00:00:00 IGIHE NETWORK KN KINYARWANDA EN ENGLISH FR FRANCAIS

Umwaka wa 2020 mu ngamba ebyiri

Yanditswe na Tom Ndahiro
Kuya 28 March 2020 saa 10:35
Yasuwe :

Nta kitagira akamaro. No kuguma mu rugo, wagiriwe inama yo kudasohoka ngo wirinde Koronavirusi, bigira icyo bimara. Hari abakomeza gukora ibyo basanzwe bakora ndetse bakarenzaho. Ku bakunda gusoma no kwandika bo birirwa nta rungu.

Hari n’abandi badashobora kugira ibyo bakorera mu rugo, batari na bake, kuko bidashoboka. Ibyo bigasaba ubwitange bushingira ku gushyira mu gaciro kubera ko bagomba kumva impamvu yabiteye. Mu Kinyarwanda bakavuga ko amagara ataguranwa amagana, kandi ko aho amagara acurirwa hadacurirwa ubuhozozo.

Uzi ko ubona n’umwanya wo gusubira mu byo wasomye kera? Mu bitabo nabonye umwanya wo gusubiramo, ni icy’umukino witwa ‘Rwanda 94: Kugerageza Gusubiza Agaciro Abapfuye, Byungura Abakiriho’. Mu magambo ahinnye ni ‘Rwanda 94’.

Reka mbe nisabiye Televiziyo y’Igihugu (RTV) kuzakora uko bashoboye uyu mukino ukazerekanwa mu bice byawo byose mu gihe cy’icyunamo cyo kwibuka Jenoside yakorewe Abatutsi ku nshuro ya 26.

Mbisabye hakiri kare kubera inyigisho nyinshi zirimo kandi hakaba abanyarwanda benshi batagize amahirwe yo kuwureba mu mwaka wa 2004. Uretse abataranawumva, hari n’abawubonye batakiwibuka.

Rwanda 94 yateguriwe kwibuka mu mizi Jenoside Yakorewe Abatutsi irimo inyigisho nyinshi kandi zitazasaza. Ni umukino wanditswe n’Abanyarwanda bafatanyije n’Abanyamahanga. Abo bakaba ari: Marie-France Collard, Jacques Delcuvellerie, Yolande Mukagasana, Jean-Marie Piemme, Dorcy Rugamba, Mathias Simons na Tharcisse Kalisa Rugano.

Umwimerere w’uwo mukino uri mu rurimi rw’igifaransa, ariko abakinnyi benshi muri wo bakaba abagize uruhare mu kuwandika n’abagize uruhare mu kongeramo amagambo n’indirimbo za Kinyarwanda (Jean-Marie Muyango, Intore Massamba na Ladislas Twahirwa). Igitabo cyawo mfite ni ikinyarwanda. Ndashimira abagisemuye kikabasha kugera ku batazi Igifaransa.

Kugeza ubu, ari abawanditse, abawukinnye ndetse n’abawushyize mu rurimi rw’ikinyarwanda, benshi baracyariho ndetse n’icyo gitabo kiri mu maduka agurisha ibitabo hano i Kigali. Librarie Ikirezi nkunze guhahiramo kibamo.

Imbarutso

Hari amagambo ari muri uyu mukino yagize icyo anyibutsa. Uwayumva wese afite umutima w’Ubuntu yamukora ahantu. Mu gihe cyo kwibuka uyu mwaka ku nshuro ya 26, uwacitse ku icumu, azazirikana kurwanya icyorezo cya Koronavirusi, ariko ntazabura kwibuka ubuzima yabayemo muri Jenoside.

Koronavirusi n’ubukana bwayo ntishobora kwibagiza Jenoside kuko bitagira ihuriro. Niyo mpamvu mpereye ku gice cya Gatanu cy’uwo mukino bise ‘Umuvugo wa Bisesero’. Hari aho ‘Umutangabuhamya w’umugabo’ agira ati:

Nasanze umugore wanjye

Aryamye hasi

Bari bamutemye

Bari bamucuje imyambaro ye

Yarandebye, ashaka kunsezeraho

Ndaturika ndarira

Ni uko njya gushaka amababi y’ibiti

Kugira ngo mutwikire

Kuko yari yambaye ubusa

Nagiye kumushakira amazi yo kunywa

Amazi yari yanduye cyane

Abicanyi bamaze kumutema inshuro ya gatatu

Yarapfuye

Aya magambo avugwa n’uyu mutangabuhamya, asa n’ukuri kw’ibyabaye. Ni ishusho y’ubuzima abacitse ku icumu biyumvamo, babayemo. Ubwo buhamya bukurikirwa n’ubw’umwana ugira ati:

Nimugoroba

Abicanyi bamaze kugenda

Hari umuntu wambwiye ko mama

N’abandi bantu bose bo mu muryango wanjye

Bapfuye

Nashakishije hose ku misozi, imirambo yabo.

Ntaho ntarebye

Hari aho nageze nsanga abantu batemaguwe bavugana

Umwe abaza undi ati

Mbese wowe nturapfa?

Naje kugwa ku murambo wa mama

Agihetse mushiki wanjye muto

Ku mugongo

Bombi bari bapfuye

Iruhande rwa mama hari harambaraye mukuru wanjye

We yari agihumeka

Nabonye ko mama yari agiye kuribwa n’imbwa

Kandi yarampaye ibere

Nta myambaro yari agifite

Numvise nihebye.

Ubu buhamya bwa ‘Rwanda 94’, ni ikimenyetso cy’uko hari abantu badashobora guhungabanywa no kuguma mu rugo bitewe no gusabwa kubikora kugira ngo hirindwe icyorezo.

Abanyarwanda babaye muri ubu buzima bugaragazwa mu ishusho y’abatangabuhamya bo muri ‘Rwanda 94’ ntibashobora guhungabanywa n’amabwiriza agamije kurengera ubuzima bwabo. Ni amabwiriza atandukanye n’ayatanzwe na Minisitiri w’Ingabo ku wa 6 Mata 1994 ategeka Abanyarwanda kutava mu ngo zabo nk’uburyo bwo koroshya ikorwa rya Jenoside. Abakuru bari mu Rwanda barabyibuka.

Uretse n’abahigwaga, abanyarwanda batagira ingano baraye rwantambi n’ubwo bitagira ihuriro n’iby’abahigwaga mu gihe cya Jenoside yakorerwaga Abatutsi hagati ya Mata na Nyakanga 1994. Abantu bagenje amaguru ibirometero amagana n’ibihumbi ntibakangwa no kuguma mu rugo kubera kurinda ubuzima bwabo n’ubw’abandi.

Ntibizongere

Igice cya Kabiri cy’uyu mukino cyitwa ‘Mwaramutse’. Muri iki gice hari aho uwo bise ‘Umwangavu’ aganya agira ati:

Impinja, abana, abagore, abagabo

Abo bantu ba Rurema bazize iki?

Iryo si itsembabwoko?

Gupfira gushira, rirandurana imizi n’imiganda!

Iki gice gisozwa n’icyaba igisubizo ku kibazo cyabaye. Jenoside. Bati: “Gusa niba dushaka ko ya ntero yamamaye ngo “Ntibizongere kubaho ukundi” idahera mu magambo, tugomba no gutekereza kw’ijambo ry’uriya mwangavu: Ni kuki?”

Uwo bise Madamu Bee Bee Bee, umunyamakuru w’ikirangirire, ni we utanga igisubizo, agatangira yibaza ati:

Ni kuki?

Nta jambo risoza twabona riruta iri.

Bantu mudukurikira, ndumva nta mahoro mfite,

Kandi nzi ko namwe ari uko.

Abagabo abagore bishwe

Ntibaduhaye amahitamo.

Barabaza impamvu.

Batezeho, bantezeho isezerano ridakuka.

Iryo sezerano ndifatiye imbere yanyu uyu munsi.

Abishwe bo

Mbabwiye nicishije bugufi ko ku bw’ububabare bagize

Nzaharanira ukuri

Nkoresheje ububasha bwose mfite.

Ndaritse buri wese ku mugaragaro,

Uriho n’uwishwe.

Tuzahure, tujegajeze gahunda zimenyerewe za televiziyo,

Maze dushakishe impamvu z’aya mahano ntaho tubogamiye.

Uku kwiyemeza kw’umunyamakuru, ni ikintu gikomeye kubera uruhare rw’itangazamakuru mu kwenyegeza Jenoside ari mbere na nyuma yayo. Ni n’itangazamakuru rigira uruhare rukomeye mu kurwanya icyo cyago cya Jenoside.

Na RTV izunge mu rya Bee Bee Bee ijegajeze gahunda itwereke uyu mukino urimo byinshi mu mateka yacu, cyane cyane ibyashenye ubunyarwanda bikagera mu Rwanda rwa 1994. Ibyo byafasha kwirinda Koronavirusi tubifatanyije no kurwanya jenoside cyane ko ari umwihariko wacu uhoraho.

Uwarwanyije Jenoside mu Rwanda akayitsinda, ni nawe urwanya Koronavirusi kandi byanze bikunze na yo azayitsinda. Ubukana bwa Koronavirusi mu Rwanda ntaho buhuriye n’ubwa Jenoside yo gahora itsindwa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .