Filime yakomotse ku gitabo cya Mukasonga yerekanywe muri ’Toronto International Film Festival ’

Yanditswe na Nsengiyumva Emmy
Kuya 8 Nzeri 2019 saa 07:54
Yasuwe :
0 0

‘Our Lady of the Nile’ ni filime yakozwe hagendewe ku gitabo cya Scholastique Mukasonga yasohoye muri 2012 kivuga ku ivanguramoko ryaje kubyara Jenoside yakorewe Abatutsi muri 1994.

Iyo filime yerekanywe mu iserukiramuco rya filime rikomeye rya Toronto International Film Festival muri Canada ryatangiye guhera tariki 5 Nzeri uyu mwaka.

Scholastique Mukasonga ni umwanditsi wavukiye mu Rwanda, igitabo cye “Notre-Dame, du Nil” ntabwo kivuga cyane kuri Jenoside yakorewe Abatutsi mu 1994, ahubwo kigaruka ku ivangura, ubukoroni n’ubushyamirane bushingiye ku bukungu ari byo byazanye umwuka mubi w’urwango no kutarebana neza mu banyarwanda bigaha icyuho Jenoside yakorewe Abatutsi mu 1994.

Akoresheje urugero rw’ishuri gatolika ry’abakobwa gusa “Notre-Dame du Nil”, asobanura neza uburyo imbuto z’urwango rw’amoko zatewe, zikuhirirwa kugeza ubwo zemerewe no kubyara imbuto.

Filime ishingiye kuri iki gitabo yiswe ’Our Lady of the Nile’ yari itegerejwe na benshi; filime igaragaza amagorwa ashingiye ku moko n’uburyo yaje kubyara amateka mabi ya Jenoside yakorewe Abatutsi mu 1994 igahitana abarenga Miliyoni mu gihe cy’amezi atatu gusa.

“Our Lady of the Nile” yatangiye gukurura bimwe mu bigo bicuruza filime bikomeye ku isi nyuma yo kwerekanwa muri 2019 Toronto Film Festival.

Atiq Rahimi ukomoka muri Afghanistan niwe wayoboye iyi filime, yerekana ishuri Notre-Dame du Nil ryo mu mwaka wa 1973, abanyeshuri b’abakobwa bambaye impuzankano, abenshi bakomoka mu miryango ikize y’abahutu. Ishuri ryemera gusa 10% b’abatutsi kuba baza kwigamo.

Imwe mu mirimo y’abanyeshuri ya buri munsi harimo guhinga imboga, gutunganya no kubika neza impapuro ndetse no guhanagura ishusho ya Bikiramariya.

Ibindi bivugwa muri iyi filime ni uburyo umukobwa utwaye inda nta mugabo yafatwaga nabi, kwiringira abapfumu, inyigisho zivuguruzanya z’ubumenyi (science) n’iz’amadini, hagamijwe kugaragaza uburyo umuco wagiye wivanga n’ibyazanwe n’abakoloni.

Iyi nkuru y’uburyo uruhande rumwe rwabaga rutunga agatoki urundi buri wese yita undi ko ari mubi, bisa neza n’amarangamutima ari mu Burayi na Amerika yo kwanga abimukira.

Muri iyi filime hagaragaramo Gloriosa (Albina Sydney Kirenga), umunyeshuri w’umuhutukazi uba wanga abatutsi cyane, ahora acunaguza izuru ry’ikibumbano cya Bikiramariya avuga ko rimeze nk’iry’abatutsi. Umunsi umwe afatanya na mugenzi we Modesta (Belinda Rubango Simbi), yurira iryo shusho mu gicuku ngo arihe izuru rya ’rubanda nyamwinshi’.

Mu gihe bamaze gukuraho izuru kuri ya shusho bakagwa mu byondo, Gloriosa yahise ahimba inkuru y’uko atorotse agatsiko k’abatutsi kari kamuteye, bituma abasirikare baza kurinda abanyeshuri. Nyuma y’icyo kinyoma cya Gloriose cyageze no mu binyamakuru, urwango rwa Gloriose rwavuyemo icyifuzo cyo kwirukana abatutsi mu mashuri.

Iki gitabo cyasohotse mu 2012, cyanahawe ibihembo mpuzamahanga bibiri ari byo Prix Renaudot na Prix Ahmadou Kourouma. Nyuma y’igihe iki gitabo gisohotse, ikigo gikora filime cyitwa Les Films du Tambour kiyobowe na Marie Legrand na Rani Massalha, bari kumwe n’umuhanga mu gutunganya filime Atiq Rahimi, baje mu Rwanda gukora filime ishingiye kuri iki gitabo.

Iyi filime yakiniwe mu Karere ka Musanze no muri Rutsiro ku ishuri rya Murunda, igaragarano abakobwa b’abanyarwandakazi bagera kuri 20 barimo Amanda Mugabekazi, Malaika Uwamahoro, Albina Sydney Kirenga na Clariella Bizimana.

Iyi filime yerekanywe mu iserukiramuco rikomeye rya Toronto International Film Festival muri Canada.

Iri serukiramuco riri kuba ku nshuro ya 44 ryatangiye tariki 5 rikazasozwa tariki 15 Nzeri 2019. Riri mu maserukimuco yitabirwa cyane ku Isi aho byibuze abagera ku bihumbi 480 barigeramo.

Ni ku nshuro ya mbere iyi filime izaba yerekanywe. Iri serukiramuco kandi ryanerekaniwemo filime ya “Mercy Of The Jungle” y’umunyarwanda Joel Karekezi umaze kubona ibihembo byinshi kubera yo.

Iyi filime yakomotse ku gitabo cy'umunyarwandakazi Mukasonga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza