Ibi yabigaragaje mu imurikabikorwa yise ‘Umukororombya’ ryakozwe mu buryo bw’ibihangano by’imideli n’ubugeni bisingiza abagore n’urukundo muri rusange abikesha inshuti yagize mu buzima.

Iri ni imurika ryabereye kuri Institut Français du Rwanda, ryakozwe mu buryo bwihariye aho yakoresheje ibihangano byo mu budodo n’abantu mu kugaragaza ubutumwa yashakaga gutanga.

Ibi bihangano byose byagarukaga ku bikorwa by’indashyikirwa bikorwa n’abagore birimo kurera n’indi mirimo bagiramo uruhare itanga umusanzu muri sosiyete.

Hanagarajwe kandi inkuru zo mu bwana mu kwibutsa abantu ibyo banyuzemo. Urugero ni ibyo abantu bajyaga bavuga ko iyo umuntu araye mu muvure cyangwa isekuru igitsina cye gihinduka.

Shema yabwiye IGIHE ko yatekereje gukora iri murikabikorwa kugira ngo ahe agaciro abagore, by’umwihariko abo basanzwe bakorana bo mu Karere ka Rusizi bakora imyambaro mu budodo.

Ati “Ibintu byinshi nakoresheje bikozwe mu budodo, nabikoze nshaka guha ikuzo abagore babukora, mfata ibyo bakora mbishyira mu buryo bwanjye nashakaga kubaha icyubahiro.”

Yakomeje avuga ko icyo yifuza ko abantu bakura muri iri murika ari ugukundana no guha agaciro abagore.

Ati “Navuga ko abantu bahakuye umukoro wo gusubira mu bwana bakiyibutsa inkuru za cyera, kwibaza icyo inshuti zimaze mu buzima, gushaka akamaro k’urukundo no kumenya urukundo nyakuri.”

“Ikindi ni ukumenya ubushobozi bw’abagore muri sosiyete ibyo bakora tudaha agaciro kandi bo bibabeshejeho.”

Shema ni umwe mu bahanzi b’imideli bashya batanga icyizere kuko akora ubwoko butandukanye bw’imyambaro akoresheje intoki, afite umwihariko wo gukora imyamabaro itanga ubutumwa kurenza icuruza.

Shema yavuze ko urukundo rukwiye kuyobora abantu mu buzima bwa buri munsi

Yagaragaje umukororombya nk'ikimenyetso cy'urukundo

Shema yakoze ibi bikorwa mu kugaragaza agaciro abagore bafite muri sosiyete

Hagaragajwe inkuru abantu bakuze bumva ko iyo uraye mu muvure igitsina cyawe gihinduka

Hagaragajwe agaciro ko kugira inshuti mu buzima