Akiri mayibobo, Theo Bosebabireba yari yarabaye imbata y’ibiyobyabwenge

Yanditswe na

Munyengabe M.Sabin

Kuya 13 Gicurasi 2014 saa 08:41
Yasuwe :
0 0

Mbere yo kwakira agakiza, Theo Bosebabireba uzwi mu ndirimbo zo guhimbaza Imana avuga ko yari yarabaye imbata y’ibiyobyabwenge . Mu buzima yabagamo ku muhanda akiri mayibobo, uyu muhanzi yahuye n’ubuzima bushaririye gusa uyu munsi arashimira Imana . Mu kiganiro na IGIHE, Theo Bosebabireba yasobanuye ko mbere yo kuba umukristu yabanje kuba mayibobo mu mujyi wa Kigali . Mu buzima yabagamo ku muhanda, uyu muhanzi yararaga mu biraro, ifunguro ryabaga ari irya buri munsi, ni ugukubitwa , kunywa (...)

Mbere yo kwakira agakiza, Theo Bosebabireba uzwi mu ndirimbo zo guhimbaza Imana avuga ko yari yarabaye imbata y’ibiyobyabwenge . Mu buzima yabagamo ku muhanda akiri mayibobo, uyu muhanzi yahuye n’ubuzima bushaririye gusa uyu munsi arashimira Imana .

Mu kiganiro na IGIHE, Theo Bosebabireba yasobanuye ko mbere yo kuba umukristu yabanje kuba mayibobo mu mujyi wa Kigali . Mu buzima yabagamo ku muhanda, uyu muhanzi yararaga mu biraro, ifunguro ryabaga ari irya buri munsi, ni ugukubitwa , kunywa ibiyobyabwenge no gufungwa .

Bosebabireba avuga ko iyo asubije amaso inyuma asanga yarabaga mu buzima bushaririye kurusha ubundi bwose yanyuzemo ku isi .

Ati, “Nta kintu kibi kijya kiba cyiza, ibihe byose bitari byiza ni bibi kuri njyewe . Aho ibintu byambereye bibi kurusha ibindi ni igihe nari mayibobo mu mujyi wa Kigali . Ubuzima bwambereye bubi kurusha ubundi . Icyo gihe nabaga mu buzima bushaririye cyane kuko hajemo gufungwa, hazamo gukubitwa, nabonaga ko amaherezo nshobora no gupfa . Nabagamo mu bukene, nararaga ku muhanda, kunywa ibiyobyabwenge, gufungwa n’ibindi. Byari bibi cyane ariko ibyo naboneye ku muhanda byo byari bibabaje.”

Uyu muhanzi yaje kwigobotora ubu buzima yakira agakiza ndetse aza guhinduka umuhanzi w’indirimbo zihimbaza Imana . Ati, “Kwigobotora ubuzima bubi ntabwo byahise byizana, nabanje gukizwa, menya Imana . Maze gukizwa nibwo natangiye kugira imyumvire irimo no kwizera Imana . Niho nahereye mba umukristo, ntangira kuririmba muri korali nyuma ntangira kuririmba ku giti cyanjye .”

Theo yakoresheje ibiyobyabwenge byinshi gusa icyo yakundaga ni lisansi (essence) kuko urumogi rwabaga ruhenze cyane akabura amafaranga yo kurugura .

Ati, “Ibiyobyabwenge narabikoresheje , nakoresheje uburyo bubiri, nakoresheje essence n’urumogi . Essence niyo yari yarangize imbata cyane kuko isindisha vuba ugahita wibagirwa ibibazo byose n’imibabaro ndetse n’iyo inzara iri kukurya ntabwo uyumva . Iyo iki kiyobyabwenge kigushizemo nibwo wumva wazahaye ukumva ya nzara”

Akomeza agira ati, “N’ibindi biyobyabwenge harimo n’urumogi narabikoresheje ariko urumogi rwo rwarananizaga ndetse rwabaga ruhenze kuburyo kurugura bitapfaga kunshobokera.”

Nyuma y’igihe kirekire yabaye imbata y’ibiyobyabwenge aba ku muhanda mu mujyi wa Kigali, Theo Bosebabireba ashimira Imana yamugiriye imbabazi ikamukura muri ubu buzima , akaba ari umugabo wubatse kandi ufite inzu ye bwite mu mujyi wa Kigali .

Ati, “Ikintu nishimira kurusha ibindi mu muziki, ni uko nagiriyemo umugisha . Nabashije kubona aho mba, niyubakira inzu mu mujyi wa Kigali, ubu mfite aho mba n’umuryango wanjye hano muri uyu mujyi .”

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza