Kizito Mihigo yasohoye indirimbo yahimbiye Papa Francis (Video)

Yanditswe na Muvunyi Arsène
Kuya 24 Kamena 2019 saa 08:54
Yasuwe :
0 0

Umuhanzi Kizito Mihigo umenyerewe mu ndirimbo za Kiliziya Gatolika, yongeye gushimangira ko ari umuyoboke ukomeye w’iri dini asohora indirimbo yise “Le Pape François” ivuga ibigwi by’Umushumba wa Kiliziya Gatolika ku Isi.

Iyi ndirimbo y’iminota itandatu n’amasegonda icumi, iri mu rurimi rw’Igifaransa ikaba yumvikanamo umudiho gakondo.

Kizito Mihigo arata ibikorwa bya Papa Fransisiko, akavuga ko ari inkingi y’ubumwe.

Mu nyikirizo agira ati “Papa Fransisiko, turagusengera, komeza ube ikimenyetso cy’ubumwe bwacu. Turashimira Imana Data yo yaduhaye abashumba babikwiye.”

Mu kiganiro yagiranye na IGIHE, Kizito Mihigo, yavuze ko yasohoye iyi ndirimbo mu gihe Kiliziya Gatolika yitegura kwizihiza Umunsi Mukuru w’Abatagatifu Petero na Pawulo, bafatwa nk’intumwa zabaye ikubitiro rya Kiliziya, ibintu byasembuye gutekereza no kubabasimbuye.

Ati “Ibi byatumye ntekereza ku babasimbuye mu iyogezabutumwa, nsanga umurimo wabo ukwiye gushimwa.’’

Mu bitero Kizito agaruka ku bikorwa binyuranye by’iyogezabutumwa Papa FransisIko agenda akora ku Isi, nko guhuza abantu b’imyemerere itandukanye mu biganiro mpuzamadini, gutanga urugero mu kwicisha bugufi, kwifatanya n’ababaye, guharanira amahoro n’ubwiyunge n’ibindi.

Kizito Mihigo asanzwe akora n’izindi ndirimbo zinifashishwa mu gutura igitambo cy’Ukarisitiya no gusingiza Umubyeyi Bikira Mariya.

Ukwemera kwe muri Kiliziya Gatolika agukomora ku babyeyi be, aho se yaririmbishaga muri Korali i Kibeho na we akaba yarakuze akora imirimo itandukanye muri kiliziya.

“Le Pape François” ni indirimbo yatunganyirijwe mu buryo bw’amajwi muri The Sounds Studio ya Producer Bob, mu gihe amashusho yayo yafashwe na Producer Faith FEFE.

Umuhanzi Kizito Mihigo yasohoye indirimbo yahimbiye Umushumba wa Kiliziya Gatolika ku Isi, Papa Francis
Muri iyi ndirimbo arata ibikorwa bya Papa Fransisiko, akavuga ko ari inkingi y’ubumwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza