00:00:00 IGIHE NETWORK KN KINYARWANDA EN ENGLISH FR FRANCAIS

Kuki kwambara ‘gourmette’ mu Rwanda bisanishwa n’uburaya?

Yanditswe na Mukahirwa Diane
Kuya 22 June 2022 saa 09:16
Yasuwe :

Kera nkiba mu cyaro iyo twabonaga umugore cyangwa umukobwa uvuye mu mujyi aje yambaye ‘isheni’ ku kuguru, twamugenderaga kure kuko twakuze batubwira ko aba ari indaya.

Icyo gihe nabifatanyaga n’icyaro n’ubwana, nkagendera kuri iyo myumvire gusa nza gutekereza ko bitari byo. Mu minsi ishize twari mu birori ahantu ngiye kumva numva umwe yongereye undi ngo si narinzi ko uriya mukobwa yabaye indaya.

Ubwo bavugaga umwe mu bari bitabiriye ibyo birori. Byanteye amatsiko kuko nsanzwe muzi kandi ntamuziho izo ngeso, mbaza ababivugaga aho babikuye bati ‘nonese ntureba ko yiyambitse amasheni ku maguru bisobanuye ko yigurisha’.

Mu by’ukuri si aba gusa bafite iyi myumvire, ahubwo usanga abantu benshi mu Rwanda iyo babonye umuntu wambaye isheni ku kaguru (Anklet) izwi nka ‘gourmette’ bamufata nk’indaya.

Ibi nibyo bituma abantu bazambara kubwo kuzikunda ariko hakaba ababikora bihishahisha cyangwa bafite isoni kuko usanga sosiyete ibafata nk’abakora uyu mwuga.

Kwambara ‘gourmette’ byaturutse he?

Usanga kenshi twihutira gukora ikintu ariko tutazi imvo n’imvano yacyo, nabajije abakobwa batanu basanzwe bamabara ‘gourmette’ niba bazi aho byaturutse bavuga ko babikora by’umurimbo gusa.

IGIHE yifashishije imbuga zitandukanye nka Boutique Event Group, Vanguard n’izindi yabateguriye amateka y’iyi mirimbo yambarwaga ku maguru, inkomoko yayo n’ibindi benshi bayibazaho.

Ubundi ‘anklet’ cyangwa ‘gourmette’ iba ikozwe nk’igikomo ariko cyagenewe kwambarwa ku maguru ahagana hasi ku kirenge. Hari izikozwe mu miringa na zahabu, ibiti, amasaro n’ibindi.

Abantu batangiye kwambara iyi mitako ku maguru mbere ya Yezu mu Mujyi wa Babuloni, yambarawaga n’abagore baho nk’umutako cyangwa bashaka kwerekana icyiciro cy’ubuzima barimo.

Muri iyi myaka kandi yambarwaga n’abagore mu Misiri, aho ababaga bashaka kugaragaza ko ari abakire, bambaraga ikoze mu byuma n’amabuye y’agaciro.

Gusa ku rundi ruhande muri iki gihugu ‘gourmette’ zabaga zikozwe mu biti n’uruhu zambagarwaga n’abacakara.

Amateka agaragaza ko kwambara ‘gourmette’ byatangiriye mu Buhinde mu myaka 800 mbere ya Yezu. Abagore bakoze ubukwe bayihabwaga nk’ikimenyesto cyo kubifuriza urugo ruhire cyangwa abakobwa bakayambara bashaka kugaragaza icyubahiro cyabo.

Kwambara ‘gourmette’ bihabwa ibisobanuro bitandukanye bitewe n’umuco w’ahantu ndetse n’ukuguru uyambayeho ibara n’ibindi bituma ukubonye atanga igisobanuro ashatse.

Mu Buhinde iyo umugabo yajyaga gushaka umugore yamuhaga impano ya ‘gourmette’ nk’uko ubu hari abamuha impeta bamusaba ko bazabana niko byagendaga mu myaka yo ha mbere.

Akenshi kwambara ‘gourmette’ ibisobanuro byabyo bigendana n’ukuguru uyambayeho. Uyambaye ku kuguru kw’ibumoso bisobanura ko yashatse yaba ari umukobwa bikagaragaza ko yishimiye urukundo arimo kandi rufite intego.

Kuyambara ku kuguru kw’ibumoso byahabwaga ibisobanura bitandukanye hari ubwo byafatwaga nk’umukobwa uri gushaka umukunzi cyangwa bigafatwa nk’umuntu ushaka kujya mu rukundo ruganisha ku busambanyi bishobora no kuba ari aha bamwe mu Banyarwanda bahera bavuga ko yambarwa n’indaya. Hari n’abafataga uyambaye nk’umugore ukunda abagore bagenzi be.

Iyo wayambaraga ibumoso uri umugore washatse byafatwaga nko kuba ushaka abandi bagabo mwajya mu rukundo batari uwo mwashakanye.

Amateka twavuze haruguru amaze imyaka myinshi abayeho gusa no muri iyi myaka abantu bambara ‘gourmette’, uyu ni umuco wamamaye cyane mu bihugu byo mu Burengerazuba bw’Isi.

Gusa no muri Afurika zirambarwa cyane kandi zatangiye kwambarwa kuva kera, izikoze mu masaro n’ibiti zambarwaga n’abagore n’abakobwa, bashaka kugaragaza ibyiza by’umuco wabo.

Muri iyi myaka mu Buhinde iyo wambaye ‘gourmette’ babifata nk’ikimenyetso cyo gushyingirwa cyangwa uri mu rukundo rweruye, mu Misiri ho zambarwa n’abagore bashaka kugaragaza icyiciro cy’ubuzima barimo bitewe n’agaciro k’izo bambaye.

Mu bihugu byo mu Burengerazuba bw’Isi ho babifata nk’umurimbo usanzwe nk’uko bakambara ibyo mu ijosi, ibikomo n’impeta n’indi mirimbo kugira ngo barusheho gusa neza.

Impaka z’urudaca mu Rwanda

Mu Rwanda kwambara ‘gourmette’ bifitweho imyumvire itandukanye ariko usanga benshi bagwisha ku ijyanye no kuba umukobwa uyambaye ari indaya n’ibindi bijyana nabyo.

Nubwo usanga babijyaho impaka zidasanzwe ariko amateka y’Abanyarwanda agaragaza ko ababayeho kera bambaraga imirimbo ku maguru. Hari Ubutega, bwabaga bukoze mu tuziga duto tuboshye. Abagore babwambaraga ku maguru yombi.

Abishoboye bashoboraga kwambara ubugera ku maguru hejuru, bitewe n’ubushobozi bwo kubwigurira. Bwagiraga icyo buhindura ku ntambuko y’ubwambaye.

Hariho kandi n’imiringa, yambarwaga ku maboko no ku maguru. Abagabo bambaraga umwe cyangwa ibiri ku maboko, naho abagore bakambara myinshi ku buryo hari n’igihe yageraga mu nkokora.

Nubwo bigaragara ko byahozeho mu Rwanda ariko benshi ntabwo babivugaho rumwe usanga hari abemeza ko ari uburaya kandi uko uyambaye aba yicuruza abandi bakavuga ko ari umurimbo usanzwe.

Murigande Marie Jeanne ni umwe mu babyeyi baganiriye na IGIHE yavuze ko yakuze abona abakobwa bamabara ‘gourmette’ ari abavugwa muri iyo mico bituma nawe abafata utyo.

Ati “Mu myaka yashize i Kigali haje ubwo busirimu bwo kwambara isheni ku maguru ariko mu by’ukuri ababyadukanye n’ubundi babaga ari ba bakobwa basanzwe bafite imico mibi yo gushaka abagabo, babagura ntekereza ko ariho byaturutse.”

Yakomeje avuga ko n’ubu we aba abona umukobwa wambaye ‘gourmette’ ari umunyamico mibi.

Ati “Ubundi ku kaguru nta mirimbo idasanzwe iba ihakwiye mbona ababyambara baba bafite ikindi gisobanuro bashaka gutanga, kijyana cyane n’iyo mico.”

Ku ruhande rw’abambara ‘gourmette’ bo bavuga ko babyambara by’umurimbo bagamije kurushaho gusa neza, bemeza ko babangamirwa no kubona abantu babatangarira cyangwa babavuga ibindi.

Bisa Ntete Léana yambara ‘gourmette’ agamije kwirimbisha yavuze ko nawe ajya yumva abavuga ko yambarwa n’indaya gusa atari ukuri.

Ati “Njye nyambara ngamije kurimba ni nk’uko nambara amaherena n’ibindi gusa nanjye njya numva abantu bavuga ko bigaragaza uburaya, hari n’ubwo bituma wumva ubangamiwe gusa umuntu abikora agamije kurimba.”

Mu Rwanda ntabwo abantu bavuga rumwe kuri ‘gourmette’ gusa umubare w’abayambara ugenda uzamuka haba abambara ebyiri ku maguru yombi, imwe ndetse n’abagabo basigaye bazambara.

Abambara ‘gourmette’ mu Rwanda bavuga ko ntaho bihuriye n'uburaya nubwo hari benshi babitekereza gutyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .