuzafungura urubuga rw’ibiganiro.”
Habineza akomeza agira ati “Nubwo twinjiye mu Ihuriro, umurongo wa Politiki wacu ntuhindutse. Tuzakomeza kugaragaza ibitagenda muri Guverinoma kugeza igihe tuzagira mu matora. Nidutsinda amatora tukajya muri Guverinoma ni bwo tuzahinduka.”
Green Party yinjiye mu Ihuriro ry’amashyaka, nyamara Habineza Frank ubwo yagarukaga mu Rwanda mu gihe gishize avuye muri Suwedi, yari yavuze ko atemera Ihuriro kandi n’ishyaka rye ritazarijyamo.
Green Party ibaye ishyaka rya 11 ryinjiye mu Ihuriro ry’Igihugu nyunguranabitekerezo ry’imitwe ya politiki yemewe mu Rwanda, rije risangamo PS Imberakuri na yo ivuga ko itavuga rumwe na Guverinoma.
TANGA IGITEKEREZO