Ibyo wamenya kuri filime Umutoma yakinywemo na Bamporiki

Yanditswe na Muvunyi Arsène
Kuya 13 Nyakanga 2019 saa 01:45
Yasuwe :
0 0

Ku nshuro ya kabiri i Kigali herekanywe filime yiswe “Umutoma” ishingiye ku nkuru mpamo y’urukundo, ikaba igaragaramo abakinnyi barimo Edouard Bamporiki uyobora Itorero ry’Igihugu.

“Umutoma” yerekanywe mu ijoro ryo kuri uyu wa Kane mu gutangiza igikorwa cyiswe Hapa Night cyo kwerekana filime zakozwe n’abanyarwanda.

Ucyumva ijambo “umutoma” ntiwashidikanya ko iyi filime ivuga ku ngingo y’urukundo ndetse yumvikanamo amagambo asize umunyu umusore abwira umukunzi.

Iyi filime yagiye hanze mu 2014 yakozwe na John Kwezi umwe mu barambye mu mwuga wa sinema mu Rwanda, ikaba imara iminota 72.

Abakinnyi bayo b’imena harimo Edouard Bamporiki ukina nka Richard, Kate Katabarwa ukina nka Bwiza na Ngendahayo Nkusi Yves ukina nka Mario.

Ivuga ku mukobwa witwa Bwiza uba warakunzwe n’abasore babiri ariko akagorwa no guhitamo uwo bakundana bya nyabyo.

Uwa mbere ni uwitwa Richard baba barakundanye kuva mu bwana na Mario baba baramenyanye bakuze.

Richard aba ari umusore udakize dore ko aba ari umukanishi w’imodoka ndetse n’umuhanga mu gushimisha umukunzi we akoresheje imitoma.

Mario aba ari umukire, utendeka, ufite abandi bakobwa aryamana nabo ariko anakunda Bwiza uba ushinzwe kwakira amafaranga mu kabari.

Buri musore ukundana Bwiza aba afite umwihariko we ku buryo ahora mu gihirahiro yibaza umukunda bya nyabyo.

Umunsi umwe yiyemeza kubahuriza hamwe ngo ababwize ukuri, ariko abuze amahitamo ahubwo abasore bagatahana uburakari bw’uko abatendeka.

Umunota wa 72 ugera umukobwa afashe icyemezo cyo gutera umugongo Richard yakunze kuva mu bwana, agasanga Mario wamukururishije ifaranga.

Imyitwarire ya Richard [Bamporiki] uba umeze nk’uwasajijwe n’urukundo, aho mu nganzo ahimba ibisigo by’umukobwa ni bimwe mu biryoshya iyi filime kandi bigasetsa abantu.

John Kwezi yabwiye IGIHE ko “Umutoma” ishingiye ku nkuru mpamo y’ibyamubayeho akiri umusore, aho yari yizeye ko ubuhanga bwe mu guhanga imivugo bwari kumufasha kubona umukunzi ariko abanyamafaranga ntibamworohere.

Iyi filime yerekanwe muri Luxor Africa film festival mu 2015 mu Misiri , ibona igihembo cya “Special mention award”. Yerekanywe kandi muri Ecrans Noirs Film festival muri Cameroon, Beijing Independent Film Festival, mu Bushinwa, Silicon Valley African Film muri Amerika na Maisha African film Festival yabereye muri Uganda.

Gahunda ya Hapa Night yatangijwe n’ikigo cya Hapa Media Center gitunganya filime z’abanyarwanda kinafasha abakinnyi ba filime kubona akazi [casting centre] aho kuri ubu gikorana n’abarenga 800.

Buri mugoroba wo ku wa kane hazajya herekanwa filime imwe yakozwe n’abanyarwanda mu rwego rwo kuzimenyekanisha no kuzikundisha abanyarwanda.

Bamporiki aba ateretesha imitoma ariko ntabone urukundo
Bamporiki yakinnye muri iyi filime ataraba umudepite
Bamwe mu bakinnyi ba filime bitabiriye igikorwa cya Hapa Night

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza