Amarenga ku butegetsi bwa Ndayishimiye nyuma yo kugira Alain-Guillaume Bunyoni Minisitiri w’Intebe

Yanditswe na Bukuru JC
Kuya 27 Kamena 2020 saa 07:04
Yasuwe :
0 0

Abakurikiranira hafi politiki y’u Burundi bashimangira ko mu kugira Gen Alain-Guillaume Bunyoni Minisitiri w’Intebe, Perezida mushya Évariste Ndayishimiye yakomereje mu murongo wasizwe na Pierre Nkurunziza yasimbuye, washyinguwe kuri uyu wa Gatanu.

Kugira Bunyoni Minisitiri w’Intebe kandi byatumye benshi, cyane cyane abari bategereje impinduka nyuma y’ubutegetsi butavuzweho rumwe bwa Nkurunziza, baba basubije amerwe mu isaho kugeza hagaragaye ibimenyetso bishya.

Kugeza ku rupfu rwa Nkurunziza ku wa 8 Kamena, kimwe mu bibazo byibazwaga n’abasesenguzi ba politiki y’u Burundi cyangwa abaturage, kwari ukumenya niba uyu mujenerali w’imyaka 52 azakora ibintu mu buryo bwe, atagendeye ku wamubanjirije wari umaze guhabwa amazina y’icyubahiro n’ibiyaherekeza mbere y’uko umusimbura atorwa, ku buryo byagombaga kumuha ububasha bwo gukomeza kugira ijambo nubwo hari kuza perezida mushya.

Urupfu rwa Nkurunziza rwatumye Ndayishimiye arahira huti huti ku wa 18 Kamena, hirindwa inzibacyuho kuko umuyobozi watowe yari yaramaze kuboneka, arahira mu birori byabereye kuri Stade Ingoma, muri Gitega.

Bijyanye n’igihe cyateganywaga n’Itegeko Nshinga, Ndayishimiye yagombaga kurahira kuwa 20 Kanama, ariko Urukiko Rurengera Itegeko Nshinga rwemeza ko icyo gikorwa kiba "vuba bishoboka."

Mu buryo busanzwe, igihugu cyari kubanza kuyoborwa mu nzibacyuho na Perezida w’Inteko Ishinga amategeko, Pascal Nyabenda, wakomeje kugarukwaho na bamwe mu bakomeye mu ishyaka CNDD-FDD nk’uwari amahitamo ya mbere ya Nkurunziza, nk’umukandida wagombaga kumusimbura.

Hibazwa niba ukwihutisha irahira rya Ndayishimiye, bitari binagamije gukumira ko imvururu zahabwa urwaho mu gihugu, dore ko zakiranze nyuma y’amatora yabaye mu 2015.

Nk’uko Jeune Afrique yabitangaje, Gaston Sindimwo wari visi perezida wa Nkurunziza muri manda ye ya nyuma yagize ati "Urupfu rwa Perezida Nkurunziza twese rwaradutunguye, byari byiza ko perezida mushya ahita atangira inshingano vuba bishoboka."

Izamurwa ry’umuntu wa hafi wa Nkurunziza

Nyuma yo kurahira, hari ibyemezo byari bitegerejwe cyane kuri Évariste Ndayishimiye. Ku wa 23 Kamena nibwo yatangaje Visi Perezida na Minisitiri w’Intebe, mu nshingano nshya nk’uko biteganywa n’Itegeko Nshinga ryavuguruwe mu 2018, ndetse bemezwa mu bwihutirwe n’Inteko Ishinga amategeko.

Prosper Bazombanza wo mu ishyaka Uprona, yongeye kwicara mu mwanya wa Visi Perezida ufatwa nk’uw’icyubahiro gusa, umwanya yanabayemo hagati ya 2014 na 2015. Nk’uko Itegeko Nshinga ry’u Burundi ribiteganya, aba agomba guturuka mu ishyaka ndetse afite ubwoko bitandukanye n’ibya Perezida.

Nyuma y’ibyo byemezo, uwatinzweho cyane ni uwagizwe Minisitiri w’Intebe, Alain-Guillaume Bunyoni.

Bunyoni ni we ufite n’ipeti rya mbere riruta ayandi yose mu gipolisi, Commissaire de Police Général, akaba umuntu wa hafi wa Nkurunziza

Uyu yari Minisitiri w’Umutekano mu Burundi, umwanya yari amazeho imyaka itanu. Byunyoni yafatwaga nk’ukuboko kw’iburyo kwa Nkurunziza, nyuma y’urupfu rwa Gen Adolphe Nshimirimana warashwe mu 2015, wahoze ayoboye inzego z’iperereza.

Umwe mu bahoze ari abantu ba hafi ba Nkurunziza, ahamya ko Bunyoni azi byinshi no ku binengwa ishyaka CNDD-FDD, byaba ibyo hanze y’ubutegetsi cyangwa iby’imbere mu butegetsi.

Umwe mu bantu bo muri Guverinoma we yagize ati "Ni umuntu ushoboye, ukorera ku murongo, ibintu bikenewe cyane muri iki gihe."

Bunyoni ni umuntu w’ingenzi cyane mu myubakire y’inzego z’umutekano mu myaka 15 ishize, kuko ari umwe mu bajenerali bafite ijambo rikomeye mu gihugu uhereye n’igihe bari bakiri mu ishyamba, ubu bavuga rikumvikana haba muri CNDD-FDD cyangwa mu butegetsi bwo hejuru.

Urugendo rwa Alain-Guillaume Bunyoni muri politiki ntabwo rutandukanye cyane n’urwa Pierre Nkurunziza. Yavutse mu 1972, aza kuva muri Kaminuza y’u Burundi ngo yinjire mu nyeshyamba za CNDD-FDD, hari mu 1995.

Uyu mugabo wabanje gukorera mu majyepfo y’igihugu, yagaragaje ubushobozi mu gihe u Burundi bwari mu ntambara, agenda azamuka kugeza ahawe ipeti rya Jenerali.

Umwe mu barwanye urugamba ku ruhande rwa CNDD-FDD yagize ati "Yari umuntu ugusha ku ntego kandi agatanga umusaruro. Uko ameze muri politiki niko yari ku rugamba. Ntabwo ari umuntu ugaragaza amarangamutima cyane, ni umuntu utoroshye."

Mu 2001, Bunyoni ngo yari umwe mu bantu basabye ko Pierre Nkurunziza ayobora uwo mutwe w’inyeshyamba, ngo asimbure Colonel Jean-Bosco Ndayikengurukiye.

Ubwo CNDD-FDD yashyiraga intwaro hasi, nyuma y’imyaka ibiri ubwo bari bamaze gusinya amasezerano yo guhagarika intambara, Bunyoni yabaye umuhuzabikorwa w’ibiro bikuru bya polisi y’igihugu ihurijwe hamwe. Nyuma y’amatora yo mu 2005, ya mbere yari abayeho nyuma y’intambara, yagizwe umuyobozi wa polisi.

Nyuma yaje no kugirwa minisitiri w’umutekano kugeza mu 2011, mbere yo kugirwa umuyobozi w’ibiro bya Perezida Nkurunziza.

Umwe mu bakoze muri Perezidansi y’u Burundi yakomeje ati "Ahantu hose yanyuze yabashije gukora ibintu bye ku murongo kandi akabikora mu buryo bitashoboraga guhinyuzwa."

Izina rya Bunyoni ryongeye kuzamuka mu biganiro byagombaga kubanziriza manda ya gatatu ya perezida Nkurunziza. Mu mpera z’umwaka wa 2014, abajenerali benshi batangiye kwinubira imbaraga zari zikomeje guhabwa Bunyoni na Nshimirimana.

Mu guhosha ubwo bwumvikane buke, Nkurunziza yaje gusa n’ubigizayo by’igihe gito. Bunyoni yagumye kuri perezida we, ku buryo yaje kuba umwe mu bantu b’ingenzi mu guhosha cout d’état yari yateguriwe Nkurunziza, ku wa 13 Gicurasi 2015.

Yaje gusubizwa mu mwanya we nka Minisitiri w’Umutekano mu nkubiri yakurikiye amatora, aza no gushinjwa kuba umwe mu bagize uruhare mu bikorwa byo guhutaza abatavuga rumwe n’ubutegetsi, byatumye bamwe bicwa, bamwe bagafungwa abandi bagahunga.

Guhera mu Ugushyingo 2015, Bunyoni ni umwe mu baregwa n’ibihano byashyizweho na Amerika kubera uruhare yagize mu guhangana n’abarwanyaga leta muri icyo gihe, byaguyemo abatari bake.

Ahazaza ha Ndayishimiye hahanzwe amaso

Nyuma yo gushyiraho Bunyoni nka Minisitiri w’Intebe, hakomeje kwibazwa niba Ndayishimiye ari ubutumwa yashatse guha amahanga, cyane ko uyu mugabo bigoye kumenya icyo atekereza.

Ubwo yiyamamazaga ntiyahwemye gushima ibyiza uwamubanjirije yagezeho, ku buryo yizezaga gukomerezaho.

Gusa uyu muyobozi mushya abantu bakunze kwitwa "Neva" mu mpine y’amazina ye yombi, yatanze n’ubutumwa butandukanye n’ibyo, aho mbere y’amatora yahuye n’abadipolomate agashimangira ubushake bwe bwo gufungura imibanire y’u Burundi n’amahanga, nyuma y’imyaka itanu busa n’ubukora bwonyine.

Ariko nanone mu ijambo yavuze ubwo yarahiraga, yanenze cyane umuryango mpuzamahanga harimo n’abo yise "abakoloni".

Ni umuntu ariko nanone ufatwa n’abakoranye na we nk’ukunda ibiganiro, ariko hategerejwe kureba impinduka azazanira igihugu mu myaka irindwi ya manda ye.

Hanibazwa niba kugira Bunyoni Minisitiri w’Intebe byari mu rwego rwo guhumuriza abakomaye mu butegetsi batewe impungenge n’iperereza ry’Urukiko Mpuzamahanga mpanabyaha, ariko nanone bikabonwa nk’urucantege ku bantu bari biteze ko ubutegetsi bwa Ndayishimiye buzahita buzana impinduka mu mitegekere y’igihugu.

Umwe mu badipolomate ukorera i Bujumbura yagize ati "Ku bijyanye n’amahanga, ibyo bishobora kugaragara nk’ubushotoranyi. Na cyane ko yari yigaragaje nk’umuntu ufunguye kandi witeguye kubaka imibanire mishya."

Yakomeje ati "Ariko ni ngombwa gutegereza amezi runaka kugira ngo tumenye icyerekezo ashaka kuganishamo ibintu."

Avuga ko akeneye gutanga icyizere mu ishyaka rye cyo gushimira abantu bakomeye, ariko nabyo bishobora kugira icyerekezo bigaragaza mu bijyanye na politiki.

Bunyoni yagizwe Minisitiri w'Intebe wa mbere nyuma y'ivugururwa ry'Itegeko Nshinga
Perezida Ndayishimiye yamaze gushyiraho ab'ingenzi muri Guverinoma ye
Perezida Ndayishimiye (hagati) hamwe na Visi Perezida Prosper Bazombanza (ibumoso) na Minisitiri w'Intebe Alain Guillaume Bunyoni

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .