Inzu yerekana filimi yo mu mujyi wa Kigali, Century Cinema igiye kwerekana filime “The Unexpected Journey, “The desolation of Smaug” na “The Battle of The Five Armies” zigize inyabutatu The Hobbit y’inzobere mu gukora filimi, Peter Jackson.

Ku wa 11 Ukuboza , Century Cinema ikorera mu nyubako ya Kigali City Tower izerekana The Hobbit : Unexpected Journey na The hobbit : The Desolation of Smaug. Izo filimi ebyiri zose zarangije gusohoka.

Filimi nshya The Hobbit : The Battle of the Five Armies ari nayo ya nyuma mu nyabutatu The Hobbit Izamurikwa bwa mbere muri Century Cinema ku wa 12 Ukuboza.

I. The Hobbit : Unexpected Journey

The Hobbit: An Unexpected Journey ibara amateka ya Bilbo Baggins wisanga ari mu rugendo rwo gufasha kubohoza ubwami bw’ibikuri (dwarfs/nains) bwa Erebor buba bwarigaruriwe n’igikoko cyitwa Smaug.

Bilbo n’ibikuri 13 biyobowe n’indwanyi Thorin Oakenshield hamwe n’umupfumu Gandalf The Grey batangira urugendo berekeza ku musozi, Lonely Mountain, bahangana n’ibikoko by’umwijima .

Uretse ibikoko bitandukanye, mu rugendo bahura n’ingorane nyinshi. Banyuraga mu myobo munsi y’imisozi ari naho Bilbo ahurira nikiremwa Gollum akacyiba impeta imuha ububasha bwo kutagaragara mu maso y’abantu ariko ikamutera kuyirarikira bikabije n’ubugugu.

Iyo mpeta iba izaba isoko y’amateka maremare kandi akomeye muri ako karere nubwo we aba atarabimenya….

II. The Hobbit : The desolation of Smaug

Filimi ya kabiri mu nyabutatu The Hobbit ikomeza ivuga amateka ya Bilbo Baggins (ukinwa na Martin Freeman) , umupfumu Gandalf (Ian Mc Kellan) n’ibikuri 13 biyobowe na Thorin Oakenshield (Richard Armitage) mu bagamije kubohora ubwami bwa Erebor buba bwarigaruriwe n’igikoko Smaug.

III.The Hobbit : The Battle of The Five Armies

Ni iherezo ry’amateka ya Bilbo Baggins, Thorin Oakenshield n’ibikuri 13.

Igikoko Smaug cyirukanywe mu bwami bwa Erebor biruhanyije, cyagiye gutura umujinya abatuye umujyi wo ku kiyaga cyo muri ako gace (Lake-Town), icyo gikoko gicira umuriro, cyatwitse ibyo gisanze mu byose n’abawutuyemo.

Umupfumu Gandalf avumbura ko umwanzi ufite imbaraga z’umwijima Sauron w’ahitwa Mordor yohereje ingabo nyinshi zigizwe n’ibikoko byitwa Orcs ngo bitere umusozi, Lonely Mountain uba ari nawo mu rwa mukuru w’ubwami bw’ibikuri, Erebor.

Mu gihe akarere kose kaba kugarijwe n’akangaratete, icuraburindi n’ubwoba, ubwoko bwose bw’abagatuye bajya inama yo kwishyira hamwe ngo hato batarimbuka, bagatangira urugamba rukaze rw’imitwe itanu y’ingabo aho Bilbo n’inshuti ze barwanira gukiza ubuzima bwabo n’ubw’abandi.

Filimi nyabutatu Hobbit zakozwe n’inzobere muri Cinema, Peter Jackson agendeye ku gitabo The Hobbit cy’umwanditsi, umusizi n’umwarimu muri kaminuza J.R.R Tolkien.

Century Cinema izerekana The Hobbit 1&2 ku ya 11 Ukuboza, bitegura kwerekana bwa mbere The Hobbit 3: The battle of the five armies.