Netflix ntitewe ubwoba na Disney Plus, uburyo bushya ku isoko rya sinema kuri internet

Yanditswe na Iradukunda Serge
Kuya 12 Ugushyingo 2019 saa 05:11
Yasuwe :
0 0

Umuyobozi Mukuru w’Ikigo cy’Abanyamerika cyerekana amashusho binyuze kuri internet, Netflix, yatangaje ko nta bwoba atewe n’uburyo bushya Ikigo gikora filimi cya The Walt Disney Company cyashyize hanze buzwi nka Disney Plus.

Ubu buryo bwa ‘Disney plus’ bwashyizwe hanze kuri uyu wa 12 Ugushyingo 2019 buzafasha abakoresha internet kureba filimi ngufi, iz’uruhererekane n’ibiganiro bikorwa n’inzu zitunganya filimi zitandukanye igihe baba bishyuye ifatabuguzi ry’ukwezi cyangwa umwaka, ubucuruzi Netflix nayo yari isanzwe ikora.

Umuyobozi wa Netflix, Wilmot Reed Hastings Jr., yavuze ko nta bwoba atewe n’ihangana Disney Plus ishobora kuzana ku kigo ayobora.

Yagize ati “Sinavuga ko baduhangayikishije ahubwo turabishimira”. Yongeyeho ko na we azishyura kugira ngo ajye areba Disney plus.

Hastings yavuze ko ahubwo bizabafasha gukora cyane no guhanga udushya.

Ibi abivuze nyuma y’uko abenshi babona ubu buryo bushya bwa Disney Plus nk’ubuje gukoma mu nkokora ubucuruzi bwari busanzwe bukorwa na Netflix ku bijyanye no kureba amashusho cyane cyane aya sinema binyuze kuri internet.

Kuri Disney plus abantu bazafashwa kureba filimi z’ikorwa n’inzu zikomeye zirimo Marvel, Pixar, Star Wars na 20th Century Fox. Bizajya bisaba kwishyura amadorali 6.99 ku kwezi cyangwa 69.99 ku mwaka.

Netflix yari isanzwe yihariye isoko rinini muri ubu bucuruzi bwo kwerekana amashusho binyuze kuri internet, kuko ku Isi yose ikurikiranwa n’abasaga miliyoni 165 ariko abasesenguzi bakaba basanga ivuka ry’ibindi bigo nka Prime video, Apple Tv plus na Disney Plus nabyo bikora ubucuruzi busa nk’ubu bizazana ihangana ku isoko bikaba byatuma Netflix ibura umubare munini w’abakiliya bayo.

Umuyobozi wa Netflix, Wilmot Reed Hastings Jr., yavuze ko nta bwoba atewe n’ihangana Disney plus ishobora kuzana ku kigo ayobora.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza