00:00:00 IGIHE NETWORK KN KINYARWANDA EN ENGLISH FR FRANCAIS

Massamba, Dj Pius , Bruce Melodie na Andy Bumuntu mu bahanzi bahaye Ubunani abakunzi b’umuziki

Yanditswe na Mahoro Vainqueur
Kuya 31 Ukuboza 2022 saa 07:36
Yasuwe :

Mu gihe abantu batandukanye bari kwizihiza iminsi mikuru isoza umwaka, abahanzi banyuranye bakoze iyo bwabaga ngo bashimishe abakunzi babo muri ibi bihe binyuze mu bihangano bishya bashyize ahagaragara muri iki cyumweru cya nyuma cy’umwaka wa 2022.

Nk’uko bisanzwe buri mpera z’icyumweru, IGIHE ikora urutonde rugizwe n’indirimbo nshya z’abahanzi nyarwanda zafasha buri wese kunogerwa n’impera z’icyumweru.

Mu bahanzi basohoye indirimbo nshya barimo; DJ Pius, Bruce Melodie, Andy Bumuntu, Jado Kelly n’abandi.

‘Bonane (Turawusoza)’ – Deejay Pius, Alyn Sano & Bushali

Deejay Pius , Alyn Sano n’umuraperi Bushali bahurije hamwe imbaraga bikoza mu nganzo, bazanira abakunzi b’umuziki indirimbo ibafasha kwishimira ibi bihe byo gusoza umwaka wa 2022.

Ni indirimbo bise ’Bonane’ cyangwa ’Turawusoza’ igaruka ku bashaka gusangira ibyishimo na bagenzi babo muri izi mpera z’umwaka.

Mu nyikirizo y’iyi ndirimbo humvikanamo amajwi ya Deejay Pius, Lionel Sentore, Alyn Sano na Karpet Pixelz. Amajwi yayo yatunganyijwe n’aba-Producers batandukanye barimo Julien, Didier Touch, Niko Ye na Bob Pro.

Amashusho yayo yafashwe na Hamza Images afatanyije na Sixx David bakorera mu Ishusho Ltd.

‘Ntiyona’ – Massamba Intore

Umuhanzi Massamba Intore umaze igihe kinini mu muziki nyarwanda, yasoje umwaka ahereza abakunzi b’umuziki ubunani binyuze mu ndirimbo yise ‘Ntiyona’.

Iyi ndirimbo ikozwe mu mudiho gakondo, amajwi yayo yatunganyijwe na Element asozwa na Bob Pro, naho amashusho yayo akorwa na Toussaint afatanyije na Robert.

Ni indirimo igaragaramo ababyinnyi nka Murayire Cyane, Gatore yannick, Muvala V, Muhire na Nshimiye.

‘Love me hard’- Bruce Melodie

Itahiwacu Bruce nyuma y’ukwezi kumwe ahaye abakunzi b’umuziki indirimbo yise ‘Funga Macho’, mbere y’uko yasohoye indi.

Iyi ni ndirimbo yise ‘Love me Hard’ igaruka ku musore ubaza umukunzi we niba azakomeza kumukunda kuko hari benshi bakomeza kubaca intege bashaka kwangiza umubano wabo.

Iyi ndirimbo yanditswe na Sean Brizz afatanyije na Bruce Melodie. Amajwi yayo yatunganyijwe na Madebeats mu gihe amashusho yayo yakozwe na Sasha Vybez.

‘Yahweh’- Jado Kelly na Gaby Kamanzi

Umuhanzi ukora indirimbo zo kuramya no guhimbaza Imana, Jado Kelly yahuje imbaraga na Gaby Kamanzi baha abakunzi babo indirimbo bise “Yahweh”, ihumuriza abantu baca mu bikomeye babwirwa ko Uwiteka ari mu ruhande rwabo.

Iyi ndirimbo “Yahweh’’ yakorewe mu Bufaransa, amajwi yayo yatunganyijwe na Producer Bilgate Mulumba ukorera muri Gates Sound mu gihe amashusho yayo yakozwe na JP Classic ukorera muri Umuco Art.

‘Igitego’ – Andy Bumuntu

Andy Bumuntu uri mu bahanzi bagezweho mu muziki w’u Rwanda, yasohoye indirimbo nshya yise ‘Igitego’ ahamya ko yayanditse agendeye ku nkuru y’urukundo rw’ababyeyi be.

Ni indirimbo y’urukundo uyu muhanzi yifashishijemo couple z’abantu batandukanye avuga ko afata nk’icyitegererezo mu rukundo, barimo umuhanzi Ngarambe François-Xavier n’umufasha we, Nkusi Arthur n’umugore we n’abandi banyuranye.

Iyi ndirimbo mu buryo bw’amajwi yakozwe na Khrisau afatanyije na Bob Pro mu gihe amashusho yayo yafashwe anatunganywa na Serge Girishya.

‘Icyo Wampaye’ - Shaffy

Umuhanzi w’umunyarwanda ukorera umuziki muri Leta Zunze Ubumwe za Amerika, Shaffy yashyize ahagaragara indirimbo yise "Icyo wampaye" ishingiye ku bakundana bahora bashwana ariko ntibatandukane.

Uyu muhanzi washyize imbaraga mu kuvoma ubwenge mu bijyanye n’umuziki, harimo kumenya gutunganya neza amashusho y’indirimbo ndetse n’amajwi y’indirimbo (Audio) , amajwi y’iyi ndirimbo ye yakozwe na Knoxx Beats.

‘Mpore’ – Icenova

Umuraperi Ishimwe Olivier umaze kubaka izina nka ‘Icenova’ uri mu baraperi bagezweho, mbere y’uko umwaka urangira yamurikiye abakunze b’umuziki E.P yise ‘Self Made’.

Iyi E.P nshya yaje iherekejwe n’amashusho y’indirimbo yise ‘Mpore’ amajwi yayo yakozwe na Kush Beats, amashusho yayo akorwa na Olivier Abimana (Eyes yevi)

‘Habibi’ - Mantra Made

Umuhanzi akaba na Producer Mantra Made muri izi mpera z’umwaka yamurikiye abakunzi b’umuziki album yise ‘Habibi’ ayihurizamo abahanzi batandukanye barimo Derek Sano , Bill Ruzima, Misteak , Kaayi, Ayo Rash , Yuhi Mike, Kaya Byinshi n’abandi batandukanye.

Iyi Album iriho indirimbo 12 yakozweho n’aba producer batandukanye barimo Mantra Made , Renstar Beatz (YeweeH), Jason, Adeodatus, Jules na Santana Sauce.

‘Energy’ - Don Brighter na Social Mula, Vania Ice & D-one

Nyuma y’ukwezi kumwe Social Mulla akoranye indirimbo na D – One ukorera umuziki we i Burundi, muri izi mpera z’umwaka bamurikiye abakunzi b’umuziki indi ndirimbo bakoranye na Don Brighter na Vania Ice.

Amajwi yayo yakonzwe na Trust Beat w’i Burundi afatanyije na Herbert Skillz wo muri Uganda mu gihe amashusho yayo yakozwe na Landry Sb ukorera muri Grand Pictures production

‘Samoya Cover’ - Rugamba Rogan

Umuhanzi Rugamba Logan nyuma y’amezi abiri ahaye abakunzi b’umuziki we indirimbo yise ‘Umutozo’ , mbere y’uko umwaka urangira yikojeje muri studio asubiramo indirimbo ‘Saa moya’ ya Bruce Melodie.

Ni igikorwa yafashijwemo na Mandex_Beats ukorera muri Heroes Record.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .