Mu nkuru zacu zitandukanye ndetse zizajya zibageraho kenshi tuzajya twifashisha abahanga mu kwambika abantu badufashe mu kurangira abanyarwanda uburyo bakwambara bakaberwa kandi bijyanye n’igihe.

Kuri iyi nshuro twifashishije umuhanga mu kwambika abantu, Ingabire Sylvie, ufite iduka ryambika abakobwa n’abagore ryitwa Diva Shop riherereye mu mujyi wa Kigali mu nyubako ya CHIC.

Ingabire yatweretse imyambaro y’abakobwa n’abagore bifuza kurimba muri ibi bihe by’impeshyi ayishyize mu byiciro bitatu;

Ku ikubitiro yatweretse imyambaro ushobora kwambara ugiye mu kazi ariko ukaba wanayirimbana, imyambaro ushobora kwambara usohotse ariko ushaka no kuruhura umubiri ndetse n’imyambaro y’ibirori.

Iyi ni imyambaro iri hagati y’amafaranga ibihumbi mirongo itanu ndetse n’ibihumbi Magana atatu nk’igiciro fatizo ku muntu wifuza kwambara neza akaberwa muri iki gihe cy’impeshyi.

Ibi byiciro asobanura impamvu yabihisemo yagize ati ”Turi mu bihe by’impeshyi ndetse bitoroshye kubera icyorezo cya Covid-19, ariko abantu kenshi baba bashaka kurimba cyane ko nubwo ibirori bisigaye birangira kare ariko hari ibikiba.”

“Abakunzi bo gusohoka n’ubundi baracyasohoka mu mahoteli ndetse na restaurants zitandukanye rero abifuza kurimba rwose niyo baba bari mu rugo bahora barimbye.”

Reba imyambaro icumi wakwambara ukaberwa muri iki gihe cy’impeshyi

Icyiciro cya mbere ni imyambaro ushobora kurimbana ugiye mu kazi mu gihe cy’impeshyi ariko ukaba wanayisohokana mu gihe wagira gahunda itunguranye;

Iyi ushobora kuyambara ugiye ku kazi ukaba warenzaho ikote mu gihe uri mu kazi ariko wagira gahunda yo gusohoka ukaba wasiga ikote cyangwa ryo ukaritwara mu ntoki ugasohoka warimbye kandi bitabaye ngombwa ko ubanza kunyura mu rugo. Uyu mwambaro ushatse kuwambara wakwitwaza byibuza 80 000 Frw nk’igiciro fatizo

Indi kanzu yo kujyana ku kazi ni itaratse ushobora kujyana mu gihe waba unafite gahunda mbere y’akazi ukaba wayisohokana bitabaye ngombwa ko ujya guhindura. Iyi kanzu icyiza cyayo ni uko idasaba ko uyambaye arenzaho ikote wenda igihe ari mu kazi. Iyi kugira ngo ube uyambaye uberewe igiciro fatizo ni 60 000Frw.

Iya gatatu yo kuba wajyana ku kazi ariko ukaba wanayisohokana ukagaragara neza nk’uwarimbye, ni ikanzu yo kujyana ku kazi mu gihe wenda ufite inama witabiriye. Icyiza ni uko iyo uyambaye warenzaho agakote mu gihe uri mu kazi ariko waba usohotse ukaba wanayambara bitabaye ngombwa ko ubanza guca mu rugo. Igiciro fatizo ni 60 000 Frw

Icyiciro cya kabiri ni imyenda yo kwambara usohotse mu gihe cy’ubushyuhe kandi ukaba uberewe

Uyu ni umwenda woroheje utuma uruhuka nko mu gihe watembereye ahantu nko ku mazi ukiruhukira neza, uyu mwambaro uwukeneye igiciro fatizo ni 50 000 Frw.

Uyu ni umwambaro w’impeshyi nko ku muntu ushaka gusohoka yaba ku manywa ndetse na nijoro, ushobora kuwambaraho inkweto ngufi cyangwa indende bitewe n’aho ugiye. Igiciro fatizo cyayo ni 60 000Frw.

Uyu mwambaro ni isarubeti umuntu yambara yaba yasohotse mu birori binyuranye cyangwa se ku muntu wifuza kuwusohokana kimwe n'abahanzi bakora amashusho y’indirimbo. Ujyana n’inkweto zizamuye cyangwa inkweto ngufi ifite ibara bijyanye. Igiciro fatizo cyayo ni 80 000 Frw.

Iyi ni ikanzu ushobora gusohokana yaba ku manywa cyangwa nijoro waba wasohotse cyangwa wagiye gutembera, kubera ko igizwe n’amarase biba byiza uyambaye iyo ahisemo kwambariramo kora nk’umwenda w’imbere cyangwa byaba bitabangamye ukayambarira aho. Igiciro fatizo cyayo ni 60 000 Frw

Icyiciro cya gatatu ni amakanzu y’ubukwe ushobora kwambara mu mpeshyi mu gihe hashyushye ugataha kare

Iyi kanzu iroroshye cyane ni umwambaro umuntu yatahana ubukwe mu mpeshyi izuba riva cyangwa hari ubushyuhe ntimubangamire, ifite pasure igaragaza ikimero cy’uyambaye uko ateye intambwe ikagaragaza ubwiza bw’uyambaye. Iyi igiciro fatizo ni 100 000frw.

Iyi ni ikanzu yo mu bukwe bidasabye abantu izishashagirana, si ikanzu y’amaboko maremare abantu bambara bazi ko bataha hakonje cyangwa imvura iri kugwa. Ni ikanzu nziza kandi ikomeye ishobora kugufasha mu gihe watashye ubukwe ushaka kuberwa igiciro fatizo cyayo ni 200 000Frw.

Ikanzu ya nyuma ni iyo ushobora kwambara yaba uri umugeni cyangwa watashye ubukwe, ni nini ariko nanone ni iyo mu mpeshyi kuko idafite amaboko ku buryo uyambaye hejuru adashyuhirana cyane. Ushaka kuyambara wakwitwaza nibura 300 000 Frw nk’igiciro fatizo.