00:00:00 IGIHE NETWORK KN KINYARWANDA EN ENGLISH FR FRANCAIS

Akigera i Kigali, Jah Bone D yakanguriye abantu gukoresha urumogi uko bikwiye

Yanditswe na

Kalinda Brendah

Kuya 21 July 2015 saa 10:14
Yasuwe :

Rurangirwa Darius uzwi ku izina rya Jah Bone D, uririmba mu njyana ya Reggae, wamamaye cyane mu ndirimbo “Si Abantu” yageze mu Rwanda aje kwitabira Kigali Up, yemeye ko akoresha urumogi gusa asaba abandi barwifashisha kumenya uburyo bakwiriye kurukoresha.

Jah Bone D akigera ku kibuga cy’indege cya Kigali i Kanombe, yavuze ko bantu bitiranya injyana ya Raggae bakayihuza n’ibyo benshi bita ibiyobyabwenge ndetse anavuga ko Reggae ari injyana y’Imana ivuga ibisingizo bya Rurema abantu bose bakwiriye kuyigana.

Yagize ati, “Ubundi abantu bose ni abarasta ni uko batabizi, niba Reggae ivuga urukundo, amahoro n’ubutabera ni gute abantu bahakana ko atari injyana y’Imana kandi Imana ari urukundo ndetse n’ingoro ya Nyagasani ari Ubutabera”.

Uyu muhanzi w’Umunyarwanda usanzwe aba mu gihugu cy’u Busuwisi yasobanuye ko abantu bose bakora Reggae ari abamaze gucengerwa no gusobanukirwa ubutumwa bwihishe mu njyana bakora.

Jah Bonne D uje kwitabira iserukiramuco rya Kigali Up Music Festival ku nshuro ye ya mbere yikomye abafata iyi njyana nk’iyi birara cyangwa abantu badafite icyerekezo. Yashimangiye ko atari iyo myumvire ihabanye n’ukuri ahubwo asobanura ko ibiyobyabwenge abarasita bashinjwa ari ‘ibiyoborabwenge kuri bamwe’.

Yagize ati, “Abantu benshi bakunze kuvuga ngo abarasta banywa urumogi ngo ni ibiyobyabwenge kuki batumva ko byaba ibiyoborabwenge kuko ntekereza ko urumogi atari rubi ahubwo abantu aribo barukoresha nabi”.

Akigera i Kigali, Jah Bone D yakanguriye abantu gukoresha urumogi uko bikwiye

Yungamo ati, “Sinje gukangurira abantu kurukoresha ariko niba ushobora gukoresha urumogi urwiyuhagira,ukarwivurisha dore ko ari umuti wemewe n’abaganga, ukaba waruvanamo imyenda, ubudodo n’ibindi sinumva impamvu abantu bakwiriye kuvuga ko ari ikiyobyabwenge”.

Uyu murasta wantsimbaraye ku ikoreshwa ry’urumogi yavuze ko nawe ubwe arukoresha ariko mu buryo bwo kwivura ndetse anagira inama abarunywa ko bakwiye kwigengesera hato rutazabambura ubuzima.

Ati, “Niba umuntu ashobora kunywa urwo rumogi akubaka imiturirwa icyo gihe ntekereza ko ruba rubaye uruyoborabwenge ahubwo tumenye uburyo rukoreshwamo kandi turubyaze umusaruro”.

Jah Bonn D yashimangiye ko kuva kera na kare abakurambere bakoreshaga urumogi, kuri we agasanga ruramutse ruciwe burundu ari ukugomera Imana yaremye icyo giti.

Nubwo Jah Bone D ari mu ruhande rw’abatiza umurindi ikoreshwa ry’urumogi, mu Rwanda iki gihingwa ni kimwe mu biyobyabwenge bitemewe n’amategeko ndetse umuntu wese ugikoresheje, ugikwirakwiza cyangwa ugicuruza iyo afashwe ahanwa mu buryo bukomeye.

Gusa, hari Leta zimwe muri Amerika ndetse no mu bihugu by’u Burayi urumogi rukoreshwa mu buryo bweruye.

Ku nshuro ya gatanu Kigali Up igiye kuba, Jah Bonn D yishimiye urwego imaze kugezaho umuziki nyarwanda ndetse akaba yaje kwifatanya n’abandi gutanga umusaruro we mu kugeza umuziki nyarwanda ku rundi rwego.

Might Popo utegura Kigali Up ari mu baje kwakira Jah Bone D

Kigali Up ni iserukiramuco rya muzika ngarukamwaka ryatangiye mu 2011, rikaba riteganyijwe kuzaba ku itariki ya 25 na 26 Nyakanga 2015.

Mu bahanzi bazitabira iri serukiramuco harimo Eddy Kenzo, Sauti Sol, Jay Polly, Riderman, Jah Bone D, Makanyaga, Danny Vumbi n’abandi benshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .