Ikiganiro kirambuye na Patient wegukanye igihembo gikuru muri Groove

Yanditswe na Dean Irak
Kuya 15 Ukwakira 2013 saa 08:46
Yasuwe :
0 0

IGIHE twagiranye ikiganiro kirambuye n’umuhanzi Patient Bizimana, wahawe ibihembo bitatu muri Groove Awards Rwanda 2013 harimo n’igihembo nyamukuru cy’umuhanzi w’umwaka.
Muri iki kiganiro, Patient yasubije ku bibazo byinshi birimo no kumubaza impamvu muri gospel hahora ibibazo by’urudaca byiganjemo amashyari.
Ati “Icyo nasaba ni uko twashyira hamwe intego ikaba imwe mu byo dukora byose, yo kuzamura ubwami bw’Imana.”
Patient yahawe igihembo cy’Umuhanzi w’umugabo w’umwaka (Best male artist of the (...)

IGIHE twagiranye ikiganiro kirambuye n’umuhanzi Patient Bizimana, wahawe ibihembo bitatu muri Groove Awards Rwanda 2013 harimo n’igihembo nyamukuru cy’umuhanzi w’umwaka.

Umuhanzi Patient Bizimana

Muri iki kiganiro, Patient yasubije ku bibazo byinshi birimo no kumubaza impamvu muri gospel hahora ibibazo by’urudaca byiganjemo amashyari.

Ati “Icyo nasaba ni uko twashyira hamwe intego ikaba imwe mu byo dukora byose, yo kuzamura ubwami bw’Imana.”

Patient yahawe igihembo cy’Umuhanzi w’umugabo w’umwaka (Best male artist of the Year), igihembo cy’indirimbo nziza y’umwaka (Best Song of the year) hamwe n’igihembo cy’indirimbo nziza yo kuramya (best worship song).

Soma ikiganiro kirambuye Patient Bizimana yagiranye na IGIHE:


IGIHE: Wabanza ukatubwira kuri Patient Bizimana muri make?

Patient: Patient Bizimana ni umukristo, usengera mu itorero rya Evangelical Restoration Church Gikondo. Ndi umuririmbyi uririmba indirimbo ziramya zikanahimbaza Imana. Nkaba nyobora itsinda riramya rikanahimbaza mu rusengero.

Mu muziki mfite Album ya Audio yitwa “Ikime cy’Igitondo” nkagira na Album y’amashusho yitwa “Iyo Neza”, nkaba ndi gukora Album yindi nshya izasohoka mu Kuboza hatagize igihinduka.

Abahawe ibihembo bose bari hamwe

IGIHE: Watangiye gute umuziki?

Patient: Nakuze nkunda muzika kuva nkiri umwana, ariko ntangiye kuririmba muri 1998, aho natangiriye muri Chorale yitwaga “La Voix des Anges”. Data yakundaga kuririmba nubwo bitari umwuga, ariko navuga ko ari we nabikomoyeho. Nzi gucuranga Piano.

IGIHE: Ni izihe ndirimbo uheruka gusohora?

Patient: Mperutse gusohora iyitwa “Amagambo Yanjye” (video) n’indi bita “Ubwo Buntu”.

IGIHE: Wakiriye gute guhabwa ibihembo bitatu muri Groove harimo n’igisumba ibindi cy’umuhanzi w’umwaka?

Patient: Nabyakiriye neza, nashimye Imana cyane kandi nshimira n’abantu bose banshyigikiye bantora n’ubu ndacyabashimira cyane.

IGIHE: Ese gifite akahe gaciro, mu mafaranga?

Patient: Iki gihembo ntabwo ari nk’igikombe nka PGGSS cyangwa se ibindi, cyane ko njyewe kuba umuramyi uramya Imana bindutira ibihembo byose n’amakamba by’iyi si.

Bizimana agaragaza igihembo yahawe

Iki gikombe nk’uko ijambo ry’Imana rivuga, muri Zaburi 116 umurongo wa 12 -14; aho bagira bati "Nzakira igikombe cy’agakiza nambaze izina ry’Uwiteka, nzahigura Uwiteka umuhigo wanjye, ni koko nzawumuhigurira mu maso y’ubwoko bwe bwose".

Rero iki gikombe intego yacyo itandukanye n’ibindi bikombe byose dusanzwe tubona. Intego yacyo si ukuba icyamamare cy’Isi cyangwa kugwiza ubutunzi bw’Isi intego yacyo ni uguhigura umuhigo ushima Imana ku iteka uba watewe kubw’umurimo usanzwe ukora mu bwami bw’Imana.

IGIHE: Wahawe ibihembo bitatu, ubona ari iki warushije abandi batabibonye?

Patient: Nk’uko bisanzwe bimenyerewe, ubundi twese abo tuba turi mu cyiciro kimwe baba barakoze neza ariko havamo umuntu umwe nk’uko n’ubushize byagenze kuri Bahati Alphonse kandi twese dushima Imana hamwe, dushimira Imana kubera uwo muntu watsinze kandi tukamutera ingabo mu bitugu tumusabira gukomeza kwagura ubwami bw’Imana.

Icyo narushije abandi rero nta kindi ni uko abantu banshyigikiye bakamba hafi kandi ni ishema ku bo turi kumwe twese kuko twese dufite intego imwe ni nk’uko n’undi yazagitwara ubutaha tukishimira hamwe, nta mashyari ni igikombe gitandukanye n’ibindi.

IGIHE: Uvuga iki ku kuba wari umaze igihe uza ku rutonde rwa Groove Awards Kenya ariko ntiwegukane igihembo?

Patient : Ni uko muri Kenya bafaga abahanzi bose babashyize mu cyiciro kimwe, ariko ubu baraje bafata muri buri cyiciro. Urebye hariya twabaga turi umuntu umwe uhiganwa n’amatsinda za The Sisters, Blessed Sister n’abandi ariko ubu bafashe buri cyiciro usanga ari byo byaduhaye amahirwe menshi.

IGIHE: Ni iki wumva gutwara Groove bizahindura ku buhanzi bwawe?

Patient: Njyewe ntabwo nkora kubera ko nahawe Groove, nta kizahinduka gusa mu bijyanye n’iki gihembo kije mu gihe nari ndimo ntekereza kumurika Album nshya mu kwezi kwa Gashyantare umwaka utaha. Nkaba nteganya kuzakora igitaramo gikomeye cyo kumurika iyo Album.

IGIHE: Uvuga iki ku magambo yavuzwe ko hari byinshi mu bihembo byahawe abatabikwiye?

Patient: Icyo nabivuga ni uko byabaye nk’uko byakagombye kugenda itangwa ry’ibihembo bya Groove Awards hari icyo byongereye kuri ’Gospel Industry’ yo mu Rwanda kandi ndabishimira Imana.

IGIHE: Hari ibyiciro bimwe na bimwe byatunzwe agatoki nka Best Producer, Best Video, Best Dance Group na Best Gospel Hip-hop, wowe ntabyo wabonye muri ibyo byiciro?

Patient: Ibi bintu nibwo bwa mbere bikiza mu Rwanda, rero buri muntu afite uko abibona ariko njye nk’uko bigaragarira amaso bishobora kuba bitandukanye n’ibyavuye mu matora.

Urugero nka ’Best Video’ dushobora gutekereza ngo ni “Birasohoye” ariko ugasanga “Ntararenga Inkombe” ari yo ’Best Video’ kuko niyo yatsinze yaramurushije amajwi, aho ngaho rero nta kintu nabivugaho kuko ntibaradutangariza amajwi y’uko byagenze niyo twashingiraho tureba uko byarushanijwe, ariko abashinzwe akanama nkemurampaka batwijeje ko icyo bakurikije ari amajwi y’abantu batoye.

IGIHE: Mu bindi bibazo; wari umaze igihe ugaragara muri BNR, niho usigaye ukora?

Patient: Oya, gusa nari maze igihe mu kwimenyereza ibyo nigaga (Internship) muri BNR, ubu ndateganya kumurika igitabo ukwezi kurangiye mu bijyanye n’icungamari.

IGIHE: Ni gute wakiriwe, cyane cyane na benshi bari basanzwe bakuzi nk’umuhanzi?

Patient: Ntibyabura hari abambonaga bakambwira ko basanzwe banzi, kndi ibyo bintu ni byiza iyo uhuye n’abakunzi bawe ahantu hose ugiye. Ugasanga umuntu uri kugukoresha asanzwe akunda indirimbo zawe, biba ari byiza cyane. Wumva wisanga.

IGIHE: Mbwira ku gitaramo ukubutsemo wowe na Gaby muri Kampala?

Patient: Cyari igiterane cyahuje abanyeshuri bose b’Abanyarwanda n’Abarundi biga muri za Kaminuza za Kampala, byabereye muri Kampala University, aho Ambasaderi w’u Burundi na Uganda ndetse na Apostle Joshua Masasu bari abigisha.

Baduhaye ubutumire turabyitabira, hashize nk’ibyumweru nka bitatu.

IGIHE: Muri gospel hahora amakimbirane y’urudaca, ubivugaho iki?

Patient: Njye ku giti cyanjye mbona bigenda neza nubwo ahari abantu kandi bakora bimwe hatabura utubazo ariko njye mbona birimo bigenda bikemuka.

Mbona ikibitera ari ugutandukira ku muhamagaro wawe uba warahamagariwe ugashukwa n’ibintu urimo ako kanya.

IGIHE: Ubona se ari iki cyakorwa?

Patient: Icyo nasaba ni uko twashyira hamwe intego ikaba imwe mu byo dukora byose, yo kuzamura ubwami bw’Imana.

IGIHE: Haba hari ikibazo wumva tutakubajije wavugaho?

Patient: Oya, ahubwo natanga ubutumwa ku bakunzi banjye. Ndabasaba gukomeza kumba hafi bansengera banangira inama mu byo nkora kugira ngo nkore neza icyo Imana yampamagariye gukora nkiri hano ku Isi.

Reba amafoto y’uko byari byifashe mu gitaramo cya Groove:

Kanda HANO urebe amafoto menshi

Umunyarwenya Eric Omondi w'Umunyakenya
Gaby yabaye umuhanzi w'umugore witwaye neza, aha yari ari kuririmba
Gaby aririmba
Bill Gate acuranga; amenyerewe cyane mu muziki wa Gospel
Hahembwa umuhanzi witwaye neza muri Hiphop
Ubwo bamwe bari bishimye abandi bari baguye mu kantu
Byari ibicika muri iki gitaramo; aba ni bamwe mu babyinira Imana
Ibihembo bya Groove Awards
“DK Kwenye Beat”, umuhanzi w'icyamamare muri gospel
Umunyarwenya Eric Omondi w'Umunyakenya
Abahawe ibihembo bose bari hamwe

Kanda HANO urebe amafoto menshi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza