00:00:00 IGIHE NETWORK KN KINYARWANDA EN ENGLISH FR FRANCAIS

Ibyishimo bisendereye mu rugo rwa Ciney n’uwo baherutse kurushinga

Yanditswe na Munyengabe Murungi Sabin
Kuya 11 July 2017 saa 02:41
Yasuwe :

Ciney uri mu bakobwa bakunzwe muri Hip Hop yo mu Rwanda aherutse kurushingana na Tumusiime Ronald bari bamaze imyaka ine bakundana, ibyishimo byikubye inshuro zitabarika ku bw’isezerano bahanye nk’umugabo n’umugore.

Umuraperi Ciney na Ronald bambikanye impeta y’urudashira mu rusengero rwa St Etienne i Nyamirambo ku itariki ya tariki 2 Nyakanga 2017.

Ubukwe bwabo bwari bumaze amezi atatu buvugwa mu itangazamakuru, bwavuzwe cyane guhera tariki ya 26 Werurwe 2017, ubwo Ronald yambikaga Ciney impeta mu gitaramo cyabereye muri Serena Hotel.

Mu kiganiro na IGIHE, Ciney yavuze ko nyuma y’icyumweru kimwe yubatse urugo ngo hari byinshi byahinduye ku buzima bwe, muzika n’akazi ko akora gasanzwe bitewe ahanini n’umwanya munini asigaye aha umuryango mushya yatangiye.

Yagize ati “Icyo navuga kidasanzwe wenda muri iyi minsi ni uko hari byinshi byahindutse, mbere nabagaho ndi umwe menya ibyanjye nk’umukobwa ariko ubu ngombwa gutekereza no ku mugabo Imana yampaye tugakorera hamwe muri byose.”

Ciney yabonye impinduka…

Ciney yavuze ko yabonye ibyishimo bisendereye nyuma y’igihe gito amaze arushinze, na mbere y’uko ashaka umugabo ngo yari afite umutuzo gusa muri iki gihe ‘yabonye impinduka zidasanzwe’.

Ati “Nka mbere urumva nabaga ndi kumwe na we bwakwira wenda bigeze nka saa mbili ngahita mubwira nti ‘reka ntahe burije’ ariko ubu ibyo byose byavuyeho, ndi kumwe na we ibihe byose, turaryohewe ni ukuri […] cyakora hari igihe ntera urwenya nkamwitungura twicaye muri salon nti ‘burije ndatashye’ tugaseka twese.”

Yavuze ko nyuma y’iminsi mike arushinze ngo hari ibyatangiye guhinduka mu buzima bwe uhereye ku mitekerereze ye n’uburyo atoranya imyenda yambara mu gihe hambere yabagabo mu bwigenge bwe.

Yagize ati “Nonese, biratandukanye cyane, nka mbere nambaraga uko mbyifuza bitewe n’aho ngiye nk’umukobwa nyine, ariko ubu byarahindutse, hari nk’igihe mfata umwenda umugabo agahita ambuza ngo naba nambaye nk’abana. Ubu mbese biba byangoye, sindumva uburyo Ciney agomba kwambara amakanzu y’abagore cyangwa nko gukenyera ibitenge.”

Ijambo rya Ciney ku bahanzi batarashaka…

Yagize ati “Mbere y’uko nkora ubukwe hari benshi mu bantu bakuru bambwiraga ngo ‘hariya ugiye uzahangayika, ngo ibintu ugiye gukora bisaba kwihangana’ n’ibindi byinshi, abantu bari banteye ubwoba cyane ku buryo hari igihe nagiraga ubwoba ariko ngeze mu rugo nsanga biratandukanye.”

Yongeyeho ati “Nta mpamvu yo kugira ubwoba, gushaka umugabo biraryoha, ubona ibyishimo utabonaga mbere […] Nababwira[abakobwa bagenzi be] ko nta kigoye kirimo, umugabo atuma byinshi bihinduka kurushaho, icyanshimishije ni uko njye na Ronald nta kugorana kwabayemo, uko twakundanaga mbere ni nako tukibanye, tubaho bwa buzima busanzwe.”

Ciney ngo yabonye ibyishimo by'ikirenga nyuma yo kurushingana na Ronald

Ciney yavuze ko namara gusubira ku murongo neza amaze gushira amavunane yo gutegura ubukwe ngo azasubira muri studio gukora indirimbo mu njyana ya Hip Hop nk’uko byari bimeze atararushinga.

Yagize ati “Icyo nakubwira ni uko ubukwe butera stress ikomeye, wumve ko hari igihe nicaraga nkumva nk’ejo byose byarangira tugahita twibanira kubera stress nabaga nagize […] Ibyo gukora umuziki byo bizakomeza, nibishoboka vuba nzabazanira akaririmbo gashya.”

Ciney amaze icyumweru kimwe arushinze
Ciney na Ronald barushinze nyuma y'imyaka ine yari ishize bakundana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .