Inkomoko ya déchirée: Intare, Ibisamagwe n’amadubu birifashishwa mu gukora iyi myenda

Yanditswe na Sekamana Mathias
Kuya 20 Kanama 2019 saa 03:08
Yasuwe :
0 0

Imyenda yo mu bwoko bw’amakoboyi itobaguye ‘déchirée’, ni imwe mu yigezweho cyane muri iyi minsi hirya no hino ku Isi, cyane cyane mu rubyiruko ku buryo bigoye kubona abasore n’inkumi muri iyi minsi bambaye imyenda y’amakoboyi atari ay’ubu bwoko.

Imyambaro y’ikoboyi yakozwe bwa mbere ahagana mu 1870, ikozwe n’umushoramari w’umudage witwa Loeb Strauss, waje guhindura izina akitwa Levi, ari we washinze uruganda rwa Demin rwakomeje gukora imyenda y’ubu bwoko.

Yakoze ikoboyi ashaka umwenda waba mwiza ku baantu bakunda kuba bari mu kazi kenshi ntujye ubasaziraho vuba.

Amaze kuyikora yabonye ari ngombwa ko igira ibara ritagaragaza umwanda, niko gushyiramo Indigo, aya ni amakakama y’ibiti byakomokaga mu Buhinde, iba ubururu, ari naryo bara ry’amakoboyi menshi kugeza uyu munsi.

Ibyo guca imyenda byaje muri za 1970 ubwo abantu babikoze ari uburyo bwo kwigaragambya.

Denim yabonye akazi kenshi muri iyo myaka maze ikora amakoboyi menshi acikaguritse.

Ibyamamare byatangiye kwambara iyi myenda icikaguritse birimo The Sex Pistols, Iggy Pop na Bros, naho abakundishije iyi myambaro igitsina gore ni Bananarama na Madonna.

Abafana babo batangiye kubigana nabo batobagura imyenda yabo, Denim ibonye ko abantu babikunze ihita ibikoramo ubucuruzi.

Mu gukora iyi myenda, Denim yari isanzwe ikoresha acide (aside) isuka ku bitambaro byayo kugira ngo igende icikagurika ahantu hamwe na hamwe.

Hari n’igihe batobozaga ibintu bityaye ariko ukabona abantu bamwe batabyambara kuko byabaga birimo intoboro nini bitiyubashye.

Revatalisation Company yo mu Buyapani mu birwa bya Tohokhu, yaje kubibonamo amahirwe itangira gukora imyenda icikaguritse ariko atari cyane ku buryo buteye isoni.

Bahise bashinga ishami rya kompanyi yabo baryita Zoo Jeans, aho boroye intare, ibisamagwe n’amadubu kugira ngo zizajye ziba ari zo zitobagura iyi myenda mu butyo budakabije cyane.

Bagura ibitambaro by’amakoboyi na Denim, bakajya babitanaga ku mapine y’imodoka, maze bakayajugunya mu nzuri z’izi nyamaswa.

Inyamaswa zirumagura zikanashinga inzara aya mapine aboheyeho ibi bitambaro bigatobagurika ariko mu buryo bugaragara neza kuko inzara n’amenyo by’izi nyamaswa biba bityaye cyane, bityo ntibisige intoboro nini muri ibi bitambaro.

Iyo birangiye, ibi bitambaro babikata neza bakabidodamo iyi myenda, iba ifite ikirango cya Zoo Jeans cyangwa se ikoboyi zo mu nzuri tugenekereje mu Kinyarwanda.

Urubyiruko muri iyi minsi ruharaye cyane iyi myambaro
Igisamagwe kiri gutobagura ikoboyi
Amadubu nayo afasha Zoo Jeans gukora imyambaro yo muri ubu bwoko
Intare nazo zirumagura zikanatoboza inzara ibitambaro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza