00:00:00 IGIHE NETWORK KN KINYARWANDA EN ENGLISH FR FRANCAIS

Rayvanny yishongoye kuri Harmonize

Yanditswe na Mahoro Vainqueur
Kuya 18 Mutarama 2023 saa 11:14
Yasuwe :

Mu ntambara y’amagambo imaze igihe hagati ya Rayvanny na Harmonize, ubu bageze ku butunzi n’ibigwi byabo nyuma yo gupfa umukobwa.

Raymond Shaban Mwakyusa umaze kwamamara nka Ryavanny, yifatiye ku gahanga Rajab Abdul Kahali wamamaye nka Harmonize, amubwira ko nta kintu na kimwe amurusha.

Iyi ntambara y’amagambo isa n’iyatangijwe na Harmonize w’imyaka 32, watangiye ashinja abahanzi bagenzi be kwiyegurira ubusinzi, abasaba kubireka.

Icyo gihe yanditse ku mbuga nkoranyambaga ati "Bahanzi bagenzi banjye mugabanye indirimbo zisingiza inzoga, ntimutekereze ko abantu bose muri iki gihugu ari abasinzi, nubwo twanywa inzoga ku wa Mbere ntituzinywa twumva indirimbo z’ubusinzi."

Nubwo ubu butumwa buterura ngo bugaragaze umuhanzi watunzwe agatoki, Rayvanny w’imyaka 29 yahise asubiza Harmonize, amacyurira ko nta ndirimbo zikunzwe agira.

Yanditse agira ati "Nta ndirimbo n’imwe ufite ikunzwe ivuga ku nzoga, ubu ugiye kuvuga iki ku nzoga? Ceceka aho."

Nyuma y’ubu butumwa, Harmonize yahise asubiza Rayvanny amubaza impamvu amwanga.

Yagize ati "Ariko kuki unyanga cyane muvandimwe? Watumye abantu bose babona imyanya yanjye y’ibanga, washakaga ko niyahura ariko ubu ndacyariho."

"Winyanga, uzansure nkwereke uko wakorera amafaranga uzabone uko wishyura abagufashaga, ubone n’uko usesa amasezerano mwagiranye."

Muri ayo magambo, Harmonize yanashinje Diamond Platnumz ukorana na Rayvanny, kwigana Asake uri kuzamuka muri muzika ya Nigeria.

Yakomeje ati "Mu gihe ukiri mu biganza bya Asake, ugicudika na we, ntuzigere wigereranya nanjye, ndi kure yawe cyane, ntereta ababyeyi wowe ukaza ushaka abakobwa babo."

Aho yasaga n’ukomoza ku yindi nkundura y’amagambo barwanye mu mwaka ushize, bapfa umukobwa witwa Paula Kajala, mu gihe Harmonize yakundanaga na nyina Frida Kajala.

Rayvanny usigaye afite inzu ifasha abahanzi yise The Next Level, yashinje Harmonize kwirengagiza, amubwira ko ahora agendera ku izina rya Diamond kugira ngo akomeze kuba umuntu w’ ingirakamaro.

Ati "Ndi papa wawe, Diamond uvuga ni we muntu watumye ugera aho uri ubu, nta mpamvu ufite zo kumwitwamo inabi, njye ndashaje kuri ibyo bintu."

Vanny Boy akomeza avuga ko Harmonize aba mu bukode mu gihe we (Rayvanny) ari mu nzu ye bwite.

Ati "Reka nkubwize ukuri, ntabwo uri ku rwego rwanjye haba mu muziki no mu bushobozi, ntundusha ibihembo by’umuziki, indirimbo zikunzwe, imibare y’uko umuziki ukurikiranwa, nta na kimwe undusha."

Yakomeje avuga ko ubutunzi bwe budashobora kugereranywa n’ubwa Harmonize, dore ko ari we wishyuye amafaranga menshi igihe yavaga muri WCB Wasafi akaba umuhanzi wigenga.

Ati "Wishyuye Wasafi miliyoni 600 z’ama-shilling ugenda urira mu bitangazamakuru byose, wiyibagije ko njye nishyuye miliyari 1.3 z’ama-shilling. Niba wumva ko navuze ubusa, jya kuri Basata ubaze bazakubwira, amafaranga si ikintu kidasanzwe kuri njye."

"Kubaha ni ikintu mpa agaciro cyane, nihagira aho ubona navuze, uzamenye ko mba nasuzuguwe cyane."

Basata ni inama y’igihugu y’abahanzi yo muri Tanzania.

Aba bahanzi bigeze gushwana bapfa umukobwa wa Frida Kajala wakundanaga na Harmonize
Harmonize yasabye abahanzi bo muri Tanzania kureka indirimbo zisingiza inzoga
Rayvanny yabwiye Harmonize ko nta kintu na kimwe amurusha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .