Munyanshoza yateguye urugendo rwo kwibuka Abatutsi biciwe i Mibirizi

Yanditswe na

Munyengabe Murungi Sabin

Kuya 13 Mata 2016 saa 12:36
Yasuwe :
0 0

Umuhanzi Munyanshoza Dieudonné yateguye urugendo ruzatangira kuwa 18 Mata kugeza kuri 30 Mata 2016 hibukwa abazize Jenoside yakorewe Abatutsi bari bahungiye kuri Paruwasi ya Mibirizi mu 1994.

Munyanshoza [benshi bita Mibirizi] yavuze ko iwabo ku ivuko aho yarokokeye bibuka mu buryo bwihariye abishwe muri Jenoside. Yasobanuye ko Abatutsi bari bahungiye i Mibirizi bishwe mu byiciro bitatu kuva kuwa 18-30 Mata 1994 ari nayo minsi y’akaga gakomeye ku bahigwaga.

Nk’umuhanzi uvuka muri aka gace wanagize uruhare runini mu bikorwa by’isanamitima, azifatanya n’abarokotse Jenoside mu ijoro ryo kwibuka ndetse ngo hari ibikorwa ateganya kuzakora bigamije gufasha abatishoboye.

Ati “Ndatekereza kugira igikorwa gikomeye nkorera abarokokeye i Mibirizi, hariyo benshi bafite ibibazo by’amashuri, abapfakazi batishoboye […] Nifuza gukora nk’ibitaramo bigari byakusanyirizwamo inkunga yo kubafasha.”

Arongera ati “Ibitaramo nzakora bizaba ari binini, nifuza ko nka Miniteri y’Umuco yampa Stade ya Rubavu ngahuriza hamwe abo mu Burengerazuba, nkazanakora ikindi gitaramo i Huye noneho hakaza abo mu Majyepfo nyuma nasoreza i Rusizi.”

Inkunga izava muri ibi bikorwa arateganya kuzayifashisha abatishoboye barokotse Jenoside i Mibirizi. Muri iki gihe afatanyije na Mariya Yohani gukusanya inkunga izafasha abatishoboye mu Karere CNLG izatoranya uyu mwaka.

Munyanshoza aritegura urugendo azakorera i Mibirizi, azaherekezwa n’abahanzi basanzwe bakora indirimbo z’isanamitima kugira ngo yifatanye n’abavandimwe be barokokeye muri aka gace.

Munyanshoza aranateganya kuzakora ibitaramo byo gufasha abarokoye i Mibirizi

Ati “Iwacu i Mibirizi twibuka ku itariki ya 30 Mata, ni umunsi ukomeye kuko hibukwa Abatutsi bishwe mu bitaro bitatu byahitanye imbaga muri aka gace.”

Kuri Paruwasi ya Mibirizi Abatutsi bishwe mu bitero bitatu bikomeye icyo kuwa 18 Mata cyahitanye benshi gusa ngo kuwa 20 Mata 1994 habaye igitero gikomeye bica abantu bose bari barize.

Kuwa 30 Mata 1994 hagabwe igitero simusiga cyahitanye Abatutsi ibihumbi bari bahungiye kuri Paruwasi ya Mibirizi baturutse mu Mirenge ya Gashonga, Gitambi, Nyakabuye, Nyakarenzo na Nkungu yo mu Karere ka Rusizi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .