Ingabire Jeanne d’Arc benshi bazi ku izina ry’ubuhanzi rya Knowless mu ijoro ryo kuri uyu wa Gatandatu Tariki ya 19 Nyakanga 2014 nibwo yakoze igitaramo cyo kumurika album ye ya Gatatu yise BUTERA mu rwego rwo guha icyubahiro nyakwigendera Butera ari na we se umubyara.
Mu gitaramo yakoreye muri Serena Hotel i Kigali, Knowless yongeye kwereka abakunda ibihangano bye ko hari intambwe ikomeye umuziki we umaze kugeraho ndetse akaba anafite inyota yo gutera indi ntambwe ikomeye kugira ngo agere ku rundi rwego rukomeye.
Mbere gato yo kugera ku rubyiniro ngo aririmbire abafana bari buzuye Serena Hotel , Knowless yabanjirijwe n’abahanzi bagenzi be muri Kina Music, Tom Close, Christopher, Dream Boyz na Makanyaga; bose bakaba baririmbye mu buryo bwa live.
Ageze ku rubyiniro yatangiriye ku ndirimbo ihimbaza Imana akurikizaho indirimbo zigize iyi album ya Gatatu. Igitaramo kigeze hagati Knowless yaririmbye Imena gitero ya Rugamba Sipiriyani amuha icyubahiro. Ben Kayiranga usanzwe uba mu Bufaransa na we yafatanyije na Knowless kuririmba iyo bakoranye nayo igaragara kuri iyi album.
Knowless yiyeretse abafana agaragara mu buryo bwari bubereye ijisho , yari afite ababyinnyi bagaragaje ko bakoranye na we imyitozo mu buryo buhagije ndetse by’umwihariko uyu mukobwa yari yateguye urubyiniro rwe mu buryo bushimishije akaba yahinduranyaga isura y’uko yagaragaraga n’aho yaririmbiraga kuri buri ndirimbo agiye kuririmba.
Muri iki gitaramo kandi herekanwe bwa mbere amashusho y’indirimbo Twaribohoye yahuriwemo n’abahanzi bose bagize Kina Music.
Mu ijambo yavuze mu minota ya nyuma y’igitaramo, Knowless yashimiye ababyeyi be bamwibarutse, ashimira : imiryango yose yamufashishe kuva akiri umwana muto kugeza abaye inkumi, itangazamakuru, abaterankunga(Bralirwa, Cogebanque, MTN…), Kina Music n’abafana be bose muri rusange.
TANGA IGITEKEREZO