Umuhanzi Kitoko Bibarwa yageze i Bruxelles mu Bubiligi mu gitondo cyo ku wa gatatu tariki ya 26 Ukuboza mu gitaramo cyo gusoza umwaka ku itariki 31 ukuboza 2012.

Icyo gitaramo Kitoko agiyemo mu Bubiligi cyateguwe na ‘Team Production’ ifatanyije na ‘Eben Event’. Kizitabirwa kandi n’Abanyasenegali Viviane N’dour na The Djolof Band n’Abahanzi b’Abanyarwanda baba mu Bubiligi , Sandrine Uwimbabazi wa ‘ Eben Event’ na Justin Karekezi wa ‘Team Production’.

Mu kiganiro yagiranye na IGIHE mu Bubiligi, Kitoko yavuze ko anejejwe no kwifatanya n’Abanyarwanda baba mu Bubiligi bafatanyije n’Abanyasenegale n’inshuti zabo mu bihe birangiza umwaka wa 2012, batangirana uwa 2013.

Kitoko akomeza avuga ko ikindi kimushimishije, ngo ni uko ari ubwa mbere agiye kuririmbira mu Bubiligi akoresheje ibyuma n’abacuranzi n’abaririmbyi bamuherekeje, bacuranga imbona nkubone nta kuririrmbira kuri CD (bikunzwe kwitwa gukora live).

Kitoko yatubwiye kandi ko arimo atumira abaririmbyi bakomeye bo mu Bubiligi ngo bazaze bafatanye kurangiza umwaka, akifuza ko buri muhanzi waba ahari yagira indirimbo ye yihitiyemo yaririmbira abazaba baraho, muri abo bahanzi yifuza ko baba bahari yavuzemo nka Suzanne Nyiranyamibwa, Muyango, Cécile Kayirebwa, Ben Kayiranga, Nyiratunga Alphonsine Fofo, Ben Ngabo Kipeti, De gaule, Liziki w’Umurundi baririmbanye indirimbo yitwa « Jacqueline », Seleman n’abandi.

Mu batumirwa bakuru bazaba bari muri icyo gitaramo kirangiza umwaka hateganyijwe kuzaba hari Ambasaderi w’u Rwanda mu Bubiligi, uw’u Burundi, Senegal , Gambiya n’abandi.

Inkuru yindi ivuga kuri icyo gitaramo : http://www.igihe.com/imyidagaduro/hanze/kitoko-bibarwa-n-icyamamare-viviane-n-dour-bazataramira-abanyarwanda-mu-bubiligi.html