Ne-Yo yishimiye Umushanana yari yambaye mu birori byo Kwita Izina

Yanditswe na Nsengiyumva Emmy
Kuya 7 Nzeri 2019 saa 12:29
Yasuwe :
0 0

Umuhanzi Ne-Yo yatangaje ko yari aberewe n’umwambaro wa Kinyarwanda yari yambaye mu birori byo kwita izina abana b’ingagi kuri uyu wa Gatanu.

Uyu muhango wabaga ku nshuro ya 15 witabiriwe n’ibyamamare byise amazina aganisha ku mbaraga za Leta y’u Rwanda mu kubungabunga urusobe rw’ibinyabuzima by’umwihariko ingagi zo mu misozi irimo na Pariki y’Igihugu y’Ibirunga.

Abana b’ingagi bahawe amazina ni abavutse hagati ya tariki ya 1 Nyakanga 2018 n’iya 11 Gicurasi 2019.

Kuri iyi nshuro uyu muhango witabiriwe n’ibyamamare birimo Umwongereza Naomi Campbell; Umunyamerika w’icyamamare mu muziki wa RnB, Ne-Yo; Umunyabigwi muri ruhago Tony Adams wakiniye Arsenal yo mu Bwongereza, Sherrie Silver na Meddy bakomoka mu Rwanda n’abandi.

Aba bose bari bambaye Kinyarwanda imyambaro bambitswe na UZI Collection.

Ne-Yo ubwo yari avuye muri uyu muhango yifashishije urukuta rwe rwa Instagram agaragaza ko yishimiye uyu mwambaro.

Ati “Byari ibihe byiza mu birori byo #KwitaIzina19 mu Rwanda. Nise umwana wanjye w’ingagi ’Biracyaza’, Umwambaro wanjye wa gakondo na wo wari agatangaza! Ndumva nahawe icyubahiro kidasanzwe.”

Naomi Campbell we yavuze ko ari iby’agaciro kuba yitabiriye uyu muhango ariko by’umwihariko kuba yahawe amahirwe yo kwita izina ingagi.

Ati “Nashimishijwe no guhabwa amahirwe yo Kwita Izina umwe mu bana 25 b’ingagi biswe amazina. Ni ibintu ntashobora kuzibagirwa, ’Intarutwa’ ni izina nahitiyemo umwana w’ingagi wavutse mu Ukuboza tariki 13 mu mwaka wa 2018.”

Usibye Ne-Yo cyangwa Naomi Campbell bavuze kuri ibi birori batumiwemo, abandi b’ibyamamare nka Tony Adams wamenyekanye mu Ikipe ya Arsenal n’umubyinnyi Sherrie Silver bose bagaragaje ibyishimo batewe n’iki gikorwa.

Nyuma y’uyu muhango hateganyijwe isangira n’igitaramo kuri uyu wa Gatandatu kirimo Ne-Yo. Kwinjira mu isangira ku meza y’abantu 10 ni ukwishyura $1200, hari itike y’abantu babiri bashobora kwishyura ibihumbi 230 by’amafaranga y’u Rwanda cyangwa se ibihumbi 130 Frw ku muntu umwe aya yo yamaze no gushira.

Ni mu gihe kwinjira mu gitaramo gusa mu myanya y’icyubahiro ari amafaranga ibihumbi 50 Frw, ibihumbi 25 Frw n’ibihumbi 15 Frw mu myanya isanzwe na 3000 Frw ku banyeshuri.

Naomi Campbell yishimiye amahirwe yahawe yo kwita izina umwana w'ingagi
Ne-Yo yishimiye umwambaro wa Kinyarwanda (Umushanana) yari yambaye mu birori byo Kwita Izina
Tony Adams yishimiye kuba yitabiriye uyu muhango wo kwita amazina abana b'ingagi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza