00:00:00 IGIHE NETWORK KN KINYARWANDA EN ENGLISH FR FRANCAIS

Inzu nyarwanda y’imideli yafunguye ishami i Texas (Amafoto)

Yanditswe na Mukahirwa Diane
Kuya 2 June 2022 saa 08:21
Yasuwe :

Inzu y’imideli yo mu Rwanda yitwa Urutozi Gakondo yafunguye ishami muri Leta Zunze Ubumwe za Amerika muri Leta ya Texas, mu rwego rwo kwegera no guhaza isoko ryo muri iki gice rimaze kuba rinini.

Urutozi Gakondo Ltd yatangiye gukorera mu Rwanda mu 2019 ishinzwe na Amini Deodactus, umusore wize siyansi ariko akigarurirwa n’imideli kubera icyuho yabonaga mu myambaro y’abagabo.

Muri Urutozi Gakondo Ltd bakora imyambaro itandukanye, 70% igizwe n’iyo bitekerereza naho 30% ari nayo igurishwa ku giciro cyo hejuru ni iyo abakiliya babasaba.

Ubuyobozi bw’iyi nzu buvuga ko iyi myenda yakunzwe cyane n’Abanyarwanda baba mu mahanga n’inshuti zabo batangira kujya bayitumiza banyuze ku rubuga rwabo no ku mbuga nkoranyambaga bakayohererezwa.

Amini amaze kubona ko isoko rye riri hanze cyane yatangiye gutekereza uko yahashyira amashami kuko usanga nko mu kwezi bohereza byibuze imyambaro 15 muri Leta Zunze Ubumwe za Amerika.

Mu 2021 bafunguye iduka i Dubai kuko bari bamaze kuhabona abakiliya benshi kandi babona hari n’Abanyarwanda bahaba n’abahagenda cyane. Mu ntangiriro za 2022 bari bafite umuhigo wo kugera muri Leta Zunze Ubumwe z’Amerika nka kimwe mu bihugu boherezamo imyambaro myinshi.

Nyuma yo gutanga ibisabwa byose ngo bemererwe gucururiza muri Texas kuri uyu wa Kabiri babonye uruhushya rubemerera kuhakorera ibikorwa.

Mu kiganiro na IGIHE Amini yavuze ko babonye bafite isoko ryagutse muri Amerika bahita bifuza kuhashinga iduka kuko hari abagorwaga no kuba batuma ibintu kuri murandasi.

Ati “Iyo ufite ahantu hari abantu benshi bishimira ibyo ukora niho uhanga amaso, twahisemo kujya Texas kuko haba Abanyarwanda benshi kandi bakunda ibyo dukora.”

Yakomeje ati “Hari abantu burya batizera ibyo babona ku mafoto bakaba batinya kubitumiza, abo nibo twavuze ngo reka tubegere babone ibyo dukora mu buryo bworoshye.”

Amini yashinze iyi nzu y’imideli amaze kubona ko abagabo bambara amabara abiri cyane (Umukara n’umweru), nyuma y’imyaka irenga itanu amurika imideli yaje gufata amasomo yo guhanga imideli kuri Coursera, atangira yikorera iyo yambara n’abandi baza kuyimusaba atangira kubakorera nabo.

Byatumye atangira gukora imyenda itandukanye y’abagabo iri mu mabara menshi idoze no mu bwoko bwinshi kugira ngo abayishaka bayibone bitabagoye.

Yaje kubona ubusabe bw’abagore benshi, bashaka ko yajya abakorera imeze nkayo.

Urutozi Gakondo Ltd ikora ibikorwa bitandukanye birimo guhanga imyambaro, gutegura ibirori by’imyidagaduro n’ibindi. Mu guhanga imyambaro bo bakora ibishushanyo bakajya ku yidodesha ku ruganda rwa Asante ruherereye i Nyamata.

Kugeza ubu iyi nzu y’imideli ifite icyicaro mu Rwanda n’amashami i Dubai na Texas ariko imyambaro yabo igera no mu bihugu birimo u Bubiligi, u Bufaransa, Kenya, Canada n’ahandi.

Mu 2023 bafite intego gufungura amashami mu Bubiligi nk’ahaba Abanyarwanda benshi no muri Koreya y’Epfo kuko ibyo bakora abantu baho babikunda.

Bibanda ku myambaro y'amabara atandukanye akunda kwambarwa n'abagore bakayidodera n'abagabo
Isoko rigari rya Urutozi Gakondo riri mu mahanga
Baracyafite imbogamizi y'abantu bumva ko amabara akeye yambarwa n'abagore
Urutozi Gakondo yashyize imbaraga mu gukora imyambaro bambarwa n'ibitsina byombi
Amwe mu makote y'abagabo yakozwe na Urutozi
Abagore nabo batanze icyifuzo cyo gukorerwa imyambaro kigerwaho
Amini yahisemo kwita imyambaro ye Urutozi kuko yari yarabonye uko utu dusimba dukorera hamwe
Kayumba Darina mu myambaro ya Urutozi Gakondo
Iyi nzu y'imideli yamaze guhabwa icyangombwa kiyemerera gukorera i Texas

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .