Iki gitaramo cyabaye ku mugoroba wo kuri uyu wa Kane tariki 16 Gicurasi 2019, muri Kigali Convention Centre.

Ni igitaramo cyari cyahawe inyito ya ‘Transformational Tunes of Africa’. Cyatangiye saa moya gisozwa saa tanu z’ijoro.

Akanyamuneza ku maso, kwizihirwa bigaragiwe no kumwenyura nibyo byaranze iki gitaramo cyapfundikiye iyi nama yari imaze iminsi ibera mu Rwanda.

Nameless yashimishije abitabiriye mu ndirimbo ze zakunzwe aherekejwe n’ababyinnyi be batumye benshi basigarana urwibutso rwe.

Umuhanzi w’Umurundi Jean-Pierre Nimbona uzwi nka Kidum Kibido Kibuganizo yazanye ku rubyiniro imbaraga zihariye ku buryo uwamubonaga atakekaga ko afite imyaka 44.

Uyu mugabo ubusanzwe ukoresha imbaraga nyinshi ku rubyiniro hari naho yageraga akaryama hasi mu buryo bwo gushimisha abakunzi be n’abandi bari bitabiriye iki gitaramo.

Bruce Melodie na we uri mu bahanzi baririmbyemo, yahogoje benshi mu ijwi rye ryuje ubuhanga mu muziki w’umwimerere abatari basanzwe bamuzi bataha bamwirahira.

Muri iki gitaramo, itsinda rya Mafikizolo ryo muri Afurika y’Epfo niryo ryagombaga guhuriramo na Kidum muri gitaramo biza guhinduka ku munota wa nyuma bituma risimbuzwa Bruce Melodie na Nameless.

Inama mpuzamahanga ya Transform Africa Summit 2019 yaberaga mu Rwanda, yahuriyemo abantu baturutse mu bice bitandukanye barenga 4000 barimo abakuru b’ibihugu, abikorera, abahagarariye imiryango mpuzamahanga n’abandi, bigira hamwe uko bakwihutisha ubukungu bwa Afurika binyuze mu ikoranabuhanga.

Transform Africa Summit 2019 yatangiye ku wa Kabiri tariki 14 Gicurasi irasozwa kuri uyu wa Gatanu tariki 17 Gicurasi 2019.

Bruce Melodie yacanye umucyo imbere y'abari bitabiriye iki gitaramo

Yifashishije ijwi rye rihogoza benshi maze ashimisha abanyarwanda n'abanyamahanga bari bitabiriye

Abitabiriye iki gitaramo banyuzwe n'umuziki w'abahanzi babataramiye, bamwe batangira gufata urwibutso

Uyu musore yagaragaje ubuhanga mu gukirigita imirya ya gitari

Nkusi Arthur umaze kwamamara nka Rutura niwe wari uyoboye iki gitaramo

Kidum yanyuzagamo akaryama ku rubyiniro

Kidum yaririmbye ageze aho bimwanga mu nda aryama hasi

Kidum yageze aho ahamagara bamwe mu basore bari bari muri iki gitaramo baza kumufasha ku rubyiniro

Kidum yaririmbye nyinshi mu ndirimbo ze zanditse amateka mu bihe byashize

Iki gitaramo cyitabiriwe n'abantu b'ingeri zitandukanye bitabiriye inama ya Transform Africa

Nep Djs niyo yavanze imiziki muri iki gitaramo

Hari abakobwa bagororotse ku buryo babyinnye benshi bakanyurwa

Nameless yaje ku rubyiniro aherekejwe n'abakobwa babyinnye bikanyura benshi

Uyu mugabo yagaragaje kwizihirwa no kuba ari mu Rwanda aho atari aherutse

Nameless yataramiye abakunzi be bo mu Rwanda aranyurwa

Amafoto: Niyonzima Moise