Umunyarwanda Emile Mulego amaze gushinga inzu y’urubyiniro K-Club i Nyarutarama, akaba yarabikoze mu rwego rwo gukangurira abandi Banyarwanda baba hanze kuza gushora imari yabo mu Rwanda.

“Nashinze akabyiniro ka K-Club mu rwego rwo gushishikariza Diaspora gushora imari yayo mu Rwanda, bakanahanga imirimo ku Banyagihugu” . Aya ni amagambo ya Emile Mulego, Umunyarwanda uherutse gushinga urubyiniro rushya i Nyarutarama muri Kigali. Rwafunguwe tariki ya 2 Gashyantare 2012.

Minisitiri w’Umuco na Siporo, Protais Mitali wari umushyitsi mukuru mu gufungura no gutaha uru rubyiniro yavuze ko kari mu mazu y’urubyiniro agiye gufasha Abanyarwanda mu kurushaho kwidagadura.

Minisitiri yavuze ko ubusanzwe Abanyarwanda badakunze kubona ahantu henshi baruhukira hagezweho, cyane cyane igihe baba bakoze amasaha y’igicuku, akavuga ko K-Club ije nk’igisubizo. Yagize ati:”K-Club ije mu gushishikariza Abanyarwanda kurushaho gukora amasaha 24 kuri 24”.

Mitali kandi avuga ko kuza kw’aka kabyiniro bizazamura urwego rw’ubuhanzi mu Rwanda. Aha avuga ko bizatuma abahanzi barushaho kuba abanyamwuga mu buhanzi bwabo kandi banabona n’aho bataramira heza n’abakunzi babo.

Uretse ibi Mitali kandi anashimangira ko uru rubyiniro rugiye kuba imbarutso yo kureshya abanyamahanga benshi bakaza gushora imari yabo mu Rwanda biturutse kuri serivisi nziza bazajya bahererwa ahantu hiyubashye nka K-Club.

Mu ijambo rye, umuyobozi wa K-Club Emile Mulego yavuze ko ashaka kuzamura ubucuruzi na serivisi nziza mu Rwanda.

Uhereye ibumoso ni Emile Mulego n'umugore we, Minisitiri Mitali na Dieudonné Sebashongore, Chairman wa Kigali City Council bafungura K-Club

Mulego yanavuze kandi ko igitekerezo cyo gushinga uru rubyiniro cyaturutse ku gusura ahantu henshi bityo akagenda aharahura ubwenge, anasaba kandi Diaspora Nyarwanda kujya igaruka gushora imari yayo mu Rwanda, nk’uko nawe yabigenje.

Mu muhango wo gufungurauru rubyiniro rushya, abahanzi Frankie Joe na Jackie Chandiro (wo muri Uganda wabaye mu itsinda rya Blue 3) basusurukije abari muri K-Club.

Hanatanzwe kandi ibihembo birimo kuba umunyamuryango ku banyamahirwe bari muri uwo muhango.

K-Club iherereye i Nyarutarama, kuri Station icuruza esansi ya Kobil, mu mahuriro y’umuhanda uva Kinamba n’uva Gishushu, aho bakunze kwita kwa Ndengeye.

Photo:Irakoze R