Byinshi ku buzima n’urupfu by’umuririmbyi Hirwa Henry wa KGB

Yanditswe na

Richard Irakoze

Kuya 3 Ukuboza 2012 saa 07:15
Yasuwe :
0 0

Benshi mu bahanzi n’abari basanzwe bamuzi batunguwe kandi bagaragaza ko bakomerewe no kwihanganira iby’urupfu rwa Hirwa Henry, umuhanzi waririmbaga mu itsinda rya KGB.
Henry yapfuye kuri uyu wa Gatandatu tariki ya mbere Ukuboza 2012, arohamye mu kiyaga cya Muhazi mu Ntara y’Iburasirazuba. Umunyamakuru wa IGIHE yasuye umuryango we uba Kimironko, aganira n’umwe muri bashiki be bari kumwe ubwo yitabaga Imana, inshuti ze n’abandi.
Uwanyirigira Telesphore, na we yari kumwe na Henry mu rugendo (...)

Benshi mu bahanzi n’abari basanzwe bamuzi batunguwe kandi bagaragaza ko bakomerewe no kwihanganira iby’urupfu rwa Hirwa Henry, umuhanzi waririmbaga mu itsinda rya KGB.

Henry yapfuye kuri uyu wa Gatandatu tariki ya mbere Ukuboza 2012, arohamye mu kiyaga cya Muhazi mu Ntara y’Iburasirazuba.
Umunyamakuru wa IGIHE yasuye umuryango we uba Kimironko, aganira n’umwe muri bashiki be bari kumwe ubwo yitabaga Imana, inshuti ze n’abandi.

Uwanyirigira Telesphore, na we yari kumwe na Henry mu rugendo (picnic), akaba ari na we wamenye bwa mbere ko mugenzi wabo ashobora kuba yarohamye.

Aganira na IGIHE Uwanyirigira yavuze ko bageze ku kiyaga cya Muhanzi Henry akazana igitekerezo cyo koga bakina Volleyball mu mazi. Akomeza avuga ko baje guhita batangira gukinira uwo mupira w’amaboko mu mazi, nyuma buri wese agakomeza yoga uko ashaka.

Uwanyirigira avuga ko we yaje guhita ajya mu byo gushakira abo bari kumwe icyo kunywa. Avuga ko ubwo yazaniraga Henry icyo kunywa yamushatse akamubura, nuko akabaza abo bari kumwe bakavuga ko bamubonye yoga.

Avuga ko ubwo ari bwo batangiye gukuka umutima bibaza aho yaba yagiye.

Ngo ni bwo bahise batangira kumushakisha boga bagana aho yari ari, kandi ngo ntihari na kure kuko hari mu nkengero z’ikiyanga mu metero zitarenze 20; ni bwo rero umuntu umwe yaje kumwumva maze aramuzamura.

Bakimara kumuzamura ngo bamukoreye ubutabazi bw’ibanze bashoboye, bamuha umwuka bamurutsa amazi yari yanyoye ariko bakabona atazanzamuka.

Ibyo byose binaniranye bahise bigira inama yo kumujyana kwa muganga i Rwamagana, bahagera mu minota 30 bavuye i Kayonza aho bari bari.

Ubwo bagendaga mu modoka bakomeje kumuha ubutabazi bw’ibanze ariko bakigera kwa Dogiteri yababwiye ko yashizemo umwuka, atagihumeka.

Kugeza ubu abo bari kumwe bavuga ko batazi icyamwishe, kuko bataramenya impamvu nyakuri yo kurohama kwe.

Ubuzima bwa Hirwa busanzwe…

Yitwaga Hirwa Henry, akaba mwene Kayibanda Ladislas na Mukazera Olive.

Yavutse ku wa karindwi Kamena 1985 (imyaka 27), avukira i Bujumbura mu Burundi. Ni umwana wa kabiri mu bana bane b’uyu muryango. Ni we wari umuhungu wenyine.

Imfura mu muryango we ifite imyaka 30, bucura akagira imyaka 20 ari na we Nyampinga w’u Rwanda 2012 Mutesi Aurore.

Amashuri abanza yayatangiriye i Burundi aza kuyakomereza i Gikondo ari na ho yayarangirije. Ayisumbuye yayize kuri Groupe Scolaire Kabuga (APERWA), aza gukomereza i Gikondo ayasoreza kuri APAPE.

Yize umwaka umwe muri Kigali Institute of Management (KIM). Yateganyaga gukomeza amashuri ye muri Mutarama 2013.
Mubyara we aganira n’umunyamakuru wa IGIHE, yavuze ko Henry yarangwaga no guseka kandi ko yitondaga. Yongeraho ko yakundaga gutabara bagenzi be, ku buryo yashoboraga no kuba yafata isafari ngo atabare.

Mushiki we, avuga ko Henry yubahaga umuto n’umukuru.

Uko yinjiye mu buhanzi

Kwinjira mu buhanzi kwa Henry byatangiye ubwo yabyinaga mu itsinda rya ‘Cool Friends’. Yaje kuza guhura na Skizzy na we wari muri iri tsinda ariko we aririmba, nuko biza kurushaho gukomera ubwo bazaga guhurira mu ishuri rimwe kuri APACE.

Rurangwa Gaston uzwi ku izina rya Skizzy, aganira na IGIHE yavuze ko uku guhura ari bwo baje kwisangamo impano ndetse babiganiriza na mugenzi wabo MYP bahitamo gushinga itsinda baryita KGB-Kigali Boyz.

Indirimbo ya mbere bashyize bakoze yitwa “Abakobwa b’i Kigali” basohoye mu 2003. Iya nyuma baherukaga gusohora ni iyitwa “Bibi”. Skizzy avuga ko bari bamaze gukora indirimbo zirenga 30.

Avuga ko nyuma y’aho mugenzi wabo MYP agiriye muri Leta Zunze Ubumwe za Amerika bari bategereje ko bisuganya bakongera gushyira izindi ndirimbo hanze zirimo iyitwa “Iwacu ni Heza” basubiranyemo na Mani Martin ndetse n’izindi ebyiri zikiri muri ’studio’ zirimo amajwi ya Henry.

Amagambo ye ya nyuma

Iyo urebye ku rubuga rwa Facebook ku rukuta rwe, Henry yanditse amwe mu magambo agira ati “Ibyo dukora byose bitandukanye gusa tugomba kumenya ko Imana iriho kdi ishobora byose.”

Henry kandi yari yanditse agaragaza ko gutangira ukwezi gusoza umwaka bimushimishije, avuga ko umwaka wa 2012 kuri we wari wagenze neza. Yari yanditse agira ati “Oh! 2012 igendere sinakwangaga; gusa wambereye nziza pee ! ”

Imihango yo kumushyingura

Henry azashyingurwa kuri uyu wa gatatu tariki ya gatanu Ukuboza 2012 (05-12-2012) saa saba z’amanywa ( 13h00’) i Rusororo.
Misa yo kumusabira izabera kuri Paruwasi ya Regina Pacis i Remera saa tanu z’amanywa.

KGB na Miss Jojo na Dady de Maximo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza