Mu gihe hari gutegurwa itangwa ry’ibihembo bya Salax Awards 2012, impinduka ni nyinshi mu buyobozi bushya bwa Ikirezi Group itegura ibihembo, kandi n’ibyiciro by’abahatanira Salax Awards bigiye kugabanywa.

Ntirenganya Emma Claudine, umuyobozi mushya wa Ikirezi Group yatangarije IGIHE ko Salax Awards 2012, harimo impinduka nyinshi bitewe n’uko Ikirezi Group kimaze gufata icyerekezo gihamye cy’icyo bashaka, bityo bimwe mu byaranze Salax Awards mu myaka ishize bijyanye n’umurongo bafite bikaba byarakuwemo.

Emma atangaza ko igikuru kigiye guhinduka ari ukugabanya ibyiciro by’abahatanira Salax Awards hagasigara 10 gusa, bigaragara ko babikwiriye kandi babikoreye.

Ati ”Abantu bakunze kuvuga ko Salax isaranganya abahanzi, turashaka ko icyo kintu cyo kuvuga ngo Salax ibasaranganya gicika, uzajya abona igikombe akajya aba yaragikoreye.”

Mu mwaka ushize ibyiciro by’abahanzi bahatanira Salax Awards byari 14.

Umwanzuro wo kugabanya ibyo byiciro muri Salax Awards 2012, wafashwe nyuma yo kubona ko hari ibyiciro bidakewe, nk’aho usanga batandukanya abahungu n’abakobwa kandi bitari ngombwa, cyangwa ugasanga bahemba umuhanzi ukiri muto n’umuhanzi ukizamuka kandi akenshi abahanzi baba bari muri ibyo byiciro ari bamwe.

Ikindi n’uko inshuro ya gatanu y’itangwa ry’ibyo bihembo bishobora kudategurwa n’Ikirezi Group kuko bashaka kubiha ibindi bigo bimenyereye mu gutegura ibitaramo n’ibirori nk’ibi, kugira ngo ibafashe kubitegura neza no kubyongerera agaciro. Nyuma yo kubyegurira ibindi bigo, Ikirezi Group yajya iza nk’indorerezi.

Ubu Ikirezi Group cyatangiye ibiganiro n’abitwa Steps Connect, ariko nta masezerano arasinywa.

Mu kiganiro Ntirenganya Emma Claudine yagiranye na IGIHE, yanavuze ko hagiye gukosorwa uburyo Salax Awards yajyaga yamamazwamo.

Ati ”bajyaga bavuga ko Salax batayimenyeshwa bihagije ikaza itunguranye, gutora bikaba igihe gito, turashaka kubihindura bakabimenyeshwa kare.”

Emma yatangaje ko biteganijwe ko mu mpera z’Ukuboza, abahanzi bazaba bamaze gushyirwa mu byiciro, gutora bikorwe muri Mutarama na Gashyantare 2013, ntagihindutse ibihembo by’abahanzi bitwaye neza mu mwaka wa 2012 bitangwe ku itariki 9 Werurwe 2013, umuhango wo kubitanga ukazabera muri Kigali Serena Hotel, binyura no kuri Televiziyo Rwanda.