Guverineri Bosenibamwe yemeza ko imbabazi yasabye Umukuru w’Igihugu zitari urwiyerurutso

Yanditswe na

Erick Shaba

Kuya 16 Kamena 2014 saa 05:32
Yasuwe :
0 0

Guverineri w’Intara y’Amajyaruguru Bosenibamwe Aime avuga ko imbabazi aherutse gusaba Perezida Paul Kagame ku kuba bamwe mu bayobozi n’abaturage barifatanije mu bikorwa byo guhungabanya umutekano w’igihugu, zitari urwiyerurutso. Ibi ni ibyo Bosenibamwe yatangaje mu kiganiro yagiranye na IGIHE, kibanze cyane ku mutekano mu Ntara y’Amajyaruguru, nyuma y’uko hari abayobozi ndetse n’abaturage bafatiwe mu mikoranire ya hafi n’umutwe wa FDLR, bagamije guhungabanya umutekano w’igihugu.
Guverineri (...)

Guverineri w’Intara y’Amajyaruguru Bosenibamwe Aime avuga ko imbabazi aherutse gusaba Perezida Paul Kagame ku kuba bamwe mu bayobozi n’abaturage barifatanije mu bikorwa byo guhungabanya umutekano w’igihugu, zitari urwiyerurutso. Ibi ni ibyo Bosenibamwe yatangaje mu kiganiro yagiranye na IGIHE, kibanze cyane ku mutekano mu Ntara y’Amajyaruguru, nyuma y’uko hari abayobozi ndetse n’abaturage bafatiwe mu mikoranire ya hafi n’umutwe wa FDLR, bagamije guhungabanya umutekano w’igihugu.

Guverineri Bosenibamwe wongeye kwemeza ko kuba umwe mu bayobozi bo mu Karere ka Musanze, uwahoze ari Umunyamabanga Nshingwabikorwa w’Umurenge wa Cyuve, Alfred Nsengimana yarafatiwe mu bikorwa byo guhungabanya umutekano w’igihugu, bitatewe n’uko hari intege nke zaba zarabayeho mu buyobozi bwari bumukuriye ku rwego rw’intara cyangwa akarere.

Bosenibamwe avuga ko ubusanzwe Alfred Nsengimana yari umuyobozi w’intangarugero cyane ku buryo nta muntu wari gupfa kuvumbura ko ari ikirumirahabiri.

Ati “Mu bijyanye n’ibikorwa by’ubukangurambaga yari intangarugero ariko nta wari gukeka ko yakora ibikorwa nka biriya, yadusize icyasha twese”.

Imbabazi yasabye Umukuru w’Igihugu ngo si ukwiyerurutsa

Guverineri Bosenibamwe uherutse gusaba imbabazi mu izina ry’abayobozi bose ubwo kuwa Kane tariki ya 6 Kamena 2014, Perezida Kagame yaganiraga n’abayobozi batandukanye mu Ntara y’Amajyaruguru, avuga ko atari agambiriye kwigarurira icyizere ku Mukuru w’Igihugu ahubwo yasabye imbabazi nk’umuntu uyoboye itsinda ry’abayobozi mu Ntara y’Amajyaruguru.

Ati “Nyakubahwa Perezida wa Repubulika iyo yaguhaye inshingano ukazitatira, uba umuhemukiye ukanahemukira abaturage. Gusaba imbabazi mu ruhame kuriya byari ibintu bikomeye ariko nagombaga kubikora kuko twe dukora nka ‘team’(itsinda)”.

Guverineri w’Intara y’Amajyaruguru asobanura ko uburyo imiyoborere yo mu Rwanda yubatse ari uburyo bukorerwa mu matsinda ku buryo iyo hamwe bipfuye, bigira ingaruka no mu zindi nzego akaba ari yo mpamvu yafashe umwanzuro wo gusaba imbabazi Umukuru w’Igihugu kuko ’umukobwa aba umwe agatukisha bose’, ati “Buriya Alfred twese yadusize icyasha”.

Yashimangiye ko ubugambanyi butazasubira

Guverineri Bosenibamwe wemeza ko n’ubwo utabasha kumenya ikiri mu mutima w’umuntu kuko uba uhishe byinshi, avuga ko hashyizweho gahunda zo kugenzura abayobozi, ku buryo bashishikarizwa gusohoza inshingano zabo aho kwijandika mu bikorwa byo kugambanira igihugu; nk’uko abivuga, ibi bigaterwa ahanini n’umurengwe n’inda nini, aho baba bashaka ibintu by’inyongera kandi batavunikiye.

Bosenibamwe avuga ko bazakomeza guharanira ko nta wakongera kubavamo ngo agambanire igihugu, akongeraho ko n’uwazasubira azaba abaye nka ya mvugo y’Abanyarwanda ko ’nta muryango ubura ikigoryi’.

Guverineri Bosenibamwe Aime

Ese ni umurengwe wabibateye kandi harimo n’abaturage baciriritse?

Guverineri w’Intara y’Amajyaruguru avuga ko abaturage bafatiwe mu bikorwa bishyigikira umutwe wa FDLR atari bo babyibwirije ahubwo Alfred Nsengimana yari yarubatse ‘network’ (itsinda ry’abantu bari ku gikorwa kimwe), aho yifashishaga abaturage bamwe na bamwe akabizeza ibitangaza; aba ngo batoranywaga bitewe n’uko bafite imiryango yabo iba mu mashyamba ya Congo.

Guverineri yatanze urugero rw’abagore babiri batawe muri yombi bakurikiranyweho kuba baravuganaga na musaza wabo uba mu mutwe wa FDLR, aho bamuhaga amakuru yose.

Bosenibamwe avuga ko Alfred yari indyarya ikomeye ku buryo nyuma y’uko ateguye igikorwa cyo gutera gerenade Meya w’Akarere ka Musanze, imana igakinga akaboko ariko icyo gisasu kigahitana umwana muto, ngo uyu munyamabanga nshingwabikorwa niwe wa mbere wabanje kujya kuyagira umuyobozi w’akarere, amufata mu mugongo.

Bosenibamwe asanga Congo itifuza ko FDLR itaha mu Rwanda

Abajijwe kugira icyo avuga ku bimaze iminsi bivugwa ko gushyira intwaro hasi kwa FDLR ari ikinamico irimo abakinnyi benshi, kuko bagakwiriye kuba bazishyira hasi bagahita bataha mu Rwanda, Bosenibamwe avuga ko impamvu badataha ari uko Leta ya Congo ibaha uburyo bwo gukomeza kubaho nta cyo bikanga akaba ari nta gitutu bashyirwaho ngo batahe.

Avuga ko ikigaragaza ko ari ikinamico ari uko bitumvikana ukuntu Ingabo za Congo zifatanije n’iza SADC ndetse na MONUSCO, zose hamwe zirenga ibihumbi 100 zananiwe kurwanya ingabo za FDLR zitarenze 2000, kandi bazi aho ibirindiro byazo biba.

Bosenibamwe yahishuye intwaro arwanisha ngo Intara ayoboye ikomeze gutera imbere

Bosenibamwe ugaragaza kwishimira ko Intara ayoboye ikomeje kuba iya mbere mu guteza imbere imibereho myiza y’abatutage, avuga ko intwaro akoresha ari nta yindi uretse guha abaturage uruhare mu bikorwa bibateza imbere. Avuga ko abaturage b’Intara y’Amajyaruguru bumva vuba ibijyanye n’iterambere kandi batajya bagorana.

Bosenibamwe yagaragaje ko intara yihuta cyane mu iterambere bitewe n’uko ari yo kigega gikuru cy’ibiribwa mu gihugu, kuba ihana imbibi na Uganda ndetse na Congo, ibi bigatanga amahirwe menshi ku bucuruzi bwambukiranya imipaka ndetse no kuba iyi ntara ari igicumbi cy’ubukerarugendo.

Guverineri Bosenibamwe avuga ko mu mwaka wa 2007, Intara y’Amajyaruguru yari ifite hoteli 3 gusa, ariko kuri ubu ikaba ifite izigera kuri 26, aho 24 muri zo ari iz’abaturage bakomoka muri iyi ntara, naho 19 zikaba ziri mu Karere ka Musanze.

Ngo Kizito Mihigo yaramutengushye

Bosenibamwe uvuga ko yakundaga Kizito Mihigo kubera ubutumwa yatangaga mu ndirimbo ze, ngo ahuye nawe bakarebana amaso ku yandi yahita amubwira ati “Wa mugome we, uri umugome”.

Ibi ngo akabiterwa n’uko Kizito yaje akiyambika uruhu nk’urw’intama kandi imbere ari ikirura, aho yatangaga ubutumwa bwubaka kandi bukabohora Abanyarwanda ariko imbere muri we afite imigambi itari myiza.

Ati “Yagaragaje ko ibyo yatubwiraga byose yatubeshyaga!”


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .