00:00:00 IGIHE NETWORK KN KINYARWANDA EN ENGLISH FR FRANCAIS

Canal+ Group yaguze Zacu TV

Yanditswe na Nsengiyumva Emmy
Kuya 5 July 2022 saa 04:47
Yasuwe :

Canal+ Group yatangaje ko yamaze kugura Zacu Entertainment isanzwe ifite ikigo cya ZACU TV gitunganya kikanamenyekanisha filime nyarwanda yaba izo bakoze ndetse n’izo baguze ku bandi.

Amakuru y’igurwa rya Zacu TV, IGIHE yayahamirijwe n’ubuyobozi bwa Canal+.

Ubuyobozi bwa Canal+ buvuga ko iri gurwa rya Zacu Entertainment ryemerera Canal+ Group kurushaho gushimangira ibikorwa byayo mu itunganywa ry’amajwi n‘amashusho mu Rwanda.

Ubuyobozi bw’iki kigo buvuga ko buzungukira ku muyoboro wagutse wa Zacu TV ufite filime nyinshi zo mu bwoko butandukanye.

Uretse ibikorwa byo gucuruza filime zo mu Rwanda, ubuyobozi bwa Canal+ bwavuze ko buteganya gufungura shene y’imyidagaduro itunganyijwe 100% mu Kinyarwanda, izarushaho guteza imbere abanyempano bo mu Rwanda ndetse n’itunganywa ry’amajwi n’amashusho.

Canal+ yari iherutse gushora amafaranga mu bigo nka Plan A yo muri Cote d’Ivoire, ROK studios yo muri Nigeria mu rwego rwo kurushaho gushimangira ubushake bwayo mu gushyigikira itunganywa ry‘amajwi n’amashusho ku Mugabane wa Afurika.

ZACU Entertainment yaguzwe na Canal+ yashinzwe mu 2017 na Nelly Wilson Misago, umwanditsi unatunganya filime kuri televiziyo ndetse akaba yarashinze n’urubuga rwa mbere mu Rwanda rucuruza amashusho mu 2019.

Umuyobozi ushinzwe gahunda muri Canal+, Fabrice Faux, avuga kuri aya masezerano y’ubugure hagati y’ikigo arimo nk’umuyobozi na Zacu Entertainment yagize ati “Twishimiye guha ikaze Zacu Entertainment ndetse n’itsinda ryayo mu kigo cyacu.”

Fabrice yakomeje avuga ko iri gurwa rishimangira ubushake bw’ikigo cya Canal+ mu guhuza abanyempano b’abahanga muri Afurika, ibi agasanga byazihutisha iterambere ry’uruganda rw’imyidagaduro.

Nelly Wilson Misago washinze Zacu Entertainment yavuze ko yishimiye kuba Canal+ yaguze ikigo cye cyane ko bigiye kuzamura urwego rw’ibikorwa bakoraga.

Ati “Nishimiye gukomeza urugendo hamwe na Canal+ Group. Twese dufite intego zo gutunganya no gutanga porogaramu zifite ireme ku bakunda ibyo dukora. U Rwanda rufite abanyempano benshi ndetse n’inkuru zubaka zitaravugwa. Ntekereza ko kuba Canal+ ije gufatanya natwe ari igihe cyo kugeza filime zakorewe mu Rwanda ku ruhando mpuzamahanga.”

Ikindi yagarutseho ni uko aya ari amahirwe ku bakora filime mu Rwanda kuko isoko ryabo rigiye kwaguka ibikorwa byabo bikabasha kwerekanwa ku ruhando mpuzamahanga.

Ibi Misago abishingira ku kuba Canal+ igiye gushora amafaranga mu gutunganya filime nshya ndetse no kugura izikoze neza by’umwihariko izikorwa n’Abanyarwanda.

Canal+ Group yaguze Zacu Entertainment isanzwe ifite ‘Zacu TV’
Misago Nelly Wilson washinze ikigo cya Zacu Entertainment yahishuye ko kugurwa na Canal+ bigiye guteza imbere abakora filime mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .