00:00:00 IGIHE NETWORK KN KINYARWANDA EN ENGLISH FR FRANCAIS

Ibyigomeke byanze kugomera u Rwanda

Yanditswe na Ntwari Pie
Kuya 4 July 2020 saa 07:11
Yasuwe :

Ishyaka n’ubutwari byaranze abagize uruhare mu rugamba rwo kubohora igihugu byavuzweho kenshi ndetse bikorerwa isesengura n’inzobere nyinshi ku buryo kubigarukaho kwanjye byaba ari ukwigira Nyabukondogoro. Ni urugamba rusumba izindi mu zo nabashije kumenya jye.

Birashoboka cyane ko umuntu wese utaragize uruhare muri uru rugamba kandi abishoboye yabona urwitwazo ariko n’uwashaka guta umwanya yajya gucukumbura ngo amenye ishingiro ry’urwo rwitwazo. Buri muntu agira kami k’umutima we. Kami ni yo kamere. Iyo kamere iremerewe n’impamvu itari ihomvu, kami yimika ubundi bwami inkenzi zakita kwigomeka ariko hari igihe atari byo.

Buri wese mu basoma iyi nkuru yagize ingobyi ebyiri, iyamuhetse n’iyamuhekeye ababyeyi cyangwa abasekuruza. Nta kibi nko kugerwa ingobyi, wamara gufureba ikabyazwa cyangwa ukayikurwamo. Nguko uko u Rwanda rwahiriye bamwe rukarurira abandi.

Reka uyu munsi nkeze abasore n’inkumi, abahungu n’abakobwa atari uko nibagiwe uruhare rw’abari bababyaye n’abari babakuriye, baharaniye amahoro dufite uyu munsi. Banyemerere mbite “ibyigomeke byanze kugomera u Rwanda.”

Nubishaka uge usubiramo iyi nyikirizo nyuma ya buri mukarago:

“Nkeje mwe mwese mwabohoye u Rwanda, mugasubiza imbehe imbohe.”

Ndashima abana bataye ishuri
Banze uburezi burimo uburozi
Banze imungu yari mu mpugu mpungiro
Bakagana inzira nyamata igana amata n’ubuki.

Ndashima ingimbi n’abangavu bari bakimenya kwandika
Bagahera ku dukete dutyaye, bakandikira iwabo ko batabaye
Bakandikisha wino ihanda ariko ihandura inguma ku mitima
Batazi ko bazongera kubonana n’abo bandikira.

Ndashima ko mu bwana bwanyu mwanze kumwarwa
Impuruza yaba ndende mugakanga urugendo umurindi
Imihogo ibura amazi mwanga guhogoza kandi muhimbajwe n’injunga
Uwiteka abanga ingata abikoreza uwo mutwaro muri bato.

Ndabakeje mwe mwagobotse ingobyi mutizigamye
Mugasiga iwanyu inka zihaka, mugasiga izindi zonsa
Mutazi neza ko muzongera kubona inkongoro n’uruhimbi
Mwanze igitugu cy’amahanga mufite intugu zibereye imiheto.

Ndabakeje ku bw’amajoro ajigije mwagenze
Amajeri yakijujura ijoro rijigije aho kwijujuta mukivuga
Amano yanyu agahora ashiburira intamwe gukera urugamba
Amaherezo muzi ko ari urufunzo mudafunze, imyobo mutari ifuku.

Ndabakeje kuko mwari mufite uririmi ruzira uburimi
Inkotanyi z’ukuri kutarimo ikorosi, impamvu itari ihomvu
Iz’Amarere amasimbi yumvise akisimbiza akavuna sambwe
Ingabo ziganje amakombe yagize ubukombe ibikombe bikabayoboka.

Ndabakeje kuko mwari bato b’imena zitamena ibanga
B’imfura zitarimo ibifura, indobanure mu ndengabaganizi
B’indatwa n’inyamibwa biyemeje kwambika ikamba urwa Gihanga kuko
Bagombaga kurutaha ngo barutake, barurinde gucumura ku muco ukundi.

Ndabakeje mwe mwakunze inkano-ngamba kurusha ishati-ntirano
Erega izo nkano nicyo gishoro igihugu gikesha gushinga mu bushorishori
Erega izo nkano nizo zitumye za nkunguzi z’ibikoko zitakirangurura
Erega izo nkano ni nazo zatumye Gakima akamirwa Gashonga agashora.

Mbaragije Rugira wabahaye ubugiri n’ubugingo mukaba mukigimbuka
Abarinde inyuma y’ishyamba ukundi, ni ishyano mwadushyiguye
Atoneshe kandi arinde abana barwo gutonekara ukundi
Arugwizemo ishya maze ihwa ryahanze u Rwanda rihone by’iteka.

Umunsi mwiza wo kwibohora.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .