Indirimbo “Bye Bye Bumbaclot” y’itsinda “Abadahigwa International” ribarizwa mu Rwanda niyo yatoranijwe muri Afurika mu ndirimbo zirenga 180 zihatanira igihembo cy’izitanga ubutumwa bw’amahoro ku Isi kurusha izindi.

“Abadahigwa” rigizwe n’umunyarwanda “Ras Banamungu” n’abanyamahanga bagera kuri batanu, batangiye bagamije gufasha abanyarwanda mu 2011 mu bikorwa bitandukanye birimo ubuvuzi, ubukangurambaga ku buzima, guhugura abanyeshuri ba Kaminuza nkuru y’u Rwanda no gufasha Abanyarwanda kwikura mu bukene”.

Muri Mata 2013 baje gusanga bakora n’itsinda ririmba, bakora mu njyana bihimbiye ya “Kinhall”bivuga ikinimba nyafurika nk’uko bavuga mu zindi njyana nka Dancehall n’izindi.

Indirirmbo “Bye Bye Bumbaclot” ivuga ku gusezera kwihorera, no kuzana amahoro ku Isi, iri ku mwanya w’136 ku rutonde rw’indirimbo zizatorwamo izihiga izindi, itorwa ku ubuga songsforpeace, ugakanda ahari ikiganza kizamuye igikumwe, ukaba utoye iyi ndirimbo.

Ku nshuro ya mbere aya marushanwa ari kuba, ari gutegurirwa muri Leta Zunze Ubumwe z’Amerika muri Leta ya Floride, ku nkunga ya ‘Rotary Club” n’ibindi bigo, tariki 2 Ukwakira 2013 nibwo hazatangazwa ku mugaragaro indirimbo zahize izindi, zigahembwa.

Uretse Ras Banamungu, Steven Dean (ukomoka mu Bwongereza), Lean McLernon (wo muri Australiya), Anita Bringoli (wo muri Switzeland), Kinny Omeara (muri Australia) na Kasia Petzert (wo muri Poland), bagize “Abadahigwa International” bigaragara ko bafite amahirwe kuko indirimbo yabo yatowe hashize amezi asaga atanu gusa batangiye kuririmba nk’itsinda, mu gihe bamwe muri bo baririmbaga mu njyana ya Afrobeat, Country, Rock n’izindi.