Ku nshuro yaryo ya 23, Iserukiramuco Nyafurika rya Sinema Fespaco ryafunguwe ku mugaragaro I Ouagadougou muri Burkina Faso ku gicamunsi cyo kuri uyu wa Gatandatu. Muri iri serukiramuco filimi nyafurika zihatanira ibihembo bitandukanye. Umwe mu bagize akanama nkemurampaka muri Fespaco y’uyu mwaka ni umunyarwandakazi.

Ni ku nshuro ya mbere umwenegihugu w’u Rwanda abashije gutoranywa nk’umwe mu bagize akanama nkemurampaka (Jury) muri Fespaco, iserukiramuco rirusha andi gukomera mu rwego rwa sinema muri furika.

Jolie Claudine Murenzi ni we watoranyijwe nk’umwe mu bagize akanama nkemurampaka kaba kagizwe n’inzobere z’indobanure muri sinema no mu bindi bikorwa by’ubuhanzi zo hirya no hino ku isi. Mu bandi bafatanyije harimo nka Papa Wemba, umuririmbyi wo muri Congo Kinshasa unazwi muri filimi "La Vie est Belle", Jean Paul Gaultier, umunyamideri w’umufaransa, Guadalupe Arensburg ukuriye igice gishinzwe filimi ngufi muri Canal Plus n’abandi.

Uyu mutegarugori asanzwe afite uburambe n’inararibonye mu mwuga wa sinema mu Rwanda, dore ko nyinshi muri filimi zagiye zikorerwa cyangwa zigakinirwa hano mu gihugu yagiye azigiramo uruhare runini; muri zo harimo filimi yahawe ibihembo bitandukanye “Kinyarwanda”, “Zone Turquoise”, "Shake Hands with the Devil", "The Day God Walked Away", "Black Out" n’izindi nyinshi.

Jolie Claudine Murenzi muri Stade yitiriwe tariki ya 4 Kanama ahabereye imihango yo gutangiza ku mugaragaro Fespaco 2013

Mu kiganiro yagiranye na IGIHE, Jolie Murenzi yadutangarije ko kuba abategura Fespaco baramuhisemo nk’umwe mu bagize akanama nkemurampaka yabyakiriye neza.

Tumubajije ikigenderwaho ngo hatoranywe abagize akanama nkemurampaka muri Fespaco yagize ati "Bahitamo abantu bakurikije uburambe bafite mu mwuga wa sinema cyangwa undi ufite aho uhuriye n’ubuhanzi."

Madamu Jolie Murenzi yadutangarije ko kuri ubu igihugu cya Burkina Faso gisigaye gifite umubano wihariye n’u Rwanda mu birebana n’ubutwererane ndetse n’ubufatanye mu by’umuco, nyuma y’aho umuryango uharanira guteza imbere ubugeni n’ubuhanzi “Rwanda Arts Initiative” abareye umwe mu bayobozi , yitabiriye Iserukiramuco Récréâtrales ryabereye I Ouagadougou guhera tariki ya 2 kugeza ku ya 8 Ugushyingo umwaka ushize, ndetse icyo gihe hasinywa amasezerano y’ubufatanye hagati y’abahanzi bo muri icyo gihugu n’abo mu Rwanda, na Minisiteri zifite umuco mu nshingano zazo mu bihugu byombi zarandikiranye zigaragarizanya kwishimira umubano ushingiye ku muco hagati y’ibihugu byombi.

Si ibyo kandi gusa kuko no mu minsi ishize itsinda riturutse muri Burkina Faso ryitabiriye inama ku buryo ubugeni bwarushaho gutezwa imbere mu Rwanda bukarushaho kubera benshi isoko y’ubukire, iyi nama nayo yari yateguwe na Rwanda Arts Initiative ku bufatanye na WDA.

Fespaco iba rimwe buri myaka ibiri, yashinzwe mu mwaka wa 1969, kuri ubu igeze ku nshuro yayo ya 23. Imihango yo gutangiza iri serukiramuco yabereye muri Stade yitiriwe itariki ya 4 Kanama, ari nayo nini muri iki gihugu.