Buravan yasinye amasezerano na Sosiyete ikomeye mu Bufaransa yo gushinganisha ibihangano bye

Yanditswe na Uwiduhaye Theos
Kuya 14 Ukuboza 2018 saa 07:13
Yasuwe :
0 0

Burabyo Yvan [Buravan] uherutse kwegukana igihembo cya Prix découvertes RFI 2018, yasinye amasezerano y’imikoranire na Sosiyete ifasha mu kurengera inyungu z’ibihangano ikorera mu Bufaransa yitwa SACEM.

Uyu muhanzi uri mu rugendo mu Bufaransa, yasinye aya masezerano yo gukorana byimbitse na SACEM (Société des auteurs, compositeurs et éditeurs de musique), mu buryo bwo gukurikiranirwa ibihangano bye.

Buravan yanditse kuri Instagram avuga ko ashimishijwe no kuba yagiriye uruzinduko kuri SACEM, iherereye i Neuilly-sur-Seine mu Burengerazuba bwa Paris.

Mukasa Jean Marie uyobora New Level ireberera inyungu mu muziki wa Buravan yabwiye IGIHE ko uyu muhanzi yagiye mu Bufaransa ku wa Kabiri, akaba ateganya gukora ibikorwa bitandukanye bijyanye na muzika ye.

Ati “Buravan yavuye mu Rwanda ku wa Kabiri yerekeza mu Bufaransa. Urugendo rwe rugamije kumenyekanisha ibihangano bye ndetse azajya ku maradiyo atandukanye arimo France 24 na RFI.”

Yakomeje avuga ko uru rugendo ntaho ruhuriye no kujya kuzana igihembo yatsindiye cya RFI.

Ati “Uru rugendo ntaho ruhuriye no guhabwa igihembo cya Prix Decouvertes kuko cyo azagihabwa nyuma y’ibitaramo yemerewe na RFI byo kuzenguruka Afurika. Azahabwa iki gihembo ku gitaramo cya nyuma kizabera mu Bufaransa”.

Ku kijyanye no gusinya amasezerano na SACEM, Mukasa yavuze ko ari ukugira ngo ibihangano by’uyu muhanzi bibe bishinganye.

Ati “SACEM irakomeye cyane i Burayi no ku Isi, twahisemo ko asinya ariya masezerano kugira ngo ibihangano bya Buravan bibe bishinganishijwe kuko bafite uburenganzira bwo kuba bakuburanira mu gihe hari umuntu wakoresheje igihangano cyawe mu buryo bunyuranyije n’amategeko.”

Kwiyandikisha no gusinyana amasezerano na SACEM ni ubuntu ku muhanzi uwo ariwe wese ubishaka kandi wujuje ibisabwa kugira ngo akorane nayo.

SACEM iri mu masosiyete acuruza ibihangano akomeye cyane ku rwego rw’Isi. Yashinzwe ku wa 28 Gashyantare 1851.

Umuhanzi ufitanye amasezerano na SACEM, ahabwa ubudahangarwa bukumira kuvogera indirimbo ze; yaba mu kuzicuranga mu ruhame, mu maradiyo na televiziyo no kuba zakoreshwa mu zindi nyungu binyuze kuri internet.

Uretse gukurikirana ibihangano, iyi sosiyete inategura ibihembo bikomeye i Burayi byitwa Grands Prix Sacem 2018, bitangwa buri mwaka bigahuza abahanzi bo ku migabane itandukanye.

Buravan ari ku cyicaro cya SACEM mu Bufaransa
Buravan asinya amasezerano yo gukorana na SACEM
Uyu muhanzi uherutse kwegukana igihembo cya Prix découvertes RFI 2018 amaze iminsi mu Bufaransa
Buravan yahuriye mu Bufaransa na Ben Kayiranga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza