00:00:00 IGIHE NETWORK KN KINYARWANDA EN ENGLISH FR FRANCAIS

Impamvu Victor Fidèle yahinduye izina muri The Brothers akiyita Koudou

Yanditswe na

Vénuste Kamanzi

Kuya 9 March 2013 saa 04:23
Yasuwe :

Umuhanzi Gatsinzi Victor Fidèle ubusanzwe wari uzwi mu itsinda rya The Brothers yitwa Victor Fidèle yahinduye gahunda z’umuziki we ndetse ahita anahindura amazina y’ubuhanzi yakoreshaga yiyita Koudou.
IGIHE yagiranye ikiganiro kirambuye na Koudou atubwira ku cyerekezo gishya arimo kwerekezamo umuziki we.
Dore uko ikiganiro cyari giteye:
IGIHE: Ni iyihe mpamvu yatumye uhindura izina wakoreshaga, ukiyita Koudou?
Koudou: Impamvu nahinduye izina n’uko numvaga ngiye gukomeza nkora umuziki, ku (...)

Umuhanzi Gatsinzi Victor Fidèle ubusanzwe wari uzwi mu itsinda rya The Brothers yitwa Victor Fidèle yahinduye gahunda z’umuziki we ndetse ahita anahindura amazina y’ubuhanzi yakoreshaga yiyita Koudou.

IGIHE yagiranye ikiganiro kirambuye na Koudou atubwira ku cyerekezo gishya arimo kwerekezamo umuziki we.

Dore uko ikiganiro cyari giteye:

IGIHE: Ni iyihe mpamvu yatumye uhindura izina wakoreshaga, ukiyita Koudou?

Koudou: Impamvu nahinduye izina n’uko numvaga ngiye gukomeza nkora umuziki, ku rwego mpuzamahanga uvanze n’Ikinyafrika mu njyana, nsanga rero nkeneye izina ry’iri Nyafrika.

IGIHE: Ese Koudou bisobanuye iki?

Koudou: Koudou ni izina ry’inyamaswa yo mu bwoko bwa za Antilope iba muri Afrika.

IGIHE: Ese iryo wari ufite hari icyo warinenze?

Koudou: Izina nari nsanganywe si ukurinenga n’uko numvaga atari izina rijyanye n’icyerekezo nafashe.

IGIHE: Bivuze ko ugiye gushyira ingufu mu muziki wawe wenyine (Carrière solo)?

Koudou: Carrière Solo ndi kuyishyiramo ingufu nyinshi, gusa nkabifashwamo n’abantu benshi bangiriye icyizere bari kumfasha muri byinshi ngo umuziki urenge imbibi z’u Rwanda.

IGIHE: Ese ubundi wumva wifuza kugezahe umuziki wawe?

Koudou: Aho nifuza kugeza umuziki ni kure hashoboka, kuko iyo umuntu ataririmba ururimi rumwe numva ntacyamuzitira (kuri ubu nsigaye akora indirimbo ziganjemo Igifaransa n’Icyongereza).

IGIHE: Urimo gukora iki kugira ngo izo ntego zawe zigerweho?

Koudou: Icyo ndimo gukora ubu ni ukurangiza no gutegura kujya ku mugaragaro kwa Album My Land (umuzingo wanjye wa mbere ntari kumwe n’itsinda rya The Brothers), abari kumfasha abenshi bari no hanze y’u Rwanda bansobanurira neza inzira umuhanzi anyuramo yimenyekanisha, nkaba nishimira urwego tumaze kugeraho nubwo Album itarajya hanze.

IGIHE: Uti “Nkaba nishimira urwego tumaze kugeraho”, ubuse hari ibihugu byo hanze umuziki wawe umaze kugeramo ugakundwa?

Koudou: Indirimbo nkeya nabaye nshyize hanze zimaze kumenyekana cyane cyane ku bantu basura imbuga zitandukanye nyuzaho ibihangano byanjye, nka Facebook, Reverbnation, Myspace,...dore ko ari imwe mu nzira zishobora gutuma ibihangano by’umuhanzi bigera kure kandi mu gihe gito.

IGIHE: Ko bizwi ko ari wowe wari usigaye ufatiye runini cyane The Brothers none nawe ukaba ugiye gushyira ingufu nyinshi mu kwimenyekanisha ku giti cyawe, ubu ibya The Brothers ntibyaba birangiye?

Koudou: Ntababeshye The Brothers yarahagaze ariko ntiyasenyutse. Kuba icyerekezo mu muziki cy’abari bayigize cyaratandukanye ntabwo byayisenye.

Nkeka ko izina The Brothers rifite amateka maremare n’ubwo itagihimba ariko ntibitubuza ko iyo hari abadukeneye duhura tukabataramira twiyibutsa ibihe byiza twagiranye, gusa ntawamenya ishobora kuzagaruka.

IGIHE: Noneho ubu ntawakwirirwa yongera gutega kuzumva indirimbo nshya ya The Brothers?

Koudou: Ubu ndumva bidashoboka.

IGIHE: Urakoze ku kiganiro tugiranye.

Koudou: Murakoze cyane namwe.

Koudou amaze gusohora indirimbo enye zirimo “Hobe Ibyansize” yakunzwe cyane, zikaba zizasohoka kuri album ye ya mbere yise “My Land” izajya ku isoko muri uku kwezi kwa Werurwe, ndetse ateganya kuzakorera n’igitaramo cyo kuyimurika ku mugaragaro mu mpera z’uku kwezi cyangwa muri Gicurasi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .