KGB yemeza ko abakobwa n’abahungu "bagirana amashyamba"

Yanditswe na M. M.
Kuya 1 Nyakanga 2012 saa 10:31
Yasuwe :
0 0

“Kugirana ishyamba” cyangwa amashyamba ni imvugo yazanywe n’abahanzi, imaze kuba kimomo mu rubyiruko cyane cyane rwo mu Mujyi wa Kigali. Uvuga ko bamujyiriye ishyamba aba ashatse kumvikanisha ko bamugambaniye, ahanini bitewe n’ishyari bamufitiye. Itsinda rya muzika KGB (Kigali Boys) ryatangarije IGIHE ko burya abakobwa n’abahungu nabo bagirana amashyamba.
Nko mu bahanzi, iyo umwe adashaka ko undi azamuka amujyira ishyamba, byaturuka ku bushobozi n’ubuhanga afite uwo ajyiriye ishyamba akaba (...)

“Kugirana ishyamba” cyangwa amashyamba ni imvugo yazanywe n’abahanzi, imaze kuba kimomo mu rubyiruko cyane cyane rwo mu Mujyi wa Kigali. Uvuga ko bamujyiriye ishyamba aba ashatse kumvikanisha ko bamugambaniye, ahanini bitewe n’ishyari bamufitiye. Itsinda rya muzika KGB (Kigali Boys) ryatangarije IGIHE ko burya abakobwa n’abahungu nabo bagirana amashyamba.

Nko mu bahanzi, iyo umwe adashaka ko undi azamuka amujyira ishyamba, byaturuka ku bushobozi n’ubuhanga afite uwo ajyiriye ishyamba akaba yarinda asaza atamenyekanye cyangwa yaba azwi akamuzimya (kuzimya umuntu ni ukumwibagiza abari bamuzi, yewe n’abamukundaga).

Umwe mu basore batatu bagize KGB ariwe Rurangwa Gaston “Mr Skizzy” mu izina rya KGB yatangarije IGIHE ko abakobwa bagirana amashyamba, yabivuze asubiza ikibazo yari abajijwe cy’impamvu nyamukuru yatumye basohora indirimbo “Bibi”.

Mr. Skizzy yagize ati: “Bibi twayikoze ku gitecyerezo cya Dj B (wo muri Big Town Record), twayikoze tugamije guca ingufu ba kirogoya b’urukundo ndetse no kongerera ingufu abazicibwa n’abo bakirogoya.”

Yakomeje agira ati: “Ubundi buriya kugira ngo umuhungu yange umukobwa ahanini bituruka ku bantu bamubwira ko akundana n’umukobwa mubi, ukecuye (Bibi), uteye nabi, cyangwa ibindi nk’ibi.”

Mr. Skizzy yavuze ko kandi abakobwa bo badakunze kwanga umuhungu ngo kuko babwiwe ko ari mubi cyangwa ari umukene, ahubwo ngo bo akenshi banga umuhungu kuko abaca inyuma cyangwa babwiwe ko abikora (kubaca inyuma).

Biturutse kuri ibi yahise yongeraho ati: “Burya abakobwa n’abahungu bagirana amashyamba”. Mr Skizzy avuga ko iyo umukobwa cyangwa umuhungu akunze umuntu akabona ntaho yamenera kuko uwo muntu afite undi akunda by’ukuri ahita ajyira ishyamba uwo uwo akunda , maze yaba ari umukobwa akamubwira ko umukunzi we arya abana (kuryamana n’abandi), yaba ari umuhungu akamubwira ko umukunzi we ari ka bibi (ka mukecuru) n’ibindi, agamije kubatanya.

Mr Skizzy yatangaje ko abihamya yihereyeho ndetse na mugenzi we; ngo MYP byamubayeho atandukana n’umukunzi we bapfuye ko bashinja ngo arya abana, naho Mr Skizzy bimaze kumubaho inshuro zirenga imwe, ubwo biheruka kumubaho byari mu mwaka wa 2010.

KGB ni rimwe mu matsida ya muzika mu Rwanda yabimburiye ayandi guhanga nyuma ya Jenoside yakorewe Abatutsi, ariko ryari rimaze igihe kitari gito ritumvikana kuko ritakoraga; ubu risa n’iryagarutse mu ruhando rwa muzika guhera aho risohoreye iyi ndirimbo “Bibi”.

Bibi ni indirimbo umuntu yavuga ko ari nziza abihereye ku butumwa buyirimo, uburyo ikozwemo; amajwi y’abarirmbyi n’imiririmbire; amagambo ayigize n’uburyo atondekanyije; ndetse n’indimi ziyigize.

Bibi yakozwe na Producer Mastola uzwi ho ubuhanga, uburyo yayikozemo butandukanye n’ubwo izindi ndirimbo za KGB zose zikozwemo, n’ubwo na yo yacurangishijwe mudasobwa, icuranzwe mu buryo Nyafurika.

Muri iyi ndirimbo haririmbwamo indimi nyinshi, eshanu nizo twabashije kumenya ari zo Ikinyarwanda, ikirundi, Igiswayili, Igifaransa ndetse n’Icyongereza ; aho inyinshi muri izo zigaraga mu gitero cya Mr Skizzy.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza