Nyuma yo kubarura amajwi yaturutse mu turere twose tw’igihugu, Komisiyo y’Igihugu y’Amatora yashyize ahagaragara amajwi y’agateganyo yavuye mu matora y’abadepite rusange 53, bagomba kujya mu nteko ishinga mategeko. FPR Inkotanyi yaje ku isonga n’amajwi 76.22%.
Mu matora y’abadepite yo kuwa 16 Nzeri 2013, kuri uyu mugoroba tariki ya 17 Nzeri 2013, Komisiyo y’Igihugu y’amatora yatangaje ibyavuye mu matora y’igihugu cyose ku buryo bw’agateganyo. FPR Inkotanyi n’imitwe ya Politiki bifatanyije, PDC, PDI, PPC na PSR baje ku isonga n’amajwi aruta kure ay’abandi ku buryo bihariye nibura imyanya irenga 3/4 by’abagomba kujya mu nteko ishinga amategeko, Umutwe w’Abadepite, ku buryo babonye amajwi angana na 76.22%.
Indi mitwe yasaranganyije imyanya isigaye, PSD yabonye 13.03% na ho PL ibona 9.29%, iyo mitwe akaba ari yo ubusanzwe yari mu nteko ishinga amategeko.
Undi mutwe wa Politiki wari mu matora ni PS imberakuri wabonye 0.56% ukaba udashobora kwinjira mu nteko ishinga amategeko kuko utashoboye kugeza nibura kuri 5% nk’uko amategeko abiteganya, kimwe n’akandida bigenga aho Mwenedata Gilbert yabonye 0.42%, Mutuyimana Leonille 0.15%, Ganza Clovis 0.19% na ho Bizirema Venuste abona 0.16%.
TANGA IGITEKEREZO