Patient Bizimana, Icenova na Hollix mu bakoze mu nganzo: Indirimbo nshya za Weekend

00:00:00 IGIHE NETWORK

KINYARWANDA

ENGLISH

FRANCAIS

Patient Bizimana, Icenova na Hollix mu bakoze mu nganzo: Indirimbo nshya za Weekend

Yanditswe na Uwiduhaye Theos

Kuya 26 April 2025 saa 05:40

Yasuwe :

Yavuzweho:

Abakurikira IGIHE umunsi ku wundi bamaze kubimenyera ko mu mpera z’icyumweru, tubagezaho indirimbo nshya zagiye hanze yaba iz’abahanzi bagezweho mu gihugu n’abandi bakizamuka baririmba umuziki usanzwe n’uwo guhimbaza Imana.

Uretse mu Rwanda twambuka n’imbibi z’igihugu tukajya hanze yacyo yaba muri Afurika no hakurya y’inyanja. Indirimbo dushyira kuri uru rutonde ni izo tuba twabashije kubona twifashishije urubuga rwa Youtube.

“Akaryoshye” - Icenova ft. KushBombe

Ni indirimbo ya Icenove na KushBombe. Aba bahanzi baba bagaragaza ko akaryoshye kadahora mu itama.

Ishimwe Olivier ukoresha izina rya Icenova mu muziki, ni umusore wavukiye mu Mujyi wa Kigali mu Karere ka Nyarugenge mu Murenge wa Nyamirambo. Azwi mu ndirimbo nka "Uri tayari", "Abahungu", "Nyagasani" yakoranye na Bushali n’izindi nyinshi.

“Dejavu” - Fifi Raya ft. B-Threy

Ni indirimbo Fifi Raya yahuriyemo na B-Threy. Igaruka ku mukobwa ufite ibyifuzo by’amafaranga ku mukunzi we, undi akamubaza niba bikunda ko bahura cyangwa ayamuha kuri telefoni.

“All My Life” - Gweda 21 feat.Wlnone & Sid Wurld

Ni indirimbo ya Gweda 21. Ni umusore watangiye umuziki mu 2016. Akorera umuziki muri Canada ari naho yiga kuri ubu. Uyu musore yavukiye i Musanze mu 2000.

“Akazuba” - Yuhi Mic

Ni indirimbo nshya y’umuhanzi Yuhi Mic. Muri iyi ndirimbo uyu muhanzi aba ataka umukobwa w’imico myiza kurusha abandi.

Forongo Francis ukoresha amazina ya Yuhi Mic ni umwe mu bahanzi babarizwaga mu nzu ifasha abahanzi ya The Mane Music Label ya Bad Rama. Yayivuyemo mu 2022.

“Uri umugore” - RoMeo Rapstar x Pogatsa

Ni indirimbo ya RoMeo Rapstar na Pogatsa. Muri iyi ndirimbo, aba bahanzi baba bagaragaza uko nta n’umwe ushobora kubibazaho.

“Kilode” - Fela Music

Ni indirimbo nshya ya Fela Music. Aba bahanzi baba bishyize mu mwanya w’umuntu ubaza umukunzi we niba ko ibyo barimo aribyo.

Feikel na Labii ni abavandimwe bahuriye mu itsinda rya Fela Music ritangiye kugenda rishinga umuziki gake gake, ndetse abantu bamwe batangiye kurimenya cyane mu ndirimbo zitandukanye rimaze gushyira hanze.

“Nibyo Koko” - B2k Joe Barber

Ni indirimbo y’umuhanzi B2k Joe Barber. Muri iyi ndirimbo uyu muhanzi aba aririmba agaragaza uburyo iyo umuntu akunze atava ku izima.

Avuga ko gukunda bisaba kwitanga ndetse bamwe bagaca intege uwateye intambwe akerekana umukunzi we.

“Uransize” - Kelly Showboi

Ni indirimbo nshya ya Kelly Ishimwe ukoresha amazina y’ubuhanzi ya Kelly Showboinkaba.

Muri iyi ndirimbo uyu musore agaragaza agahinda abasore bagira iyo basizwe n’abakunzi babo. Uyu muhanzi yatangiye umuziki muri Mata uyu mwaka.

“Imbabazi” - Adonai Choir ADEPR Gatsata

Korali Adonai ikorera umurimo w’Ivugabutumwa mu Itorero rya ADEPR Gatsata, yashyize iyo ndirimbo hanze mu gihe abakirisitu bari mu bihe byo kwibuka urupfu n’izuka bya Yesu Kristu.

Ni indirimbo irimo amagambo yo gushima Imana yarinze abari mu Isi kandi ikabaha imbabazi zayo zidashira ndetse igamije gusubizamo abantu icyizere cy’ubuzima bushya bubonerwa muri Kristo.

“Agakiza” - Patient Bizimana

Ni indirimbo nshya ya Patient Bizimana iri kuri album yitegura kumurikira i Kigali umwaka utaha.

Iyi album nshya ya Patient Bizimana igiye kujya hanze nyuma y’iya mbere yise ‘Ikime cy’igitondo’ iriho indirimbo nka Menye neza, Nongeye naje, Iyo neza n’izindi.

Album ya kabiri ya Patient Bizimana yo yitwaga ‘Impumuro yo guhembuka’ iriho indirimbo nka Ubwo buntu, Amagambo yanjye, Ndanyuzwe n’izindi nyinshi.

Iya gatatu uyu muhanzi yakoze yitwa ’Ibihe byiza’ yariho indirimbo nka Ibihe, Wagendanye natwe n’izindi.

Izi zose ziyongera kuri ‘Ikimenyetso’ yaherukaga kumurikira abakunzi be, ikaba iriho indirimbo nka Ikimenyetso, ijambo rya nyuma, Ikamba n’izindi zakunzwe.

“Virus” - Hollix ft. Ish Kevin

Ni indirimbo iri mu ziri kuri Volume nshya ya Hollix yahuriyemo na Ish Kevin. Uyu muhanzi aba yivuga imyato muri iyi ndirimbo nshya. Yakozwe na Juni Quickly.

“Imbabazi z’Imana” - Zoe Family

Ni indirimbo nshya ya Zoe Family. Igaruka ku mbabazi z’Imana.

Ni indirimbo ya Jean Luc Ishimwe wamenyekanye mu muziki usanzwe mu myaka isaga irindwi ishize, ndetse wigeze no kuba umwe mu bafashwa na King James; yahuriyemo n’umugore we Manishimwe Delphine.

“Uri Imana” - Twagirayezu Théophile

Ni indirimbo nshya yo gushima Imana ya Twagirayezu Théophile. Uyu mugabo akorera umurimo w’Imana mu Itorero Assemblies of God/Gatsata, aho ari umwe mu bayobozi bakuru bashinzwe imiyoborere.

Uretse iyo nshingano, azwi cyane nk’umuririmbyi w’indirimbo zo kuramya no guhimbaza Imana, aho akunze kuvuga ko indirimbo ari ururimi rwihuse rukoreshwa n’Imana kugera ku mitima y’abantu.