Samusure yatangiye gusohora filime ye bwite y’uruhererekane akinanamo na Mukarujanga

Yanditswe na Nsengiyumva Emmy
Kuya 6 Nzeri 2019 saa 09:50
Yasuwe :
0 0

Kalisa Ernest, umwe mu bakinnyi ba filime nyarwanda bakomeye ndetse bakunzwe n’abatari bacye. Ubusanzwe uyu mugabo ni umusizi, umuhanzi, umusangiza w’amagambo n’ibindi.

Yamenyekanye nka Samusure, Rulinda ndetse n’andi mazina yagiye ahabwa kubera filime yagiye akina, kuri ubu uyu mugabo yamaze gutangiza filime ye y’uruhererekane.

Samusure avuga ko yavuye iwabo i Bugarama mu karere ka Rusizi akajya i Kigali, aho yakoze imirimo myinshi inyuranye, muri iyo hakabamo uwo kuba umuboyi yanakoze igihe kirekire, agitangira akaba yarahembwaga amafaranga y’u Rwanda 700. Mu mujyi wa Kigali kandi yahakoze indi mirimo itandukanye, dore ko yanabaye umunyonzi, agakora mu kabari, akaba mucoma, umwogoshi n’ibindi bitandukanye, iyo muganira gusa akubwira ko iyi ari imirimo yubaha cyane.

Uyu wabaye icyamamare muri sinema y’u Rwanda ahamya ko ubuzima bwe bwo gukina sinema bwatangijwe na Kanyombya wari inshuti ye banabana mu gace kamwe. Uwitwa Charles Habyarimana wari uzi ibya sinema, ngo yagize igitekerezo cyo gushyiraho ikinamico izajya inyura kuri televiziyo ahamagara Kanyombya amusaba kumushakira abakinnyi, nawe araza abwira Samusure wari utarahindura amazina.

Muri iyo minsi nibwo abakinnyi nka Nyirakanyana, Nyagahene, Kanuma, Mukarujanga babonetse batangira gukora filime igamije kurwanya igituntu yanyuraga kuri televiziyo y’igihugu ari naho yakuye iri zina (Samusure), nyuma akomeza no mu zindi Filime.

Samusure avuga ko ubu sinema ari ikintu kimutunze kuko nta kandi kazi akora, akavuga ko yumva amaze kuyigiramo ubunararibonye buhagije ku buryo nawe asigaye akosora nyinshi muri filime zikinirwa mu Rwanda. Usibye gukora iz’abandi uyu mugabo kuri ubu yatangiye gukora filime ye y’uruhererekane yise “Mahindu” izajya ica kuri sheni ye ya Youtube.

Tuganira kuri iyi filime yatangiye anyomoza umunyamakuru wari umubajije niba ataba yiganye Niyitegeka Gratien bakinana muri Seburikoko ubu ufite indi filime ye yamamaye yitwa ‘Papa Sava’.

Yagize ati “Nta muntu n’umwe niganye. Oya ni igitekerezo maranye igihe ahubwo ni uko hari igihe umuntu atekereza gukora igikorwa nk’iki ariko ubushobozi ntibuhite bukunda, ubu rero nsa numaze kwisuganya ndavuga nti ka ndebe ko nakabya inzozi zanjye.”

Abajijwe ku nyigisho ziri muri iyi filime ye nshya “Mahindu” uyu mugabo Samusure yabwiye IGIHE ko ari filime izumvikanamo inyigisho zitandukanye z’ubuzima bwa buri munsi muri sosiyete y’u Rwanda. Abajijwe igihe iyi filime ateganya ko izarangirira yatangaje ko ari filime y’uruhererekane na we atamenya ngo izarangira ryari.

Samusure ahamya ko iyi ari filime ye izajya ica no kuri shene ya Youtube, agahamya ko abonye nka televiziyo ishaka kunyuzaho filime ye bakumvikana cyane ko yaba ari indi nyongera yaba abonye.

Muri iyi filime (Mahindu) umwe mu bakinnyi bakinana na Samusure harimo na Mukarujanga ukina nk’umugore we, uyu bakaba bamaze kumenyerana cyane ko bajya kumenyekana bose bakinanaga muri filime zitandukanye.

Samusure na Mukarujanga bakinanye muri filime nyinshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza