Ni mu gikorwa cyabereye muri Century Cinema Kigali, ku wa Gatandatu tariki 1 Kanama 2025.

Ubwo iki gikorwa cyo kwerekana filime cyarangiraga, umugore wa Clapton Kibonge, Ntambara Mutoni Jacky, yafashe umwanya ashimira umugabo we bari bahagararanye imbere y’imbaga yari yitabiriye.

Mu magambo ye amuhanze amaso, yagize ati “Ndamushimiye yatubereye intwari nk’umuryango. Ntewe ishema no kumubona aha uyu munsi. Uri guhinduka umuntu udasanzwe, ntewe ishema nawe. Isezerano nguhaye, nzakuba hafi muri byose. Ikindi mu gihe cyose nzaba nkiriho, nzakomeza ngukunde.”

Uretse umugore wa Kibonge, Ramjaane Joshua watangiranye urugendo rwo gusetsa n’uyu mugabo mu myaka irenga 10 ishize, na we yafashe ijambo amushimira ubwitange yagize mu bihe byari bigoye.

Ati “Twatangiranye twambara nabi ariko dutanga ibyishimo byari byarabuze. Ibintu byagiye biba ntabwo byabaye ku mpanuka, ni ubuntu bw’Imana.”

Iyi filime Clapton yamuritse igaruka ku mugabo w’umukire witwa Abdulkalim ukunda umukobwa wo mu cyaro witwa Sifa, ariko ashaka kumureshya kubera ubuhehesi.

Uyu mugabo aza kujyana uyu mukobwa mu rugo iwe ashaka kujya aca umugore we inyuma, ariko umugore we atangira gutoteza Sifa harimo no kumwiriza ubusa.

Bigera aho Abdulkalim agafata ku ngufu Sifa amusanze mu bwogero, ariko umukozi we warindaga urugo arabimenya ari na we wahamagaye inzego z’umutekano zifunga uwo mugabo.

Nyuma yo gufungwa, umugore we atangira gutoteza Sifa, amusaba ko yazashinja umugabo we ko ashaka kwaka gatanya ngo azegukane imitungo bari bafite.

Nyuma yo gutabaza umuryango wa Sifa, Se aza kuzana na musaza we Rubyogo baje kumubohoza itotezwa, ariko bahageze basanga wa mugore wamutotezaga ari nyina wari waramutanye na musaza we bakiri abana.

Iyi filime igaragaramo abakinnyi ba filime barimo Clapton Kibonge ukina ari Rubyogo, Ngabo Leon [Njuga] ukina yitwa Sarigoma, D’Amour Selemani ukina ari Se wa Sifa yitwa Muzehe Kamakuba, Rava Nelly akina ari Zamu, Aime Gad agakina ari Polisi.

Iki gikorwa cyo kumurika iyi filime cyitabiriwe n’ibyamarare muri sinema nka Dr. Nsabii, Bamenya, Mama Sava, Rusine, Mitsutsu, Bahati Makaca n’abandi. Hari kandi n’abazwi mu bindi byiciro by’imyidagaduro nka DJ Pius, Junior Giti, RunUp na Director Gad.

5K Etienne ni umwe mu bari bitabiriye

Bamenya ni umwe mu bashyigikiye Clapton ubwo yerekanaga filime ye nshya

Clapton Kibonge n'umugore we Ntambara Mutoni Jacky ubwo bageraga aherekaniwe iyi filime y'uyu mugabo nshya

Director Gad akurikiye filime ya Clapton Kibonge yise 'Deceiver'

DJ Pius yari mu bari bitabiriye

Dr Nsabii umaze kumenyekana muri sinema Nyarwanda ni umwe mu bari bitabiriye

Junior Giti n'umugore we Angel Muhoza bari bitabiriye

Iki gikorwa cyari cyitabiriwe na benshi bazwi mu myidagaduro

Kayumba Vianney wamamaye nka Manzi muri sinema Nyarwanda ni umwe mu bari bitabiriye igikorwa cyo kwerekanwa kwa filime nshya ya Clapton

Micky uri mu bakobwa bamaze kubaka izina muri sinema na we yari yitabiriye

Ntambara Mutoni Jacky yari yabukereye mu iyerekanwa rya filime nshya ya Kibonge

Nyuma yo kwerekana filime ye Clapton yafashe ijambo

Ramjaane Joshua wamamaye mu myaka irenga 10 ishize wanafashije cyane Clapton yavuze ko batangiye gukora urwenya kuri televiziyo mu bihe byari bikomeye

RunUp ubwo yageraga aherekaniwe filime ya Kibonge

Rusine na Mitsutsu bafatana ifoto

Ubwo Rusine Patrick n'umugore we bageraga muri Century Cinema Kigali herekaniwe filime ya Kibonge

Shemaryimanzi Dwane Emmy umaze kumenyekana muri sinema Nyarwanda cyane cyane muri filime zirimo 'Behind' na we ni umwe mu bari bitabiriye

Sifa Solange Lanny uri mu bakinnyi b'imena muri iyi filime ubwo yageraga aherekaniwe iyi filime

Ubwo Kibonge yerekanaga abakinnyi bagize uruhare muri filime ye nshya

Umugore wa Kibonge ari we Ntambara Mutoni Jacky yamwijeje kuzamukunda ubuziraherezo

Uhereye iburyo hari DJ Diddyman, Karake Patrick na Yves Mizero [Wayeem] bamaze kumenyekana kubera filime yitwa ‘Behind’ iri guca ibintu muri iki gihe

Amafoto: Esther Yassip