00:00:00 IGIHE NETWORK KN KINYARWANDA EN ENGLISH FR FRANCAIS

Ubusahuzi, kwisanisha n’abanyamahanga, bimwe mu bisubiza Afurika inyuma

Yanditswe na Ferdinand Maniraguha
Kuya 9 July 2016 saa 09:06
Yasuwe :

Abantu bose,mu bihugu n’imigabane binyuranye, bahora bashaka icyabateza imbere cyangwa icyatuma imibereho yabo irushaho kuba myiza.

Niyo mpamvu, ku nzego no mu buryo bunyuranye, hafatwa ingamba zitandukanye kugira ngo ibyo bifuza kubona bashobore kubigeraho, mu gihe kigufi, kiringaniye cyangwa kirekire.

Uko isi iteye muri ibi bihe, mu mibanire n’imikoranire y’abantu mu nzira y’iterambere n’imibereho myiza, biraboneka ko Abanyafurika hari byinshi batarageraho muri rusange, ugereranije n’aho abandi bantu ku yindi migabane bageze. Kugira ngo ibintu bishobore guhinduka bigana aheza rero bigasaba ko Abanyafurika bafata ingamba zihamye kandi zirambye kugira ngo ubuzima bwabo bumere neza uko bifuza.

Muri iyi nyandiko, ku buryo buvunaguye, nifuje kugaragaza zimwe mu ngamba zashobora gufatwa n’Abanyafurika ubwabo, cyane cyane uhereye ku bayobozi, kuko aribo bafite uruhare rukomeye mu gufasha abaturage kubona ibisubizo by’ibibazo bahura nabyo, kugeza ku baturage ubwabo, kuko ibyiza byose byifuzwa kugerwaho bigomba gushingira kubyo abaturage bashaka ndetse ibyiza bigezweho bikagaragarira mu mibereho yabo ya buri munsi kandi ku buryo burambye.

Mu ngamba nyinshi kandi zinyuranye, abantu bashobora kugaragaza ku buryo butandukanye, zigomba gufatwa kugira ngo Abanyafurika, muri rusange, nabo barusheho kubaho neza. Muri izo ngamba, dushobora kuvuga nk’izi zikurikira:

Kwibohora mu mitekerereze n’imyumvire

Kubera ahari ubukoloni Abanyafurika babayemo usanga hari benshi bibwira ko ibitekerezo by’abantu bo mu bihugu by’abari barakolonije Afurika aribyo buri gihe biba bifite agaciro kandi bagashaka kumva no gufata ibintu kimwe nabo.

Hari Abanyafurika usanga bafata Abazungu nk’aho bafite ubuhanga n’ubushobozi karemano birenze iby’abandi bantu. Imitekerereze nk’iyo rero ituma abayifite mu Banyafurika batiha agaciro mu bushobozi bwabo bwite, ahubwo ugasanga bitabaza abo bo hanze mu bikorwa bashoboraga kugeraho ku buryo buhendutse baramutse bitabaje Abanyafurika bagenzi babo!

Ikindi umuntu atabura kuvuga ni ibirebana n’imyemerere. Muri Afurika y’Abirabura usanga mu rwego rw’imyemerere n’amadini hagaragara igisa no gukwirakwiza no guteza imbere imico y’Abanyaburayi (n’Amerika y’Amajyaruguru) hatitawe ku mico myiza y’ Abanyafurika.

Muby’ukuri, uretse gushaka gukandamiza (domination) abandi no gukwirakwiza imico yabo, bityo bakaba babibonamo inyungu zinyuranye ku buryo buziguye, nta yindi mpamvu yatuma umuntu aturuka hanze y’Afurika agashaka guhindura Abanyafurika ngo binjire mu idini ye, kandi nabo basanzwe bafite amadini yabo bakuriyemo.

Ngo amadini yabaye nk’ubushabitsi (business), kandi wareba ugasanga ubwo bushabitsi ahanini n’abandi batari Abanyafurika.

Kurenga imbibi z’indimi zasizwe n’abakoloni

Ururimi ni kimwe mu biranga umuco w’abantu. Uretse indimi zasizwe n’abakolonije Afurika mu bice binyuranye, Abanyafurika bari basanzwe bafite kandi n’ubu baracyafite indimi zabo zibahuza. Ariko igitangaza ni uko usanga ahenshi bahitamo gukoresha izo ndimi zasizwe n’abakoloni kugira ngo bashobore kumvikana hagati yabo! None se ni kuki Abanyafurika batita ku kwiga no kwigisha indimi zabo ngo abe ari zo bakoresha kandi zibahuze hagati yabo.

Yego ntitwakwirengagiza ko Afurika ari nini kandi igizwe n’ibice bitandukanye, ariko rero hari indimi zivugwa n’abantu benshi, ukurikije ibice binyuranye by’Afurika (urugero: Swahili, Haoussa, Mandingue, Peul n’izindi zizishamikiyeho, Arabe, Kinyarwanda, n’izindi.), ku buryo zitaweho kandi zikigishwa, mu bihe biri imbere benshi mu Banyafurika bashobora kuba bajya bashyikirana hagati yabo bitabaye ngombwa ko bakoresha indimi zo hanze y’Afurika.

Izo z’abanyamahanga nazo kuzimenya si bibi, ariko zajya zikoreshwa gusa igihe bibaye ngombwa kandi bitewe n’inyungu Abanyafurika babifitemo!

Dr Gasana Sebastien

Kutajya gushaka hanze y’Afurika ibyo bashobora kubona muri Afurika

Kubera ahanini imyumvire umuntu yakeka ko isa n’ishingiye ku bisigisigi by’ubukoloni, ni kenshi Abanyafurika bajya gushaka hanze yayo ibyo bashobora kubona muri Afurika. Nyamara akenshi ugasanga bibahenda cyane, cyangwa se n’ibyo bazanye bikazaboneka ko bidasubiza neza ibibazo byabo!

Ingero ni nyinshi: Hari ubwo Abanyafurika bazana abanyamahanga nk’abahanga (experts) ngo baze kubaha amasomo yo gukemura ibibazo bafite, nyamara ibisubizo bahawe ugasanga bitajyanye by’ukuri n’ibyo bifuzaga. Urundi rugero rumwe, muri nyinshi, umuntu yatanga ni nko kujya kwiga hanze y’Afurika, kandi ku buryo burushijeho guhenda, ibyo umuntu yashoboraga kwigira muri Afurika (mu gihugu kindi wenda kinyuranye n’icyo akomokamo) ku buryo buhendutse; kandi ibyigwa hombi bikaba bifite ireme cyangwa agaciro kamwe.

Kudasahura umutungo w’Afurika ngo ujye guhishwa hanze

Afurika ni umugabane munini kandi ufite umutungo kamere mwinshi ndetse unyuranye. Dusubije amaso inyuma tukareba amateka y’Isi hari ibintu bimwe dusanga byaragiye bigira ingaruka mbi ku iterambere ry’Afurika. Bimwe muri ibyo twavuga nk’ubucuruzi bw’abacakara, guca ibice mu Banyafurika, ubukoloni n’ibindi.

Ikibabaza cyane kandi kikanatangaza ni ukubona ukuntu kugeza na n’ubu umutungo w’Afurika wakagombye mbere na mbere guteza imbere Abanyafurika ukomeza gusahurwa n’abanyamahanga ndetse na bamwe mu Banyafurika ubwabo bitwara nk’abacancuro. Uwo mutungo wibwe ukajya guhishwa no gukiza abanyamahanga.

Muri urwo rwego rw’ubusahuzi, ababikurikirira hafi bemeza ko kugeza ubu umutungo urenze miliyari 60 z’amadolari y’Amerika usohoka muri Afurika buri mwaka ku buryo bunyuranije n’amategeko. Ibyo rero ni ikibazo gikomeye kandi kibangamiye cyane iterambere ry’Afurika, ku buryo niba hadafashwe ingamba zihamye ngo ibyo biveho ibintu byazakomeza kugorana.

Guteza imbere imibanire, imigenderanire n’ubuhahirane hagati y’Abanyafurika: Abayobozi, ku nzego zinyuranye, uhereye hejuru kugeza hasi, mu bihugu by’Afurika bagomba gukora ibishoboka byose kugira ngo Abanyafurika bamenyane neza kandi babane mu mahoro. Ibyo bikaba byashoboka ari uko abaturage b’Afurika boroherejwe uburyo bwo kugenderana no kumenyana, ndetse n’itangazamakuru rikabigiramo uruhare kuko ahanini usanga Abanyafurika bamenya amakuru areba abanyamahanga ba kure y’Afurika ariko nyamara ibibera iwabo cyangwa mu baturanyi batabizi.

Abanyafurika nibamenyana neza kandi bakagenderana bitabagoye cyane, bizatuma bamenya ibyiza byihariye biri mu bice binyuranye by’Afurika, bityo habe habaho ubufatanye n’ubuhahirane hagati y’abaturage babyo, maze buri ruhande rube rwarushaho gutera imbere. Nta mpamvu n’imwe ifatika yakagombye gutuma Abanyafurika bishishanya cyangwa bashyamirana, kuko iyo urebye neza usanga akenshi abanyamahanga baba babiri inyuma baba batifuza ko Abanyafurika batekana, bakamenyana neza kandi bagafashanya, bityo bakaba bashobora guteza imbere imibereho myiza yabo.

Mu kwanzura, tukaba twavuga ko, ku buryo buhinnye, twashatse kwerekana bimwe muri byinshi byihutirwa kugira ngo Abanyafurika bashobore kuba bagira imibereho myiza. Ibi bikaba byashoboka ari uko bagize ibyo bahindura mu mitekerereze n’imyitwarire yabo, ndetse hakaba n’ibyo bagomba kwitaho ku buryo bwihariye, kuko ibyiza bifuza ari nta munyamahanga uzabibagezaho uretse bo ubwabo.

Dr. Gasana Sebastien
Umwarimu muri UNIK (University of Kibungo, Ex-INATEK)


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .